Last updated on August 20th, 2025 at 09:32 am
ಬೆಂಗಳೂರು, ಆ. 20: ಬೆಂಗಳೂರುಡು ಡ್ರಗ್ಸ್ ದಂಧೆ ಅಂಕೆದಾಂತೆ ನಡತೊಂದುಂಡು. ಅವೆಟ್ಲಾ ಪರದೇಸೊದಕುಲೆನ ಕೈ ಇತ್ತ್ದ್, ವೀಸಾದ ಪೊರ್ತು ಮುಗಿಂಡಲಾ ಬೆಂಗಳೂರುಡೇ ಗಟ್ಟಿ ಆತೆರ್. ಇತ್ತೆ ಪೊಲೀಸೆರ್ ಒಂತೆ ಜನ ಪೆಡ್ಲರ್ನಕ್ಲೆನ್ ಪತ್ತ್ದೆರ್. ಅಕ್ಲೆನ ಕೈರ್ದ್ ಒಂಜಿ ರಡ್ಡತ್ತ್, ಸುಮಾರ್ ಐದು ಕೋಟಿ ರೂಪಾಯಿ ಮೌಲ್ಯೊದ ಡ್ರಗ್ಸ್ ಸೀಜ್ ಮಲ್ತ್ದೆರ್.
ಆಫ್ರಿಕಾ ಮೂಲೊದ ಜೊಯಲ್ ಕಾಬೊಂಗ್, ಜೊಯ್ ಸಂಡೇ ಕೈದಾತಿನಕುಲು. ಜೊಯಲ್ ಕಾಬೊಂಗ್ 12 ವರ್ಸೊಗು ದುಂಬು ವಿದ್ಯಾರ್ಥಿ ವೀಸಾಡ್ ಭಾರತೊಗು ಬತ್ತಿತ್ತೆ. ಅಂಚೆನೇ ಜೊಯ್ ಸಂಡೇ ಲಾ ಮೂಜಿ ವರ್ಬೊಗು ದುಂಬು ಭಾರತೊಗು ಬತ್ತಿತ್ತಲ್. ವೀಸಾ ಮುಗೀಂಡಲಾ ಬೆಂಗಳೂರ್ಡೇ ಇತ್ತೆರ್. ಈ ಇರ್ವೆರ್ ಕುಡೊರಿಯಡ ಡ್ರಗ್ಸ್ ಕ್ರಯಗ್ ಗೆತೊಂದು ಮಾರೊಂದಿತ್ತೆರ್. ಆಗಸ್ಟ್ 15ತ ಬಯ್ಯಡ್ ಬೆಟ್ಟದಾಮಸಪುರಡ್ ಆರೋಪಿಲು ತಿಕ್ಕ್ದ್ ಬೂರ್ದೆರ್. ಮೊಕ್ಲೆನ ಕೈರ್ದ್ 2.150 kg ಎಂಡಿಎಂಎ ವಶೊಕು ಗೆತೊಂದು ಕೈದ್ ಮಲ್ದ್ಂಡ್ ಪನ್ದ್ ಪೊಲೀಸ್ ಆಯುಕ್ತೆ ಸೀಮಂತ್ ಕುಮಾರ್ ಸಿಂಗ್ ತೆರಿಪಾದೆರ್.
ಅಂಚೆನೇ ಸಿಸಿಬಿ ಪೊಲೀಸೆರ್ಲಾ ಡ್ರಗ್ಸ್ ಪೆಡ್ಲಿಂಗ್ ಮಲ್ತೊಂದಿತ್ತಿನ ಆಫ್ರಿಕನ್ ಮೂಲೊದ ಜಾನ್ ಡಿಕೊಸ್ಟೋ ಪನ್ಪಿನಾಯನ್ ಕೈದ್ ಮಲ್ತಿತ್ತ್ದ್, 40 ಲಕ್ಷ ರೂಪಾಯಿ ಮೌಲ್ಯೊದ 255 ಗ್ರಾಂ. ತೂಕೊದ ಎಂಡಿಎಂಎ ಕ್ರಿಸ್ಟಲ್ ವಶೊಕು ಗೆತೊಂದೆರ್. ಟೂರಿಸ್ಟ್ ವೀಸಾಡ್ ಬತ್ತ್ದ್ ಆವಲಹಳ್ಳಿ ಪೊಲೀಸ್ ಸ್ಟೇಶನ್ ಸೀಮೆಡ್ ಇತ್ತಿನ ಜಾನ್, ಕುಂಟುದ ಬೇರ ಮಲ್ತೊಂದಿತ್ತೆ. ಆಂಡ ಉಲತ್ತುಲಯಿ ಗುರ್ತದಕುಲು ಬೊಕ್ಕ ವಿದ್ಯಾರ್ಥಿಲೆನ್ ಟಾರ್ಗೆಟ್ ಮಲ್ತ್ದ್ ಡ್ರಗ್ಸ್ ಮಾರ್ಂದಿತ್ತೆ.