Last updated on September 14th, 2025 at 10:20 am
ಕುಡ್ಲ, ಸೆ. 14: ಅಪ್ರಾಪ್ತ ಪ್ರಾಯೊದ ಶಾಲೆಗ್ ಪೋವೊಂದಿತ್ತಿನ ಪೊಣ್ಣನ ಮಿತ್ತ್ ಲೈಂಗಿಕ ದೌರ್ಜನ್ಯ ಮಲ್ತ್ದ್ ಆಲೆನ್ ಕೆರ್ತಿನ ಆರೋಪಿಗ್ ಜಿಲ್ಲಾ ಎಚ್ಚಿಗೆದ ಬೊಕ್ಕ ಸೆಷನ್ಸ್ ನ್ಯಾಯಂತಡೆ ಎಫ್ಟಿಎಸ್ಸಿ–2 (ಪೋಕ್ಸೊ) ಮರಣದಂಡನೆ ಶಿಕ್ಷೆ ಕೊರ್ತುಂಡು. ಬೆಳಗಾವಿ ಜಿಲ್ಲೆ ಸವದತ್ತಿ ತಾಲ್ಲೂಕು ಹಂಚಿನಾಳ ಗ್ರಾಮೊದ ಫಕೀರಪ್ಪ ಹಣಮಪ್ಪ ಮಾದರ (58) ಶಿಕ್ಷೆ ಆತಿನಾಯೆ. ವಸತಿ ಶಾಲೆಡ್ ಒಂಜೆಟ್ 9ನೇ ಕ್ಲಾಸ್ ಓದೊಂದಿತ್ತಿನ ಪೊಣ್ಣು ತೊರ್ತಲ್ ಮುಟ್ಟದ ಸಿದ್ಯಮ್ಮನ ಬಾಡಾಯಿದ ಇಲ್ಲಗ್ ಬತ್ತಿತ್ತಲ್. 2024ತ ಆಗಸ್ಟ್ 6ತಾನಿ ಸಿದ್ಯಪ್ಪೆ ಬೊಕ್ಕ ಸಿದ್ಯಮ್ಮೆ ಪಿದಯಿ ಪೋದುಪ್ಪುನಗ, ಬರಿತ ಇಲ್ಲಡ್ ಬಾಡಾಯಿಗ್ ಇತ್ತಿನ ಫಕೀರಪ್ಪೆ ಅಕ್ರಮವಾದ್ ಇಲ್ಲಗ್ ಪೊಗ್ಗ್ದ್ ದೌರ್ಜನ್ಯ ಮಲ್ತ್ದ್ ನಾಲಿ ಪೊಜೆಂಕ್ದ್ ಕೆರ್ದ್ ಪದ್ರಾಡಾದಿತ್ತೆ.
ಈ ಬಗೆಟ್ ಪಣಂಬೂರು ಸ್ಟೇಶನ್ಡ್ ಪ್ರಕರಣ ದಾಕಲಾದಿತ್ತ್ಂಡ್. ಒಂಜಿ ವರ್ಸೊರ್ದಿಂಚಿ ನ್ಯಾಯಾಂಗ ಕೈದ್ಡ್ ಇತ್ತಿನ ