Last updated on August 5th, 2025 at 01:05 pm
ಕುಡ್ಲ, ಆ. 05: ಕುಡ್ಲ ಪೇಂಟೆ ಅಂಚೆನೇ ಮಂಗಳೂರು ಜಿಲ್ಲೆಗೇ ಮಲ್ಲ ಆಕರ್ಷಣೆದ ರೂಪೊಡು ವಾರ್ ಟ್ಯಾಂಕ್ (ಟಿ-55) ಬೊಕ್ಕ 303 ರೈಫಲ್ ಕುಡ್ಲಗ್ ಬತ್ತ್ದ್ಂಡ್.
ಸಾಮಾನ್ಯವಾದ್ ಕೊಲಲೊಡು ಪಾಲ್ ಪಡೆದ್ ತನ್ನ ಚಾಕಿರಿರ್ದ್ ನಿವೃತ್ತಿ ಆತಿನ ಟ್ಯಾಂಕ್ ಬೊಕ್ಕ ದಂಡ್ದ ಕೈದ್ಲೆನ್ ವಾರ್ ಟ್ರೋಫಿ (ಯುದ್ಧ ಸ್ಮರಣಿಕೆ) ದ ಲೆಕ ತೂಪರಿಕೆಗ್ ದೀಪೆರ್. ಅಂಚೆನೇ ಕುಡ್ಲಗ್ ಟ್ಯಾಂಕ್ ನ್ ಕೊರ್ಲೆ ಪನ್ದ್ ಸಂಸದೆ ಕ್ಯಾ|ಬ್ರಿಜೇಶ್ ಚೌಟೆರ್ ರಕ್ಷಣಾ ಸಚಿವಾಲಯೊಗು ಕಾಯೆಸ್ ಮಲ್ತಿನೆಟ್ ಟ್ಯಾಂಕ್ ಕುಡ್ಲಗ್ ಬೈದ್ಂಡ್.
ಕದ್ರಿ ಯುದ್ಧಸ್ಮಾರಕ ಅತ್ತ್ಂಡ ಸರ್ಕಿಟ್ ಹೌಸ್ದ ಎದುರು ಇಜಿಂಡ ಬೇತೆ ಒವ್ವಾಂಡಲ ಎಡ್ಡೆ ಜಾಗೆನ್ ತೂದು ಟ್ಯಾಂಕ್ ನ್ ದೀಪೆರ್. ಐಕ್ ಬೋಡಾದ್ ಬೇತೆನೇ ಮಿತ್ತರ್ಮೆ ಕಟ್ಟಾವುನ ಬೇಲೆಲಾ ಮಹಾನಗರಪಾಲಿಕೆರ್ದ್ ಆವರೆ ಉಂಡು. ಟಿ-55 ಟ್ಯಾಂಕ್ ದುಂಬು ಕೊಲಲಡ್ ಗಲಕೆ ಆದಿತ್ತ್ದ್, ಇತ್ತೆ ಗಲಸುನ ಸ್ಥಿತಿಟ್ ಇಜ್ಜಿ. ಅಂಚಿನೆನ್ ದೇಶೊದ ಬೇತೆ ಬೇತೆ ಉಮೇದ್ ಇತ್ತಿನ ಸಂಸ್ಥೆಲೆಗ್ ದೇಶೊಡು ‘ಸ್ಪೂರ್ತಿದಾಯಕ’ ವಾದ್ ತೂಪಾಯೆರ ಬೋಡಾದ್ ಕೊರ್ಪೆರ್. ಅಂಚೆನೇ ಮೂಜಿ ತಿಂಗೊಲುಗು ಪಿರವು ಮಹಾನಗರಪಾಲಿಕೆಗ್ ದರ್ಮೊಗು ರಕ್ಷಣಾ ಇಲಾಖೆ ಟ್ಯಾಂಕ್ನ್ ಕೊರ್ಯೆರ ಒತ್ತೊಂದುಂಡು. ಪುಣೆದ ಕಿರ್ಕಿ ಪನ್ಪಿನ ಡಿಪೋ ರ್ದ್ ಈ ಟಿ-55 ಟ್ಯಾಂಕ್ ತರ್ಪಾದೆರ್.
ಸುಮಾರ್ 40 ಟನ್ ದಿನ್ನೊದ ಟ್ಯಾಂಕ್ ಉಂದಾದಿತ್ತ್ದ್, ಕೊಲಲೊಡು ಗಲಸ್ದಿನ ಟ್ಯಾಂಕ್ ಕುಡ್ಲದ ಪ್ರವಾಸೋದ್ಯಮಗ್ಲಾ ಒಯ್ಲ್ ಕನಪುಂಡು. ಪೇಂಟೆಡೆ ಅವೆಕ್ ಸಮಗಟ್ಟ್ದ ಮಿತ್ತರ್ಮೆದ ವ್ಯವಸ್ಥೆ, ಕಾತ್, ದೊಂಬುರ್ದ್ ಕಾಪುನ ಶೆಡ್ ಆವೊಡು. ಟಿ- 55 ಟ್ಯಾಂಕ್ಲೆನ್ 1965 ಬೊಕ್ಕ 1971ತ ಪಾಕಿಸ್ತಾನ ಕೊಲಲೊಡು ಗಲಸ್ದಿತ್ತೆರ್. ಸಂಸತ್ತ್ಗ್ ಟೆರರಿಸ್ಟ್ ಪೊಗ್ಗಿಬೊಕ್ಕ ನಡತಿನ ಆಪರೇಷನ್ ಪಾರಾಕ್ರಮ ಡ್ಲಾಎರ್ ಗಲಸ್ದ. ಭಾರತೊದ ಮಿಲಿಟರಿ ದಂಡ್ದ ತಂಕೊದ ಗುರ್ತ ಆದ್ ಈ ಟ್ಯಾಂಕ್ಲೆನ್ ಇತ್ತೆ ಬೇತೆ ಬೇತೆ ಕಡೆಟ್ ತೂಪರಿಕೆಗ್ ದೀಪೆರ್. ಉಂದೆನ್ ತೂದು ಜವನೆರೆಗ್ ದಂಡ್ಗ್ ಸೇರುನ ಉಮೇದ್ ಬರಡ್ ಪನ್ಪಿನ ಉಂದೆತ ಉದ್ದೇಶ.