Last updated on July 28th, 2025 at 04:58 pm
ಕುಡ್ಲ, ಜು 28: ಬುಡಂದೆ ಏಳ್ ದಿನ ರಾತ್ರೆ ಪಗೆಲ್, ದಿನ ಇಡೀ 170 ಗಂಟೆ ಭರತನಾಟ್ಯ ಪ್ರದರ್ಶನ ಮಲ್ಪುನ ಮುಕೇನ ಕುಡ್ಲದ ವಿದ್ಯಾರ್ಥಿನಿ ರೆಮೋನಾ ಪಿರೇರಾ ವಿಶ್ವದಾಖಲೆ ಮಲ್ತ್ದೆರ್. ಕುಡ್ಲದ ಸೈಂಟ್ ಅಲೋಶಿಯಸ್ ಕಾಲೇಜ್ದ ಫೈನಲ್ ಬಿಎ ವಿದ್ಯಾರ್ಥಿನಿ ರೆಮೋನಾ ಬೆನ್ತಿ ಸಾದಗೊ ಇತ್ತೆ ಗೋಲ್ಡನ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ಗ್ ಗೋಡಿದ್ಂಡ್. ಕಾಲೇಜ್ದ ರಾಬರ್ಟ್ ಸಿಕ್ವೇರಾ ಹಾಲ್ಡ್ ರೆಮೋನಾ ಭರತನಾಟ್ಯ ಪ್ರದರ್ಶನ ಕೊರ್ತೆರ್.
ಬುಡಂದೆ 127 ಗಂಟೆ ಭರತನಾಟ್ಯ ಪ್ರದರ್ಶನ ಮಲ್ದಿನವೇ ಇದಮುಟ್ಟದ ದಾಕಲೆ ಆದಿತ್ತ್ಂಡ್. ಇತ್ತೆ 170 ಗಂಟೆ ಪ್ರದರ್ಶನ ಕೊರ್ಪುನ ಮುಕೇಪ ರೆಮೋನಾ ಪಿರೇರಾ ವಿಶ್ವಮಟ್ಟೊಡು ಮಲ್ಲ ಸಾದಗೊ ಬೆನ್ತೆರ್.
ಜು. 21ತಾನಿ ಕಾಂಡೆ 10.30ರ್ದ್ ಸಂತ ಅಲೋಶಿಯಸ್ ಕಾಲೇಜ್ದ ರಾಬರ್ಟ್ ಸಿಕ್ವೆರಾ ಹಾಲ್ಡ್ ಭರತನಾಟ್ಯ ಪ್ರದರ್ಶನ ಸುರು ಮಲ್ದಿನ ರೆಮೋನಾ ಮೇರ್ ಜು. 28 ಮುಟ್ಟ ಬುಡಂದೆ ನಾಟ್ಯ ಪ್ರದರ್ಶನ ಕೊರ್ತೆರ್. ಭರತನಾಟ್ಯೊದ ಬೇತೆ ಬೇತೆ ಪ್ರಕಾರೊಲಾಯಿನ ಅಲೆರಿಪ್ಪು, ಜತಿಸ್ವರಂ, ಶಬ್ದಂ, ವರ್ಣಂ, ಪದಂ, ತಿಲ್ಲಾನಲೆನ ಒಟ್ಟುಗು ಸೆಮಿಕ್ಲಾಸಿಕ್, ದೇಬೆರೆ ಪದೊಕುಲೆಗ್ ಭರತನಾಟ್ಯ ಪ್ರದರ್ಶನ ಕೊರ್ತೆರ್. 61 ಪದ್ಯೊಲೆನ್ 3 ಗಂಟೆಗ್ ಒಂಜೆತ ಲೆಕ ಸೆಟ್ ಮಲ್ತಿತ್ತೆರ್.
ಎಂಚ ಬೆನ್ಯೆರಾಂಡ್ ಈತ್ ಮಲ್ಲ ಸಾದಗೊ?
