ಸೌಂಡ್‌ಬಾಕ್ಸ್ ಗಲಕೆ: ವಿನಾಯಿತಿ ಕೊರ್ಯೆರೆ ತುಳು ನಾಟಕ ಕಲಾವಿದೆರೆನ ಒಕ್ಕೂಟೊದ ಕಾಯೆಸ್

Last updated on August 24th, 2025 at 12:11 pm

ಕುಡ್ಲ, ಆ. 24: ಕಾರ್ಯಕ್ರಮೊಲೆನ್ ರಾತ್ರೆ 11 ಗಂಟೆಗ್ ಮುಗಿಪೊಡು ಅಂಚೆನೇ ಸೌಂಡ್‌ಬಾಕ್ಸ್‌ದ ಶಬ್ದೊದ ಪ್ರಮಾಣೊನು 50-65 ಡೆಸಿಬಲ್‌ದ ಅಂಕೆಡ್ ದೀವೊಡು ಪನ್ದ್ ಜಿಲ್ಲಾಡಳಿತ ಪಿದಡ್ಪಾದಿನ ಆದೇಶೊರ್ದು ನಾಟಕೊಲೆಗ್ ವಿನಾಯಿತಿ ಕೊರೊಡು ಪನ್ದ್ ತುಳುನಾಟಕ ಕಲಾವಿದೆರೆನ ಒಕ್ಕೂಟ ಒತ್ತಾಯ ಮಲ್ದ್ಂಡ್.

ಶನಿವಾರ ಪತ್ರಿಕಾಗೋಷ್ಠಿಡ್ ಪಾತೆರ್ನ ಒಕ್ಕೂಟೊದ ಪ್ರಧಾನ ಕಾರ್ಯಂತೆರ್ ಲಕ್ಷ್ಮಣ ಕುಮಾರ್ ಮಲ್ಲೂರು, ತುಳುನಾಡ್‌ಡ್ 75ರ್ದ್‌ಲಾ ಎಚ್ಚ ನಾಟಕ ಕೂಟೋಲು, 3 ಸಾರೊರ್ದು ಎಚ್ಚ ಕಲಾವಿದೆರ್, ತಂತ್ರಜ್ಞೆರ್, ಸಂಗೀತಗಾರೆರ್, ಮೇಕಪ್, ಕೊರಿಯೋಗ್ರಫಿ ಇಂಚಿನ ನಾಟಕೊಗು ಸಂಬಂಧಿತಿನ ಬೇಲೆಲೆನ್ ನಂಬುದು ಬದ್‌ಕ್ ಕಟ್ಟೊಂದಿನಕುಲು ಉಲ್ಲೆರ್. ನನ ಬರ್ಪಿನ ಚೌತಿರ್ದ್ ಪತ್ತ್‌ದ್ ಬರ್ಪಿ ಮೇ ತಿಂಗೊಲು ಮುಟ್ಟ ಬುಡಂದೆ ನಾಟಕ ಪ್ರದರ್ಶನ ಆಪುಂಡು. ನಾಟಕ, ಯಕ್ಷಗಾನ, ಸಂಗೀತ ಕಾರ್ಯಕ್ರಮೊಲು, ನೃತ್ಯ ಪ್ರದರ್ಶನೊಲು ಬೊಕ್ಕ ಬೇತೆ ಸಾಂಸ್ಕೃತಿಕ ಕಾರ್ಯಕ್ರಮೊಲೆಗ್ ಸೌಂಡ್ ಬಾಕ್ಸ್ ಬಾರೀ ಮುಖ್ಯ. ಆಂಡ ದಕ್ಷಿಣ ಕನ್ನಡ ಜಿಲ್ಲಾಡಳಿತ ಬೇತೆ ವಾ ಜಿಲ್ಲೆಡ್ಲಾ ಇಜ್ಜಂದಿನ ನಿರ್ಬಂಧೊಲೆನ್ ಪಾಡೊಂದುಂಡು. ಇತ್ತೆನೇ ಪಾಕ ನೋಟೀಸ್ ಕೊರ್ತೆರ್. ಸೌಂಡ್ಸ್‌ದಕ್ಲೆನ ಸೊತ್ತುಲೆನ್ ವಶೊಕು ಗೆತೊಂದು ಕೇಸ್ ಪಾಡ್ದೆರ್. ಉಂದೆರ್ದಾವರ ಸಾಂಸ್ಕೃತಿಕ ಕಾರ್ಯಕ್ರಮೊಲೆಗ್ ಸೌಂಡ್ ಬಾಕ್ಸ್ ಪಾಡ್ಯೆರ ಎದುರು ಪಿರ ತೂವೊಂದುಲ್ಲೆರ್. ನಾಟಕ ಕೂಟೋಲುಲಾ ಅಂಚಿಲತ್ತ್ ಇಂಚಿಲತ್ತ್ ಪನ್ಪಿನ ಸ್ಥಿತಿಕ್ ಬೈದ. ಅಂಚಾದ್ ಕಲಾವಿದೆರೆನ ಹಿತದೃಷ್ಟಿಡ್ ವಿನಾಯಿತಿ ಕೊರೊಡು. ದ.ಕ ಜಿಲ್ಲಾ ಧ್ವನಿವರ್ಧಕ ಬೊಕ್ಕ ದೀಪಾಲಂಕಾರ ಸಂಘೊದಕುಲೆನ  ಪೊರ್ಮ್ಬಾಟೊಗು ಪತ್ತ ಬೆರಿತಾಂಗ್ ಕೊರ್ಪ ಪನ್ದ್ ಪನ್ಡೆರ್.

ನಿರ್ದೇಶಕೆ ವಿಜಯಕುಮಾರ್ ಕೊಡಿಯಾಲ್‌ಬೈಲ್, ನಟೆ ದೇವದಾಸ್ ಕಾಪಿಕಾಡ್ ಪಾತೆರ್ಯೆರ್. ಕೋಸ್ಟಲ್‌ವುಡ್ ಕಲಾವಿದೆರೆನ ಬೊಕ್ಕ ತಂತ್ರಜ್ಞೆರೆನ ಸಹಕಾರಿ ಒಕ್ಕೂಟ ಅಧ್ಯಕ್ಷೆ ಲಂಚುಲಾಲ್, ತುಳು ನಾಟಕ ಕಲಾವಿದೆರೆನ ಒಕ್ಕೂಟ ಉಪಾಧ್ಯಕ್ಷೆ ಗೋಕುಲ್ ಕದ್ರಿ ಒತ್ತುಪಾಲಿತ್ತೆರ್‌.