Last updated on June 23rd, 2025 at 02:43 pm
ಕುಡ್ಲ, ಜೂನ್ 22: 10 ದಿನೊತ ಪೊರ್ತುಡು 7 ಪೆತ್ತೊಲು ಅನುಮಾನಾಸ್ಪದವಾದ್ ಸೈದಿನ ನಡಕೆ ನೀರ್ಮಾರ್ಗೊದ ಕೆಲರಾಯಿ ಚರ್ಚ್ ಕೈತಲ್ದ ಜೋಸೆಫ್ ಸ್ಟಾನಿ ಪ್ರಕಾಶ್ ಪನ್ಪಿನಾರೆನ ಇಲ್ಲಡ್ ನಡತ್ದ್ಂಡ್.
ಸುಮಾರ್ 50 ವರ್ಸೊರ್ದಿಂಚಿ ಕೈಕಂಜಿಲೆನ್ ಸಾಂಕೊಂದುಪ್ಪುನ ಜೋಸೆಫ್ ಸ್ಟಾನಿ ಮೆರೆಡ ಸುಮಾರು 30ರ್ದ್ಲಾ ಎಚ್ಚ ಕೈಕಂಜಿಲು ಉಲ್ಲ. ದಿನೋಲಾ ನೀರ್ಮಾರ್ಗ- ಕೆಲರಾಯಿ ದಂಚಿ ಐಕ್ಲೆನ್ ಮೇಯೆರೆ ಬುಡೊಂದಿತ್ತೆರ್. ಉಂದೇ ಕಡೀರ ಸರ್ತಿ ಮೇಯೆರೆ ಪೋತಿನ ಕೈಕಂಜಿಲು ಇಲ್ಲಗ್ ಬತ್ತಿಬೊಕ್ಕ ಒಂಜೊಂಜೇ ಪೆತ್ತೊಲು ನಿತ್ರಾಣ ಆದ್ ತೀರ್ದ. ಪೆತ್ತೊಲೆಗ್ ಏರಾ ವಿಷ ಪಾಡ್ದ್ ಕೆರ್ತಿನ ಬಗೆಟ್ ಅನುಮಾನ ಉಂಡು. ಮೆರೆಡ ಕಂಜಿ ಇಪ್ಪುನ, ಪೇರ್ ಕರೆಪುನ, ಸನೆತ ಪೆತ್ತೊಲು, ಮಲ್ಲ ಬೊಕ್ಕ ಅಂದಾಜಿ ಗಾತ್ರೊದ ಬೋರಿಲುಲಾ ಉಲ್ಲ.
ಜೂನ್ 12 ತಾನಿ ಒಂಜಿ ಪೆತ್ತ ತೀರ್ದ್ಂಡ್. 13 ತಾನಿ ಗೋಡಾಕ್ಟ್ರ್ ಬತ್ತ್ದ್ ನೆತ್ತೆರ್ದ ಸ್ಯಾಂಪಲ್ನ್ ಪರೀಕ್ಷೆಗ್ ಕೊನೊತೆರ್. ಆಜಿ ಪೆತ್ತೊಲು ಇಲ್ಲಡೇ ತೀರ್ದ, ಒಂಜಿ ಪೆತ್ತ ಮೇಯೆರೆ ಬುಡ್ತಿನವು ಗುಡ್ಡೆಡೇ ತೀರ್ದ್ಂಡ್. ನನ ಒಂಜಿ ಇತ್ತೆನಾ ಬೊಕ್ಕನಾ ಪನ್ಪಿ ಸ್ಥಿತಿಟ್ ಬಂಙ ಬರೊಂದುಂಡು.
ಮುಟ್ಟದ ನನಲಾ ಒಂತೆ ಜನ ಪೆತ್ತೊಲೆನ್ ಮೇಯೆರೆ ಬುಡ್ಪೆರ್. ಆಂಡ ಅಕ್ಲೆನ ಕೈಕಂಜಿಲೆಗ್ ದಾಲ ಸಮಸ್ಯೆ ಆತಿಜಿಗೆ. ನಡಕೆದ ಬಗೆಟ್ ಕುಡ್ಲ ಗ್ರಾಮಾಂತರ ಸ್ಟೇಶನ್ಡ್ ಒಯಿಲ್ ಬರೆಪಾದೆರ್.