ಕರಿನ 13 ವರ್ಸೊರ್ದಿಂಚಿ ರೆಮೋನಾ ಭರತನಾಟ್ಯ ಅಭ್ಯಾಸ ಮಲ್ತೊಂದುಲ್ಲೆರ್. ಭರತನಾಟ್ಯೊಡು ಪಾಕ ದಾಕಲೆಲೆನ್ಲಾ ಮಲ್ತ್ದೆರ್. ಈ ವಿಶ್ವದಾಕಲೆ ಮಲ್ಪೆರೆ ಬೋಡಾದ್ ಪಾಕ ವರ್ಸೋರ್ದಿಂಚಿ ಅಟ್ಟನೆ ಮಲ್ತೊಂದಿತ್ತೆರ್. ದಿನೋಲಾ 5 ರ್ದ್ 6ಗಂಟೆ ಭರತನಾಟ್ಯ ಅಭ್ಯಾಸ ಮಲ್ತೊಂದಿತ್ತೆರ್. ಕಾಲೇಜ್ ಪಾಠ ಓದುನೆತ ಒಟ್ಟುಗು ಭರತನಾಟ್ಯೊಗ್ಲಾ ಆತೇ ಪ್ರಾಶಸ್ತ್ಯ ಕೊರ್ತೆರ್.
ಗೋಲ್ಡನ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ ಅಧಿಕಾರಿಲೆನ ಎದುರುಡೇ ರೆಮೋನಾ ಭರತನಾಟ್ಯ ಪ್ರದರ್ಶನ ಮಲ್ತ್ದೆರ್. ಏಳ್ ದಿನೊತ ಪ್ರದರ್ಶನ ಕ್ಯಾಮರಾಡ್ ರೆಕಾರ್ಡ್ ಆತ್ಂಡ್. ಅಧಿಕಾರಿಲು ರೆಮೋನಾ ಸಾದಗೊನು ಸಂಪೂರ್ಣ ದಾಖಲೀಕರಣ ಮಲ್ತೊಂದೆರ್. ರೆಮೋನಾ ಸಾದಗೊಗು ಕಾಲೇಜ್ ಆಡಳಿತ ಮಂಡಳಿ, ಶಿಕ್ಷಕೆರ್, ದೋಸ್ತಿಲೆನ ಬೆರಿತಾಂಗ್ ಇತ್ತ್ಂಡ್.
ಬಚ್ಚೆಲ್ ಕಲೆಪೆದಿನ ಎಂಚ?
ದಾಖಲೆ ಬರೆಯೆರೆ ಬೋಡಾದ್ ಭರತನಾಟ್ಯ ಪ್ರದರ್ಶನ ಮಲ್ತೊಂದಿತ್ತಿನ ಪೊರ್ತುಡು ರೆಮೋನಾ ಲೆಕ್ಕೊಡು ಬಂಜಿಗ್ ದೆತೊನೆದೆರ್. ಪ್ರತಿ 3 ಗಂಟೆಗೊರ 15 ನಿಮಿಷೊದ ವಿಶ್ರಾಂತಿ ಇಪ್ಪೆದ್ಂಡ್. ಈ ಪೊರ್ತುಡು ಪರ್ನ್ದ್, ಕೊಜಪು, ಬೊಂಡ, ಸಮ ಬೆಯ್ಪಾಯಿನ ಬೊಳಂತೆ ಅರಿತ ಉನ್ಪು ಉನ್ಪೆದೆರ್. ಉಂದೆಕ್ ಬೋಡಾದೆ ಕೆಲ ತಿಂಗೊಳುರ್ದಿಂಚಿ ಆಹಾರ ಕ್ರಮೊತ ಅಭ್ಯಾಸ ಮಲ್ತೊಂದಿತ್ತೆರ್.
ಗೋಲ್ಡನ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ ದಾಖಲೆಗ್ ರೆಮೋನಾ ಪಿರೇರಾ ಬುಡಂದೆ ಭರತನಾಟ್ಯ ಮಲ್ತೊಂದುಪ್ಪುನಗ ಬೈದ್ಯೆರ್, ವೈದ್ಯಕೀಯ ಸಿಬ್ಬಂದಿ, ಆ್ಯಂಬುಲೆನ್ಸ್ ಇತ್ತಿನ ಕೂಟ ಅಲ್ಪನೇ ಇತ್ತ್ಂಡ್. ಪ್ರತಿ ಸರ್ತಿ 3 ಗಂಟೆಗೊರ ಬಚ್ಚೆಲ್ ಕಲೆಯೆರ ಕುಲ್ಲುನಗ ಬೈದ್ಯೆರಾ ಆರೋಗ್ಯ ತಪಾಸಣೆ ಮಲ್ತೊಂದಿತ್ತೆರ್. ಒಟ್ಟು ಏಳ್ ದಿನೊತ ಅವಧಿಡ್ ರೆಮೋನಾ ಪಿರೇರಾ ಭರತನಾಟ್ಯೊದ ಬೇತೆ ಬೇತೆ ಪ್ರಕಾರೊಲೆನ ಪ್ರದರ್ಶನ ಮಲ್ತ್ ತೂಪಾದೆರ್.