ರಾಜ್ಯ ಸರ್ಕಾರೊದ ‘ದ್ವಿಭಾಷಾ ನೀತಿ’; ಮೂಜನೇ ಭಾಷೆ ಆದ್ ಕಲ್ತೊಂದುಪ್ಪುನ ತುಳು ಭಾಷೆಗ್ ಟಾಟಾ ಬೈಬೈ??

Last updated on August 21st, 2025 at 12:56 pm

ಕುಡ್ಲ, ಆ. 21: ಕರ್ನಾಟಕ ರಾಜ್ಯೊಡು ‘ದ್ವಿಭಾಷಾ ಶಿಕ್ಷಣ ನೀತಿ’ ಜಾರಿ ಮಲ್ಪೊಡು ಪನ್ಪಿನ  ಕಾಯೆಸ್ ಕೇನ್ದ್ ಬರೊಂದುಂಡು, ಅಂಚೆನೇ ಸರಕಾರೊಲಾ ಈ ಬಗೆಟ್ ಪ್ರಪೋಸಲ್ ರೆಡಿ ಮಲ್ದ್ಂಡ್. ಆಂಡ ಆಡಳಿತ ಮಟ್ಟೊದ ಈ ಬುಲೆಚ್ಚಿಲ್ ತುಳುನಾಡ್‌ಡ್ ತುಳು ಭಾಷೆ ಕಲ್ಪಾವೊಂದುಪ್ಪುನ ಟೀಚರ್‌ನಕಲೆಗ್ ಮಂಡೆಬೆಚ್ಚ ಉಂಡು ಮಲ್ದ್ಂಡ್.

ತುಳು ಭಾಷೆ ಕಲ್ಪಾವುನಕ್ಲೆಗ್ ಸಂಬಳದ ಸಮಸ್ಯೆರ್ದಾವರ ವರ್ಸ ಪೋಯಿಲೆಕನೆ ತುಳುನು ಮೂಜನೇ ಭಾಷೆ ಆದ್ ಕಲ್ಪಾವೊಂದುಪ್ಪುನ ಶಾಲೆಲೆನ ಸಂಖ್ಯೆಲಾ ಕಮ್ಮಿ ಆತ್ಂಡ್. ಇತ್ತೆ ತುಳುನಾಡ ರಡ್ಡ್ ಜಿಲ್ಲೆಲೆಡ್ ಒಟ್ಟು ಕಾಲಿ 35 ಶಾಲೆಲೆಡ್ ತುಳು ಕಲ್ಪಾವೆರ್ ಅವುಲಾ ತೃತೀಯ ಭಾಷೆ ಆದ್.

ಇತ್ತೆ ಶಿಕ್ಷಣೊಡು ದ್ವಿಭಾಷಾ ನೀತಿರ್ದಾವರ ಮಾತೃಭಾಷೆದ ಶಿಕ್ಷಣೊರ್ದು ದೂರ ಇತ್ತಿನ ತುಳುವ ಜೋಕುಲು ಅಲಕ್ಕ ತುಳು ಶಿಕ್ಷಣೊರ್ದು ಕಡಿದ್ ಪೋಪುನತ್ತಂದೆ ತುಳು ಕಲ್ಪಾವುನ ಟೀಚರ್‌ನಕುಲ್ಲಾ ಬೇಲೆ ಕಲೆವೊನುನ ಪೋಡಿಗೆಡ್ ಉಲ್ಲೆರ್. ಉಂದೆತ ವಿರುದ್ಧ ಸಾಮಾಜಿಕ ಬಲೆತ್ತಾನೊಡು ಸೊರ ದೆರ್ತೊಂದಿತ್ತೆರ್ನ್ಡಲಾ, ಈ ಸೊರ ಸರಕಾರೊಗು ನನಲ ಎತ್ತ್‌ದಿಜಿ.  ‘ತುಳುಭಾಷೆಯ ಶಿಕ್ಷಣದ ಹಕ್ಕು ಹರಣ’ ಪನ್ಪಿ ಪುದರ್‌ಡ್ ಅಭಿಯಾನೊಲಾ ಸುರು ಆತ್ಂಡ್.

