Last updated on July 31st, 2025 at 05:40 pm
ಮುಂಬೈ, ಜು. 31: ಒಂಜಿ ಕಾಲೊಡು ಮುಂಬೈ ಅಂಡರ್ವರ್ಲ್ಡ್ದ ರೌಡಿಲೆನ ನಿದ್ರೆ ಹಾಲ್ ಮಲ್ತಿತ್ತಿನ ಎನ್ಕೌಂಟರ್ ಸ್ಪೆಷಲಿಸ್ಟ್ ದಯಾನಾಯಕ್ ರಿಟೈರ್ ಆತೆರ್. ರಿಟೈರ್ಮೆಂಟ್ದ ರಡ್ಡ್ ದಿನೊಕು ದುಂಬು ದಯಾನಾಯಕ್ ಗ್ ಎಸಿಪಿ ಪೋಸ್ಟ್ ಕೊರ್ತೆರ್.
ಮುಂಬೈದ ಅಂಡರ್ ವರ್ಲ್ಡ್ದ ಕೆಂಗುಡೆರೆಗ್ ಎನ್ಕೌಂಟರ್ಡೇ ಬೆಚ್ಚ ಮುಟ್ಟಾದ್ ‘ಎನ್ಕೌಂಟರ್ ಸ್ಪೆಷಲಿಸ್ಟ್’ ಪನ್ದೇ ಪುದರಾದಿತ್ತಿನ ತುಳುವೆ, ಮುಂಬೈದ ಪೆರಿಯ ಪೊಲೀಸ್ ಇನ್ಸೆಕ್ಟರ್ ದಯಾ ನಾಯಕ್ ಇನಿ, ಜುಲೈ 31 ರ್ದ್ ರಿಟೈರ್ ಆವೊಂದುಲ್ಲೆರ್. ಉಂದೆತ 2 ದಿನ ದುಂಬು ಮಹಾರಾಷ್ಟ್ರ ಸರ್ಕಾರ ಆರೆಗ್ ಎಸಿಪಿ ಆದ್ ಪ್ರಮೋಷನ್ ಕೊರ್ತುಂಡು. .ಈ ಬಗೆಟ್ ದಯಾನಾಯಕ್ ಸಾಮಾಜಿಕ ಬಲೆತ್ತಾನೊಡು ಪಟ್ಟ್ದಿತ್ತ್ದ್, ‘ಕಡೀರ ಸರ್ತಿ ಎಸಿಪಿ ಸಮ ವಸ್ತ್ರ ಪಾಡೊಂದುಲ್ಲೆ, ಶಾಶ್ವತವಾದ್ ಅವೆನ್ ಅಕ್ಕ್ಡುನ ಒಂಜಿ ದಿನೊತ ದುಂಬು, ಉಂದು ಅಕೇರಿಡ್ ಬೈದಿಪ್ಪೊಡು. ಉಂದು ಕಾಲಿ ಪ್ರಮೋಷನ್ ಮಾತ್ರ ಅತ್ತಂದೆ ಇದಮುಟ್ಟದ ಚಾಕಿರಿ, ಶಿಸ್ತ್ ಬೊಕ್ಕ ಸಮರ್ಪಣೆಗ್ ತಿಕ್ಕಿನ ಗೌರವ ಪನ್ದ್ ಪನ್ತೆರ್.
ದಯಾ ನಾಯಕ್ ಮೂಲತಃ ಒಡಿಪು ಜಿಲ್ಲೆದ ಕಾರ್ಲ ತಾಲೂಕ್ದ ಎಣ್ಣೆಹೊಳೆ ದಾರ್. ಬಂಜಿದ ಪಡಿಕ್ ಮುಂಬೈಗ್ ಪೋದು, ಅಲ್ಪ ಪ್ಲಂಬರ್, ಕ್ಯಾಂಟಿನ್ ಬೇಲೆ ಮಲ್ತ್ದೆರ್. ಬೇಲೆ ಮಲ್ತೊಂದೇ ವಿದ್ಯಾ ಭ್ಯಾಸ ಮಲ್ತ್ದ್ ಮಹಾರಾಷ್ಟ್ರೊಡು ಪೊಲೀಸ್ ಬೇಲೆಗ್ ಸೇರ್ದಿತ್ತೆರ್.
1995ಟ್ ಮಹಾರಾಷ್ಟ್ರದ ಜುಹು ಪೊಲೀಸ್ ಸ್ಟೇಶನ್ಡ್ ತನ್ನ ಪೋಲೀಸ್ ಬೇಲೆ ಸುರು ಮಲ್ತಿತ್ತೆರ್. ಅಲ್ಪರ್ದ್ ಮೂಜಿ ದಶಕ ಮುಟ್ಟ ಸಬ್ ಇನ್ಸ್ಪೆಕ್ಟರ್ ಆದ್ ಬೆನ್ತಿನ ಮೇರ್ ಇನಿ ರಿಟೈರ್ ಆವೊಂದುಲ್ಲೆರ್. ಖಡಕ್ ಅಧಿಕಾರಿ ಆದಿತ್ತಿನ ಮೇರ್ ಗ್ಯಾಂಗ್ಸ್ಟರ್ನಕ್ಲೆನ ಶೂಟೌಟ್ ಮಲ್ತ್ದ್ ಎನ್ಕೌಂಟರ್ ಸ್ಪೆಷಲಿಸ್ಟ್ ಪನ್ದೇ ಪುದರಾದಿತ್ತೆರ್.