Last updated on September 4th, 2025 at 12:26 pm
ಬೊಲ್ತೇರ್: ಪುನ ಕೌಂತಿನ ಪ್ರಕರಣೊ ಬೊಕ್ಕ ಸುಜಾತಾ ಭಟ್ ಬಗೆತ ಸುಳ್ಳು ಪ್ರಕರಣೊಲೆನ ವಿಡಿಯೋ ಮಲ್ತ್ ಪ್ರಸಾರ ಮಲ್ತಿತ್ತಿನ ಯೂಟ್ಯೂಬರ್ ಅಭಿಷೇಕ್ನ್ ಎಸ್.ಐ.ಟಿ ಅಧಿಕಾರಿಲು ಕೋಡೆ (ಸೆ.3, ಬುಧವಾರ) ರಾತ್ರೆ ಇಡೀ ವಿಚಾರಣೆ ಮಲ್ತ್ದೆರ್.
ಬೊಲ್ತೇರ್ ಎಸ್.ಐ.ಟಿ ಕಚೇರಿಗ್ ಸೆ.3 ತಾನಿ ಬಯ್ಯಡ್ ವಿಚಾರಣೆಗ್ ದಾಖಲೆಲೆನ ಒಟ್ಟುಗು ಬತ್ತಿತ್ತಿನ ಯೂಟ್ಯೂಬರ್ ಅಭಿಷೇಕ್ ಗ್ ಸೆ.4 ತ ಪುಲ್ಯ ಮುಟ್ಟ ತನಿಖಾಧಿಕಾರಿ ಜಿತೇಂದ್ರ ಕುಮಾರ್ ದಯಾಮ ವಿಚಾರಣೆ ಮಲ್ತ್ದೆರ್. ಎಸ್.ಐ.ಟಿ ವಶೊಟುಪ್ಪುನ ಅಭಿಷೇಕ್ನ ಇನಿ ಸೆ.4 ತ ಗುರುವಾರಲಾ ವಿಚಾರಣೆ ನಡಪರೆಗುಂಡು.
ಎಲುಕು ಬೋಡಾದ್ ಜಯಂತ್ ಟಿ. ನ ಒಟ್ಟುಗು ಸೇರ್ದ್ ಅಭಿಷೇಕ್ ಧರ್ಮಸ್ಥಳದ ಬಂಗ್ಲೆಗುಡ್ಡೆಡ್ ರಾತ್ರೆ ಇಡೀ ನಾಡ್ದಿತ್ತೆರ್. ಆತೇ ಅತ್ತಂದೆ ಅವೆತ ವಿಡಿಯೋ ರೆಕಾರ್ಡ್ಲಾ ಮಲ್ತಿತ್ತೆರ್. ಅಂಚಾದ್ ಆಯನ ಮಿತ್ತ್ ಒಯಿಲ್ ದಾಕಲಾದಿತ್ತ್ಂಡ್. ಆ ಬಗೆಟೇ ತೀವ್ರ ವಿಚಾರಣೆ ಮಲ್ತ್ದೆರ್.
ಸುಜಾತಾ ಭಟ್ ತನ್ನ ಮಗಲ್ ಅನನ್ಯಾ ಭಟ್ ಧರ್ಮಸ್ಥಳಡ್ ಕಾಣೆ ಆತಲ್ ಪನ್ದ್ ಒಯಿಲ್ ಬರೆಪಾದಿತ್ತೆರ್. ಉಂದಾದ್ ಒಂತೆ ದಿನೊಟೇ ಮಾಧ್ಯಮೊಲು ಉಂದೆತ ಬೆರಿ ಪತ್ತ್ದ್, ಪ್ರಕರಣ ಸುಳ್ಳು ಪನ್ದ್ ಒತ್ತೊನುನ ಮುಕೇನ ಪ್ರಕರಣೊಗು ಟ್ರಸ್ಟ್ ತಿಕ್ಕ್ದಿತ್ತ್ಂಡ್. ಈ ಪೊರ್ತುಡು ಅಭಿಷೇಕ್, ಸುಜಾತಾ ಭಟ್ನ ಇಲ್ಲಡೇ ಇತ್ತ್ದ್ ಉಂದು ಮಾತ ಸುಳ್ಳು, ಎನನ್ ಒತ್ತಾಯೊಡು ಅಂಚ ಪನ್ಪಾದೆರ್ ಪನ್ದ್ ಉಲ್ಟಾ ಆಕ್ದಿತ್ತೆರ್. ಈ ಬಗೆಟ್ಲಾ ಮಲ್ಲ ಒಲವು ತಿಕ್ಕ್ದ್ಂಡ್ ಪನ್ದ್ ವರದಿ ಆತ್ಂಡ್.
ಈತೇ ಅತ್ತಂದೆ ಎಸ್ಐಟಿ ಚಿನ್ನಯನ್ ವಶೊಕು ಗೆತೊಂಡಿ ಬೊಕ್ಕ ಚಿನ್ನಯ್ಯನ ಮಾಸ್ಕ್ ದಾಂತಿನ ಸಂದರ್ಶನ ಮಲ್ತಿನ ವಿಡಿಯೋಲಾ ಪ್ರಸಾರ ಮಲ್ತಿತ್ತೆರ್. ಅಂಚಾದ್ ಯೂಟ್ಯೂಬರ್ ಅಭಿಷೇಕ್ಲಾ ಷಡ್ಯಂತ್ರೊದ ಭಾಗೊನಾ ಪನ್ಪಿನೆತ ವಿಚಾರವಾದ್ ಜಡ್ತೆ ಮಲ್ಪುನ ಸಾಧ್ಯತೆ ಉಂಡು.