Last updated on July 15th, 2025 at 06:24 pm
ಯೆಮೆನ್, ಜು. 15: ಮರಣದಂಡನೆ ಶಿಕ್ಷೆ ಆದಿತ್ತಿನ ಭಾರತೀಯ ನರ್ಸ್ ನಿಮಿಷಾ ಪ್ರಿಯಾನ ಮರಣದಂಡನೆನ್ ಯೆಮೆನ್ ಅಧಿಕಾರಿಲು ದುಂಬುಪಾಡ್ದೆರ್ ಪನ್ದ್ ಮೂಲೊಲೆರ್ದ್ ತೆರಿದ್ ಬೈದ್ಂಡ್. ಮರಣದಂಡನೆ ಈ ಬುಧವಾರ, ಜುಲೈ 16 ಕ್ ಗೊತ್ತಾದಿತ್ತ್ಂಡ್. ಕೇರಳದ ಪಾಲಕ್ಕಾಡ್ ಜಿಲ್ಲೆದ ಕೊಲ್ಲೆಂಗೋಡ್ ಮೂಲೊದ ಪ್ರಿಯಾ, ಜುಲೈ 2017 ಟ್ ಯೆಮೆನ್ ಪ್ರಜೆ ಒರಿಯನ್ ಕೆರ್ತಿನ ಪ್ರಕರಣೊಡು ತಪ್ಪಿತಸ್ಥೆದಿ ಪನ್ದೊ ಸಾಬೀತಾದ್ ಈ ಶಿಕ್ಷೆ ಆದಿತ್ತ್ಂಡ್.
2020 ಡ್, ಯೆಮೆನ್ ನ್ಯಾಯಂತಡೆ ಪ್ರಿಯಾಗ್ ಮರಣದಂಡನೆ ಕೊರ್ತುಂಡು ಅಂಚೆನೇ ಆ ದೇಶೊದ ಸುಪ್ರೀಂ ನ್ಯಾಯಾಂಗ ಮಂಡಳಿ ನವೆಂಬರ್ 2023 ಟ್ ಆರೆನ ಮಿತ್ತಬಿನ್ನಪುನು ವಜಾಮಲ್ತಿತ್ತ್ಂಡ್.
38 ವರ್ಸ ಪ್ರಾಯೊದ ನರ್ಸ್ ಇತ್ತೆ ಇರಾನ್ ಬೆರಿಕ್ ಇಪ್ಪುನ ಹೌತಿ ಉಗ್ರೆರೆನ ಅಂಕೆಡ್ ಇಪ್ಪುನ ಯೆಮೆನ್ ರಾಜಧಾನಿ ಸನಾದ ಕರ್ಪಿಲ್ಲ್ಡ್ ಉಲ್ಲಲ್. ಸೂಫಿ ನಾಯಕೆ ಶೇಖ್ ಹಬೀಬ್ ಉಮರ್ ಬಿನ್ ಹಫೀಜ್ನ ಪ್ರತಿನಿಧಿಲು ಬೊಕ್ಕ ನಿಮಿಷಾ ಕೆರ್ತಿನ ಮಹ್ದಿನ ಕುಟುಮೊದಕಲೆನ ನಡುಟು ಧಮರ್ಡ್ ಪಾತೆರಕತೆ ನಡತೊಂದುಪ್ಪುನೆರ್ದಾವರ ಮರಣದಂಡನೆ ಕಡೆಸ್ಸ್ದ್ಂಡ್. ಪ್ರಮುಖ ಭಾರತೀಯ ಸುನ್ನಿ ನಾಯಕೆ ಕಾಂತಪುರಂ ಎಪಿ ಅಬೂಬಕರ್ ಮುಸ್ಲಿಯಾರ್, ಶೇಖ್ ಅಬುಬಕರ್ ಅಹ್ಮದ್ ಮೊಕ್ಲೆನ ಮಧ್ಯಸ್ಥಿಕೆಡ್ ಇನಯ ಅಟ್ಟನೆ ಆದಿತ್ತ್ಂಡ್.
ಉಂದೆಕ್ ದುಂಬು ಒವ್ವೇ ಪಾತೆರಕತೆ ಸಾಧ್ಯ ಆದಿಜ್ಜಂದಿನೆರ್ದಾವರ, ಪಾತೆರ್ಯೆರ ತೀರ್ದಿನಾರೆನ ಇಲ್ಲದಕುಲು ಒತ್ತೊಂದಿನ ಮಲ್ಲ ಬುಲೆಚ್ಚಿಲ್ ಪನ್ದ್ ಪನೊಂದುಲ್ಲೆರ್. ನೆತ್ತೆರ ಪಗತೆಗ್ ಕಾಸ್ ಗೆತೊನುನ ಬಗೆಟ್ ಪಾತೆರುನ ಪುನೆಪು ನಡತೊಂದುಂಡು ಪನ್ದ್ ಮೂಲೊಲು ತೆರಿಪಾದ.
ಕೋಡೆ, ಸೋಮವಾರ, ಕೇಂದ್ರ ಸರ್ಕಾರ, ಈ ವಿಷಯೊಡು ತನ್ಕ್ ಲೆಕ್ಕೊದ ಅಜಪುಲು ಮಾತ್ರ ಉಲ್ಲ ಪನ್ದ್ ಸುಪ್ರೀಂ ಕೋರ್ಟ್ಗ್ ತೆರಿಪಾದ್ಂಡ್. ಅಟಾರ್ನಿ ಜನರಲ್ ಆರ್ ವೆಂಕಟರಮಣಿ, “ಭಾರತ ಸರ್ಕಾರ ತನರ್ದ್ ಆಪಿನೆನ್ ಮಾತಾ ಎಡ್ಡೆ ರೀತಿಡ್ ಮಲ್ತೊಂದುಂಡು ಅಂಚೆನೇ ಅಲ್ಪದ ಬಾರೀ ಪ್ರಭಾವಿ ವ್ಯಕ್ತಿಲಾದೂಪ್ಪುನ ಕೆಲ ಶೇಖ್ಲೆನ ಒಟ್ಟುಗುಲಾ ಪಾತೆರೊಂದುಂಡು” ಪನ್ದ್ ಪನ್ತೆರ್.