Last updated on July 8th, 2025 at 08:44 am
ಬಂಟ್ವಾಳ ಜುಲೈ 08: ಮೋಕೆ ಮಲ್ತಿನ ಪೊಣ್ಣಗ್ ಬೀಸತ್ತಿ ಪಾಡ್ದ್ ಕೆರ್ಯೆರೆ ತೂಯಿನ ಜವನೆ ಒರಿ, ಅವೆರ್ದ್ ಬೊಕ್ಕ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊಂದಿನ ನಡಕೆ ಫರಂಗಿಪೇಟೆಡ್ ನಡತ್ದ್ಂಡ್. ಬೀಸತ್ತಿ ಬೂರ್ದಿನ ಜವನ್ದಿನ್ ಫರಂಗಿಪೇಟೆ ನಿವಾಸಿ ಕುಮಾರಿ ದಿವ್ಯಾ ಯಾನೆ ದೀಕ್ಷಿತಾ (26) ಪನ್ದ್ ಗುರ್ತ ಪತ್ತ್ದೆರ್. ಆತ್ಮಹತ್ಯೆ ಮಲ್ತೊಂದಿನ ಜವನೆ ಕೋಡ್ಮನ್ ಗ್ರಾಮೊದ ಸುಧೀರ್(30) ಪನ್ದ್ ತೆರಿದ್ ಬೈದ್ಂಡ್.
ಪೊಲೀಸೆರೆನ ಒಲವುದ ಪ್ರಕಾರ ಫರಂಗಿಪೇಟೆ ನಿವಾಸಿ ಕುಮಾರಿ ದಿವ್ಯಾ ಯಾನೆ ದೀಕ್ಷಿತಾ ಬೊಕ್ಕ ಕೋಡ್ಮನ್ ಗ್ರಾಮ ನಿವಾಸಿ ಸುಧೀರ್, ಸುಮಾರ್ 8 ವರ್ಸೊರ್ದಿಂಚಿ ಒರಿಯನೊರಿ ಮೋಕೆ ಮಲ್ತೊಂದಿತ್ತೆರ್. ಆಂಡ ಕರಿನ ಕೆಲ ತಿಂಗೊಲುರ್ದಿಂಚಿ ಇರ್ವೆರೆ ನಡುಟು ಮನಸ್ತಾಪ ಆತ್ಂಡ್. ದಿವ್ಯಾ ಸುಧೀರ್ಡ ಪಾತೆರುನೆನ್ ಉಂತಾದಿತ್ತಲ್. ಆಂಡಲಾ ಆರೋಪಿ ಸುಧೀರ್ ಫೋನ್ ಮಲ್ಪುನ, ಬೆರಿಯೆ ಬರ್ಪುನ ಪೂರ ಮಲ್ಪೆದೆಗೆ.
ಕೋಡೆ ಕಾಂಡೆ ಫರಂಗಿಪೇಟೆ, ಸುಜೀರ್ಮಲ್ಲಿ ಪನ್ಪಿನಲ್ಪ ಆರೋಪಿ ಸುಧೀರ್ ಬೊಕ್ಕ ದಿವ್ಯಾ ಪಾತೆರ್ಯೆರ ಬತ್ತ್ದೆರ್. ಈ ಪೊರ್ತುಡು ಆರೋಪಿ ಸುಧೀರ್ ದಿವ್ಯಾಗ್ ಮದಿಮೆ ಆಯೆರ ಒತ್ತಾಯ ಮಲ್ತ್ದೆ. ಈ ಪೊರ್ತುಡು ಇರ್ವೆರೆ ನಡುಟು ಪಾತೆರೊಗು ಪಾತೆರ ಬುಲೆದ್ ಲಡಯಿ ಆತ್ಂಡ್. ಆರೋಪಿ ಸುಧೀರ್ ತಾನ್ ಕನತಿತ್ತಿನ ಬೀಸತ್ತಿಡ್ ದಿವ್ಯಾನ್ ಕೆರ್ಯೆರ ಕುತ್ತುದೆ. ಆಲ್ ತಪ್ಪಾವೊಂದು ಬಲ್ತ್ ಪೋದು ಬೂರ್ದಲ್. ಆಲ್ ಸೈತಲ್ ಪನ್ದ್ ಎನ್ನ್ದ್ ಆರೋಪಿ ಅಲ್ಪರ್ದ್ ದಿವ್ಯಾನ ಬಾಡಾಯಿದಿಲ್ಲಗ್ ಪೋದು, ಅಲ್ಪ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊಂದೆ.
ಈ ಬಗೆಟ್ ಬಂಟ್ವಾಳ ಗ್ರಾಮಾಂತರ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್.