Last updated on August 25th, 2025 at 06:58 am
ಕುಡ್ಲ, ಆ. 24: ಧರ್ಮಸ್ಥಳ ಪ್ರಕರಣೊಡು ನಡತೊಂದುಪ್ಪುನ ಎಸ್ಐಟಿ ಜಡ್ತೆದ ಬಗೆಟ್ ಪಕ್ಷ ಒಂಚಿ ಉಂತುಂಡ ಅಂಚಿ ಯಾನ್ ಉಂತುವೆ, ಜಡ್ತೆ ನಡತೊಂದುಪ್ಪುನ ಪೊರ್ತುಡು ಯಾನ್ ಈ ಬಗೆಟ್ ಒವ್ವೇ ಕಮೆಂಟ್ ಮಲ್ಪುಜಿ ಪನ್ದ್ ಸಂಸದೆ ಕ್ಯಾ. ಬ್ರಿಜೇಶ್ ಚೌಟೆರ್ ಪನ್ಡೆರ್.
ಕುಡ್ಲಡ್ ಪತ್ರಿಕಾಗೋಷ್ಠಿಡ್ ಪಾತೆರ್ನ ಆರ್ ಧರ್ಮಸ್ಥಳ ಪ್ರಕರಣೊದ ಬಗೆಟ್ ಒಡಿಪು ಸಂಸದೆರ್ ಸದನೊಡು ಪ್ರಶ್ನೆ ಮಲ್ತ್ದೆರ್. ಯೂಟ್ಯೂಬರ್ಲೆಗ್ ಬೇತೆ ಬೇತೆ ಕಡೆರ್ದ್ ಕಾಸ್ ಬೈದ್ಂಡ್, ಕ್ಷೇತ್ರೊದ ವಿರುದ್ದ ಷಡ್ಯಂತ್ರೊಗು ಯೂಟ್ಯೂಬರ್ನಕ್ಲೆಗ್ ಕಾಸ್ ಬೈದ್ಂಡ್, ಉಂದೆತ ಬಗೆಟ್ ಸಮ ಜಡ್ತೆ ಆವೊಡು ಪನ್ದ್ ಆರ್ ಆಗ್ರಹ ಮಲ್ದೆರ್. ಧರ್ಮಸ್ಥಳ ವಿಚಾರೊಡು ಬಿಜೆಪಿ ಪಕ್ಷ ಬೊಕ್ಕ ಜನಪ್ರತಿನಿಧಿಲೆನ ಸ್ಟ್ಯಾಂಡ್ ಇತ್ತೆಲಾ ಸ್ಪಷ್ಟ ಇತ್ತ್ದ್, ಧರ್ಮಸ್ಥಳ ಹಿಂದೂಲೆನ ಧಾರ್ಮಿಕ ಕೇಂದ್ರ, ಭಾವನೆಲೆನ ಕೇಂದ್ರ ಆದುಂಡು, ಒವ್ವೇ ಕೇಸ್ನ್ ಪತೊಂದು ಶ್ರದ್ದಾ ಕೇಂದ್ರೊಲೆನಗ್ ಅಪಮಾನ ಮಲ್ಪುನ, ಭಕ್ತೆರೆನ ಭಾವನೆಲೆಗ್ ತೆಟ್ಟ್ ಮಲ್ಪುನೆನ್ ಒತ್ತೊನರೆ ಆಪುಜಿ ಪನ್ದ್ ಬಿಜೆಪಿ ಸ್ಪಷ್ಟ ಮಲ್ತ್ದ್ಂಡ್.
ಸೌಜನ್ಯ ಪ್ರಕರಣೊದ ಪಿರ ಜಡ್ತೆ ಆವೊಡು ಪನ್ದ್ ಹರೀಶ್ ಪೂಂಜೆರ್ ವಿಧಾನಸಭೆಟ್ ಪನ್ತೆರ್. ಸೌಜನ್ಯ ಕೇಸ್ನ್ ಬೆರಕೆ ಮಲ್ತ್ದ್ ಶ್ರದ್ದಾಕೇಂದ್ರೊಲೆನ ಮಿತ್ತ್ ದಾಳಿ ಮಲ್ಪೆರ ಎಂಕ್ಲ ಬುಡ್ಪುಜ ಪನ್ದ್ ಪನ್ಡೆರ್. ಎಸ್ಐಟಿ ಜಡ್ತೆ ಮಲ್ತೊಂದುಂಡು. ಸುರುಟು ಎಸ್ಐಟಿನ್ ಎದುಕೊನ್ದಿನನೇ ಬಿಜೆಪಿ ಪಕ್ಷ, ಜನಪ್ರತಿನಿಧಿಕುಲಾದ್ ಜಡ್ತೆದ ಪೊರ್ತುಡು ಜವಾಬ್ದಾರಿ ಇತ್ತಿನ ಸ್ಥಾನೊಡು ಕುಲ್ಲುದು ಪಾತೆರುನ ಸಮ ಅತ್ತ್. ಉಂದೆತ ಬಗೆಟ್ ಜಡ್ತೆ ಮಲ್ತ್ದ್ ಬೋಡಾಪಿನ ಕ್ರಮ ಗೆತೊನಡ್ ಪನ್ದ್ ಕುಡ್ಲಡ್ ಸಂಸದೆ ಕ್ಯಾ. ಬ್ರಿಜೇಶ್ ಚೌಟೆರ್ ಪನ್ಡೆರ್.
ಧರ್ಮಸ್ಥಳದ ಬಗೆಟ್ ಈರೆನ ಗುರುಕುಲು ಕಲ್ಲಡ್ಕ ಪ್ರಭಾಕರ ಭಟ್ ದಾಯೆ ಪಾತೆರ್ದಿಜೆರ್ ಪನ್ದ್ ಕೇನ್ಡಿನ ಕೇನ್ಪುಗು ಸದು ಕೊರ್ನ ಸಂಸದೆರ್ ಎನ್ನ ಗುರು ಕಲ್ಲಡ್ಕ ಪ್ರಭಾಕರ ಭಟ್ ಪನ್ದ್ ಏರ್ ಪನ್ತೆರಾ ತೆರಿದಿಜಿ, ಎನ್ನ ಗುರು ಭಗವಾಧ್ವಜ, ಆರ್ಎಸ್ಎಸ್ ದ ಸ್ವಯಂಸೇವಕೆರ್, ಪೆರಿಯೆರೆಗ್ ಎಂಕ್ಲ ಗೌರವ ಕೊರ್ಪ ಪನ್ದ್ ಪನ್ಡೆರ್.