ಇತ್ತೆಗ್ ತುಳು ಭಾಷೆ ಕಲ್ಪಾವುನೆತ ಬಗೆಟ್ ಸರಕಾರ ದಾಲ ಪಾತೆರ ಪನ್ತಿಜಿಂಡಲಾ ದ್ವಿಭಾಷಾ ನೀತಿದ ಪ್ರಕಾರ ತುಳು ಭಾಷೆ ಶಿಕ್ಷಣೊರ್ದು ದೂರ ಆಪಿನ ಮಾತಾ ಸಾಧ್ಯತೆ ಉಂಡು. ಯುನೆಸ್ಕೋದ ಅರಿದ್ ಪೋಪುನ ಪೋಡಿಗೆಡ್ ಇಪ್ಪುನ ಭಾಷೆಲೆಡ್ ಒಂಜಾಯಿನ ತುಳುನು ಶಿಕ್ಷಣೊರ್ದು ದೂರ ದೀಡ್ಂಡ ಅವು ಕುಡ ಅರಿದ್ ಪೋಪುನ ಸಾದಿಗೇ ಬೂರುನತ್ತಂದೆ ಒರಿಪುದ ಸಾದಿಗ್ ಬರ್ಪುನ ಬಂಙ. ಸರ್ಕಾರ ಈ ವಿಷಯದ ಮಿತ್ತ್ ಗೇನ ಕೊರ್ದು ತುಳುನಾಡ್‌ದ ಭಾಷೆ, ಸಂಸ್ಕೃತಿದ ಒರಿಪುಗು ಶಿಕ್ಷಣೊಡು ತುಳು ಭಾಷೆನ್ ಒರಿತೊನುನಂಚಿ ತೂಪುಂಡಾ ಪನ್ದ್ ನನ ಕಾತ್‌ದ್ ತೂವೊಡಾತೆ.

“ಗ್ರಾಮ ಪಂಚಾಯತ್ ಸಭೆಟ್ ತುಳು ಪಾತೆರ್ಯೆರೆ ಬಲ್ಲಿ ಪನ್ದ್ ಸುತ್ತೋಲೆ, ತುಳು ಲಿಪಿ ಇತ್ತಿನ ಪುದರ್ ಪಲವೆಲೆನ್ ದೆಪ್ಪೆರೆ ಸೂಚನೆ, ತುಳು ಭಾಷೆ ಅಧಿಕೃತ ಮಲ್ಪೆರೆ ಇಜ್ಜಂದಿನ ನಾಟಕ, ಜಿಲ್ಲೆದ ಪುದರ್ ಪಗಪುನೆಕ್ ಅಡ್ಡ ಕಾರ್, ತುಳು ಶಾಸನ & ತಾಡವೋಲೆಲೆನ ರಕ್ಷಣೆಗ್ ನಾಮಾಸ್, ತುಳು ಕೋಟಾ ಕ್ಯಾನ್ಸಲ್, ತುಳು ಸಂಸ್ಕೃತಿಗ್ ಅವಮಾನ ಇಂಚ ಏತ್ ಪನ್ಡಲಾ ಮುಗಿಯಂದಿನಾತ್ ಅನ್ಯಾಯ ತುಳುಕು ಆತ್ಂಡ್, ಇತ್ತೆ ಶಿಕ್ಷಣೊರ್ದ್ ತುಳುನು ದೆತ್ತ್‌ ದಕ್ಯೆರ ಪುನೆಪು ಬರೊಂದುಲ್ಲೆರ್. ತುಳುವ ಜೋಕುಲೆಗ್ ತುಳುತ ಮಿತ್ತ್, ತುಳು ಸಂಸ್ಕೃತಿದ ಮಿತ್ತ್, ತುಳು ಸಾಹಿತ್ಯದ ಮಿತ್ತ್ ಪೆರ್ಮೆ ಉಂಡು ಮಲ್ತ್‌ದ್ ತುಳು ಐಡೆಂಟಿಟಿನ್ ಒರಿತೊನರೆ ಇತ್ತಿನ ಗಟ್ಟಿಸಾದಿನೇ ಇನಿ ಇಜ್ಜಂದಿಲೆಕ ಮಲ್ಪೆರೆ ಪಿದಡ್ದೆರ್. ಉಂದೆನ್ ತುಳುವೆರಾಯಿನ ನಮ ವಿರೋಧ ಮಲ್ಪೊಡು. ತುಳುನು ಇತ್ತಿಲೆಕ ತೃತೀಯ ಭಾಷೆ ಅತ್ತ್ಂಡ ಮಾತೃಭಾಷೆದ ಲೆಕ್ಕೊಡು ಪ್ರಥಮ ಭಾಷೆ ಆದ್ ಕಲ್ಪಾವೊಡು ಪನ್ದ್ ರಾಜ್ಯ ಶಿಕ್ಷಣ ಇಲಾಖೆಗ್ ಒತ್ತಾಯ ಮಲ್ಪೊಡು” ಪನ್ದ್ ತುಳು ಸಾಂಸ್ಕೃತಿಕ ಸಂಶೋಧನಾ ಪ್ರತಿಷ್ಠಾನೊದ ಗುರ್ಕಾರ್ಲು ನಿಶ್ಚಿತ್ ರಾಮಕುಂಜ ಪನ್ಡೆರ್.