ಮಂಗಳೂರು ದಸರಾಡ್ ಡಿಜೆಗ್ ಅವಕಾಶ ಇಜ್ಜಿ – ಪದ್ಮರಾಜ್ ರಾಮಯ್ಯ

Last updated on August 26th, 2025 at 01:09 pm

ಕುಡ್ಲ, ಆ. 26: ಈ ಸರ್ತಿದ ಕುದ್ರೋಳಿ ದಸರಾಡೊ ಡಿಜೆ ಗ್ ಅವಕಾಶ ಕೊರ್ಪುಜ ಪನ್ದ್ ಕುದ್ರೋಳಿ ಶ್ರೀ ಗೋಕರ್ಣನಾಥೇಶ್ವರ ದೇಲಂತಡೆದ ಆಡಳಿತ ಸಮಿತಿದ ಕೋಶಾಧಿಕಾರಿ ಪದ್ಮರಾಜ್ ಆರ್ ತೆರಿಪಾದೆರ್.

ಸೋಮವಾರ ಪತ್ರಿಕಾಗೋಷ್ಠಿಡ್ ಪಾತೆರ್ನ ಆರ್ ಕುದ್ರೋಳಿ ಕ್ಷೇತ್ರೊದ ದಸರಾಡ್ ಡಿಜೆ ಬೊಕ್ಕ ಅಬ್ಬರೊಗು ಅವಕಾಶ ಕೊರ್ಪುನೇ ಇಜ್ಜ. ಕರಿನ ವರ್ಸ ಏರೋ ತೆರಿಯಂದೆ ಡಿಜೆ ಪಾಡ್ದಿತ್ತೆರ್. ಅವೆನ್ ಪೊಲೀಸೆರ್ ಉಂತಾದಿತ್ತೆರ್. ಈ ವರ್ಸ ಡಿಜೆದ ಬಗೆಟ್ ಸರ್ಕಾರನೇ ಸ್ಪಷ್ಟ ಆದೇಶ ಕೊರ್ತುಂಡು. ಎಸ್‌ಒಪಿಡ್ ನಿರ್ಬಂಧೊಲೆನ ಒಲವು ಕೊರ್ತೆರ್. ಅಂಚಾದ್ ಕುದ್ರೋಳಿ ದಸರಾಡ್ ಡಿಜೆಗ್ ಅವಕಾಶ ಇಜ್ಜಿ ಪನ್ದ್ ಪದ್ಮರಾಜ್ ತೆರಿಪಾದೆರ್.

ಸಂತೆ ದೀಪಿನ ಜಾಗೆದ ಸಂಬಂಧಿತ್‌ದ್ ಸ್ಪಷ್ಟ ಒಲವು ಕೊರ್ಪ. ಮುಲ್ಪ ಮಾತಾ ಧರ್ಮದಕುಲೆಗ್ಲಾ ಸಂತೆ ದೀಯೆರ ಅವಕಾಶ ಉಂಡು. ಮಾತೆರೆನ್ಲಾ ಸಮಾನವಾದ್ ತೂತಿನ ನಾರಾಯಣ ಗುರುಕುಲು ತಾಪನೆ ಮಲ್ದಿನ ದೇಲಂತಡೆ ಉಂದು. ಅಂಚಾದ್ ಜಾತಿ ಧರ್ಮೊದ ಆಧಾರೊಡು ಬೇತೆ ಬೇತೆ ಮಲ್ಪೆರ ಅವಕಾಶ ಇಜ್ಜಿ. ಇಡೆಗ್ ಬರ್ಪುನಕ್ಲೆನ್ ಮಾತಾ ದೇವೆರೆನ ಜೋಕುಲು ಪನ್ದೇ ತೂಪ ಪನ್ದ್ ಆರ್ ಪನ್ಡೆರ್. ಈ ಸರ್ತಿ ಕುದ್ರೋಳಿ ಕ್ಷೇತ್ರೊದ ದಸರಾ ಉಚ್ಚಯಡ್ ಕಿನ್ನಿ ಪಿಲಿ ಪಂತೊ ಬೊಕ್ಕ ಸಾದಗೊ ಬೆನ್ತಿನ ಪೊಂಜೊವುಲೆಗ್ ಸನ್ಮಾನ ಕಾರ್ಯಕ್ರಮ ಪೊಸತಾದ್ ಗೋಡ್ಯಾದ್ಂಡ್. ಸಾಂಸ್ಕೃತಿಕ ಕಾರ್ಯಕ್ರಮೊಲು ಬಯ್ಯ 4 ಗಂಟೆಗೇ ಸುರು ಆಪ ಪನ್ದ್ ಪನ್ಡೆರ್.