Last updated on September 12th, 2025 at 02:06 pm
ಒಡಿಪು, ಸೆ. 12: ಮದಿಮೆ ಆಪುಜಿ ಪನ್ಡ್ದ್ ನಂಬರ್ ಬ್ಲಾಕ್ ಮಲ್ತಿನೆಕ್ ಪಿಸ್ರಾಯಿನ ಜವನೆ ಪೊಣ್ಣಗ್ ಬೀಸತ್ತಿ ಪಾಡ್ದ್ ಗಾತಿದ ಗಡಿಮಲ್ದಿನ ನಡಕೆ ಬೆರ್ಮಾವರ ತಾಲೂಕ್ದ ಕೊಕ್ಕರ್ಣೆಡ್ ನಡತ್ದ್ಂಡ್.
ಪೊಣ್ಣು ರಕ್ಷಿತಾ ಪೂಜಾರಿ( 24) ಗ್ ಗಾತಿದ ಗಡಿಕುಲಾದಿತ್ತ್ದ್, ಮಣಿಪಾಲಡ್ ಪ್ರೈವೇಟ್ ಆಸ್ಪತ್ರೆಗ್ ದಾಕಲ್ತ್ದೆರ್. ಬೀಸತ್ತಿ ಪಾಡ್ದಿನ ಆರೋಪಿನ್ ಕಾರ್ತಿಕ್ ಪನ್ದ್ ಗುರ್ತ ಪತ್ತ್ದಿತ್ತ್ದ್, ಆಯೆ ಬೀಸತ್ತಿ ಪಾಡ್ದ್ ಪದ್ರಾಡಾತೆ.
ಕಾರ್ತಿಕ್ ರಕ್ಷಿತಾನ್ ಮೋಕೆ ಮಲ್ತೊಂದಿತ್ತ್ದ್, ಮದಿಮೆ ಆವೊಡು ಪನ್ದ್ ಪಾಕ ಸಮೆರ್ದಿಂಚಿ ಒತ್ತಾಯ ಮಲ್ತೊಂದಿತ್ತೆ. ಆಲೆನ ಇಲ್ಲಡ್ ಉಂದೆಕ್ ಒಪ್ಪಂದಿನೆರ್ದಾವರ ಇರ್ವೆರೆಗ್ ಲಡಯಿ ಆಪೆದ್ಂಡ್. ಇನಿ ರಕ್ಷಿತಾನ ಪುಟ್ಟಿನ ದಿನ ಆದಿತ್ತ್ದ್, ಇಲ್ಲಡ್ ಮದಿಮೆಗ್ ಆಕ್ಷೇಪ ಬತ್ತಿನೆರ್ದಾವರ, ಕಾರ್ತಿಕ್ನ ನಂಬರ್ ನ್ ಬ್ಲಾಕ್ ಮಲ್ತಿತ್ತಲ್. ರಕ್ಷಿತಾ, ಇನಿ ಕಾಂಡೆ ಇಲ್ಲರ್ದ್ ಪಿದಡ್ದ್ ಬಸ್ ಉಂತಡೆದಂಚಿ ಪೋವೊಂದುಪ್ಪುನಗ ಕಾರ್ತಿಕ್ ಬೀಸತ್ತಿ ಪಾಡ್ದೆ. ಗಾತಿದ ಗಡಿಕುಲಾತಿನ ರಕ್ಷಿತಾನ್ ಮಣಿಪಾಲ ಕೆಎಂಸಿ ಆಸ್ಪತ್ರೆಗ್ ದಾಕಲ್ತ್ದೆರ್. ತಿಗಲೆ ಬೊಕ್ಕ ನಾಲಿಗ್ ಗಾತಿದ ಗಡಿಕುಲಾತ ಪನ್ದ್ ತೆರಿದ್ ಬೈದ್ಂಡ್.