Last updated on June 11th, 2025 at 08:25 am
ಕುಂದಾಪುರ, ಜೂನ್ 11: ಕುಕ್ಕುದಕಟ್ಟೆ ಪನ್ಪಿನಲ್ಪ ಚಿಲ್ಲರೆ ವಿಚಾರೊಗು ಮೆಡಿಕಲ್ ಶಾಪ್ದ ಸಿಬ್ಬಂದಿಗ್ ಪೊಂಜೊವು ಒರ್ತಿ ಹಲ್ಲೆ ಮಲ್ದಿನ ಪ್ರಕರಣೊಡು ಪೊಂಜೊವುನು ಅರೆಸ್ಟ್ ಮಲ್ತ್‌ದ್ ನ್ಯಾಯಂತಡೆಕ್ ಹಾಜಿರಿ ಮಲ್ದೆರ್.
ಗುಲ್ವಾಡಿ ಗ್ರಾಮೊದ ಕುಕ್ಕುದಕಟ್ಟೆದ ಮೆಡಿಕಲ್ ಶಾಪ್ದ ಸಿಬ್ಬಂದಿ ಲಕ್ಷ್ಮೀ ಪನ್ಪಿನ ಪೊಣ್ಣಗ್ ಯಾಸ್ಮಿನ್ ಪನ್ಪಿನ ಪೊಂಜೊವು ಚಿಲ್ಲರೆ ವಿಚಾರೊಗು ಹಲ್ಲೆ ಮಲ್ದಲ್. ಈ ವಿಡಿಯೋ ಸಾಮಾಜಿಕ ಬಲೆತ್ತಾನೊಡು ವೈರಲ್ ಆದಿತ್ತ್ಂಡ್, ಅಂಚಾದ್ ಇತ್ತೆ ಹಲ್ಲೆ ಮಲ್ದಿನ ಯಾಸ್ಮಿನ್ ನ್ ಅರೆಸ್ಟ್ ಮಲ್ದೆರ್.
ಕುಕ್ಕುದಕಟ್ಟೆದ ಮೆಡಿಕಲ್‌ಗ್ ಬತ್ತಿತ್ತಿನ ಈ ಪೊಂಜೊವು ಮರ್ದ್ ಗೆತೊಂದು 500 ರೂ ಕೊರ್ತಲ್. ಚಿಲ್ಲರೆ ಇಜ್ಜಿ, ಚಿಲ್ಲರೆ ಕೊರ್ಲೆ ಪನ್ದ್ ಪೊಣ್ಣು ಪನ್ತಲ್. ಆಂಡ ಯಾಸ್ಮಿನ್ ಅವ್ವೇ ವಿಚಾರೊಡು ಪೊಣ್ಣನ ಮಿತ್ತ್ ಹಲ್ಲೆ ಮಲ್ತ್‌ದ್, ಪೆದಂಬು ನೆರ್ದ್, ಜಾತಿ ನಿಂದನೆ ಮಲ್ತ್‌ದಲ್. ಹಲ್ಲೆ ಆತಿನ ಲಕ್ಷ್ಮೀನ್ ಕುಂದಾಪುರೊದ ತಾಲೂಕ್ ಆಸ್ಪತ್ರೆಗ್ ದಾಕಲ್ತ್‌ದೆರ್.
ಈ ಪ್ರಕರಣೊಗು ಸಂಬಂಧಿತ್‌ದ್ ಕುಂದಾಪುರ ಗ್ರಾಮಾಂತರ ಸ್ಟೇಷನ್‌ಡ್ ಅ.ಕ್ರ 34/2025,ಕಲಂ 352,115(2) BNS, 3(1)(r), 3(2)(va) SC/ST Act ದ ಅಡಿಟ್ ಪ್ರಕರಣ ದಾಕಲಾತ್ಂಡ್. ಇತ್ತೆ ಆರೋಪಿನ್ ದಸ್ತಗಿರಿ ಮಲ್ದಿನ ಪೊಲೀಸೆರ್ ನ್ಯಾಯಂತಡೆಕ್ ಹಾಜಿರಿ ಮಲ್ದೆರ್. ಈ ಪ್ರಕರಣೊದ ಸಂತ್ರಸ್ತೆದಿ ಪೊಣ್ಣನ್ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಹರಿರಾಮ್ ಶಂಕರ್ ಐಪಿಎಸ್ ಮೇರ್ ಕುಂದಾಪುರ ಸರ್ಕಾರಿ ಆಸ್ಪತ್ರೆಗ್ ಪೋದು ಪಾತೆರ್ಪಾದ್ ನಡಕೆದ ಒಲವು ಗೆತೊಂದೆರ್.