Last updated on August 21st, 2025 at 08:03 am
ಕುಡ್ಲ, ಆ. 20: ದೇರಳಕಟ್ಟೆಡ್ ಇಪ್ಪುನ ಮುತ್ತೂಟ್ ಫೈನಾನ್ಸ್ ಡ್ ಕಂಡ್ಯೆರ ಪುನೆದ್ ಪದ್ರಾಡಾದಿತ್ತಿನ ಆರೋಪಿನ್ ಪೊಲೀಸೆರ್ ಪತ್ತ್ದೆರ್.
ಕೊಣಾಜೆ ಪೊಲೀಸ್ ಸ್ಟೇಶನ್ ಸೀಮೆದ ದೇರಳಕಟ್ಟೆ ಮುತ್ತೂಟ್ ಪೈನಾನ್ಸ್ ಬ್ಯಾಂಕ್ ನ್ ಮಾರ್ಚ್ 29 ದಾನಿ ಲೂಟುನ ಪುನೆಪು ನಡತಿತ್ತ್ಂಡ್. ದೇರಳಕಟ್ಟೆ ಹೆಚ್.ಎಮ್ ಕಾಂಪ್ಲೆಕ್ಸ್ದ ಮುತ್ತೂಟ್ ಪೈನಾನ್ಸ್ ಕಚೇರಿದ ಕುದುಬಾಕಿಲ್ದ ಸೈರನ್ ಹೂಟರ್ದ ಕೇಬಲ್ನ್ ಮೂರ್ದ್ ಪೈನಾನ್ಸ್ ಕಂಪೆನಿಡ್ ಕಲ್ವೆರ್ ಕಂಡ್ಯೆರ ತೂತೆರ್. ಈ ಪ್ರಕರಣೊಗು ಸಂಬಂಧಿತ್ದ್ ಕೊಣಾಜೆ ಪೊಲೀಸ್ ಸ್ಟೇಶನ್ಡ್ ಮೊ ನಂ: 42/2025 ಕಲಂ: 331[40], 305, 62, 13 BNS ದ ಪ್ರಕಾರ ಪ್ರಕರಣ ದಾಕಲಾದಿತ್ತ್ಂಡ್.
ಈ ಪ್ರಕರಣೊಡು ಕೇರಳ ಇಡುಕ್ಕಿ ಮೂಲೊದ ಮುರಳಿ ಬೊಕ್ಕ ಕಾಂಞಿಗಾಡ್ದ ಆರ್ಷದ್ ಪನ್ಪಿನಕುಲು ದುಂಬೇ ಅರೆಸ್ಟ್ ಆತೆರ್. ಈ ಪ್ರಕರಣೊಡು ತಿಕ್ಕಂದೆ ದೆಂಗ್ತಪ್ಪಾದಿತ್ತಿನ ಅಂಚೆನೇ ರಾಜಧಾನಿ ಜುವೆಲ್ಲರಿ ಶಾಪ್ ಕಲ್ವೆ ಬೊಕ್ಕ ಕೇರಳ ರಾಜ್ಯೊದ ವಿಜಯ ಬ್ಯಾಂಕ್ ಕಲ್ವೆದ ಮೈನ್ ಪ್ಲಾನರ್ ಅಬ್ದುಲ್ ಲತೀಫ್ @ ಲತೀಫ್ (47) ನ್ ಪೊಲೀಸೆರ್ ಕೈದ್ ಮಲ್ತ್ದೆರ್.
ಅಬ್ದುಲ್ ಲತೀಫ್ @ ಲತೀಫ್ ದುಂಬು ಕೇರಳ ರಾಜ್ಯೊದ ಪೊಸದುರ್ಗ ಪೊಲೀಸ್ ಸ್ಟೇಶನ್ ಸೀಮೆದ ರಾಜಧಾನಿ ಜುವೆಲ್ಲರಿ ಶಾಪ್ದ ಸುಮಾರ್ 20 ಕೆಜಿದಾತ್ ಬಂಗಾರ್ ಕಂಡಿನ ಪ್ರಕರಣ ಬೊಕ್ಕ ಕೇರಳ ರಾಜ್ಯೊದ ಚಂದೇರ್ ಪೊಲೀಸ್ ಸ್ಟೇಶನ್ ಸೀಮೆದ ಚೆರವತ್ತೂರು ವಿಜಯ ಬ್ಯಾಂಕ್ದ ಸುಮಾರ್ 15.80 ಕೆಜಿದಾತ್ ಬಂಗಾರ್ ಬೊಕ್ಕ 2.5 ಲಕ್ಷ ರೂ. ಕಾಸ್ ಕಂಡಿನ ಪ್ರಕರಣೊಲೆಡ್ ಪ್ರಮುಖ ಆರೋಪಿ ಆದುಲ್ಲೆ.