Last updated on July 16th, 2025 at 07:52 pm
ಹಿಮಾಚಲಪ್ರದೇಶ, ಜು. 16: ತುಳುನಾಡ್ಡ್ ಎಂಚ ಬುಡಂದೆ ಬರ್ಸ ಬರೊಂದುಂಡಾ ಅಂಚೆನೇ ಹಿಮಾಚಲ ಪ್ರದೇಶೊಡ್ಲಾ ಬಾರೀ ಬೊಲ್ಲ ಬರ್ಸ ಬರೊಂದುಂಡು. ಈ ಬರ್ಸೊಡು ಅಲ್ಪ ಒರರ್ದ್ ಒರಾನೆ ಬೊಲ್ಲ(Flash floods), ಗುಡ್ಡೆ ಜರಿಪುನು, ಮುಗಲ್ ಪುಡವುನು ಮಾತಾ ಆವೊಂದುಂಡು. ಈ ಮಾತಾ ವಿಕೋಪೊಲೆನ ನಡುಟು ಹಿಮಾಚಲದ ಮಂಡಿ ಪನ್ಪಿನ ಜಿಲ್ಲೆಡ್ 5 ತಿಂಗೊಲ್ದ ಕಾಟ್ ನಾಯಿದ ಕಿನ್ನಿ ಒಂಜಿ 20 ಇಲ್ಲದ 67 ಜನೊತ ಜೂವ ಒರಿಪಾದ್ಂಡ್.
ಜೂನ್ 30ದ ನಡೀರ್ ದೊರಿನ ಬರ್ಸೊಗು ಮಂಡಿ ಜಿಲ್ಲೆದ ಸಿಯಾತಿ ಗ್ರಾಮೊದ ಧರಮ್ಪುರ್ ಪನ್ಪಿನ ಊರ್ಡ್ ಗುಡ್ಡೆ ಜರಿದ್ ಊರುಗೂರೇ ಅಡಿಮೇಲ್ ಆತ್ಂಡ್. ಪಾಕ ಇಲ್ಲ್ಲ್ಲಾ ಮಣ್ಣ್ದಡಿಕ್ ಬೂರ್ದ.
ಆ ರಾತ್ರೆ ಸಿಯಾತಿ ಗ್ರಾಮೊದಾರೇ ಆಯಿನ ನರೇಂದ್ರೆ ಪನ್ಪಿನಾರ್ ತನ್ನ ಇಲ್ಲಡ್ ಜೆತ್ತಿಪ್ಪುನಗ, ರಡ್ಡನೇ ಮಾಲಿಗೆಡ್ ಕಟ್ಟ್ದ್ ಪಾಡ್ದಿತ್ತಿನ ನಾಯಿದ ಕಿನ್ನಿ, ರಾಕಿ ತಾರಾಮರ ಕೊರೆಪರೆ ಪತ್ತ್ದ್ಂಡ್. ಏಪೊಲಾ ಕೊರೆಪುನ ಲೆಕ ಇಜ್ಜಿ, ದಾದನಾ ಆದುಪ್ಪೊಡು ಪನ್ಡ್ದ್ ನರೇಂದ್ರೆ ಮಿತ್ತ್ ಪೋದು ತೂನಗ ಗೋಡೆ ಪುಡದ್, ನೀರ್ ಉಲಯಿ ಬರ್ಪುನ ತೋಜಿದ್ಂಡ್. ಪರಿಸ್ಥಿತಿನ್ ಅರ್ಥ ಮಲ್ತೊಂಡಿನ ನರೇಂದ್ರೆ ಅಪಗನೇ ನಾಯಿನ್ ಪತೊಂದು ತಿರ್ತ್ ಬಲ್ತೊಂದು ಪೋತೆರ್.
ನಾಯಿದ ಒಟ್ಟುಗು ಬಲ್ತಿನ ನರೇಂದ್ರೆ, ಜೋರು ಬರ್ಸದ ನಡುಟು ಊರ್ದ 20 ಇಲ್ಲ್ದಕ್ಲೆನ್ ಮಾತ ನಿದ್ರೆರ್ದ್ ಲಕ್ಕಾದ್ ಎಪ್ಪರೊದ ಜಾಗೆಗ್ ಲೆತೊಂದು ಪೋತೆರ್. ಆ ರಣಬೊಲ್ಲ ಬರ್ಸೊಗು ಜನೊಕುಲು ತನ್ಕುಲೆ ಇಲ್ಲ್ಪಡಿ ಮಾತಾ ಬುಡುದು ಜೂವ ಒರಿಂಡ ಯಾರು ಪನ್ಡ್ದ್ ಎಪ್ಪರೊದ ಜಾಗೆಗ್ ಬಲ್ತ್ದೆರ್.
ಮಾತಾ ಕಾಪುದ ಜಾಗೆಗ್ ಎತ್ತ್ದ್ ಒಂತೆ ಪೊರ್ತಾಯಿನೇ ಅಲ್ಪದ ಒಂಜಿ ಗುಡ್ಡೆ ಜರಿದ್ ತೂಯಿ ತೂಯಿಲೆಕನೇ ಎಚ್ಚಿನ ಇಲ್ಲ್ಲೆನ್ ಅಡಿಕ್ ಪಾಡ್ದ್ಂಡ್. ಕಾಂಡೆ ತೂನಗ ಪೆಜ್ಜಿದ್ ರಡ್ಡ್ ಮೂಜಿ ಇಲ್ಲ್ಲ್ ಮಾತ್ರ ತೋಜೆದ. ಒರಿನ ಮಾತಾ ಮಣ್ಣ್ದಡಿಟ್..!
ಕಿನ್ನಿ ರಾಕಿ ನರೇಂದ್ರನ್ ಲಕ್ಕಾವುನತ್ತಂಡ ಇಡೀಯ ಊರುಗು ಊರೇ ಮಣ್ಣ್ದಡಿಕ್ ಬೂರ್ದು ಪೋತು. ರಾಕಿರ್ದಾವರ 67 ಜನತ ಜೂವ ಒರಿದ್ಂಡ್.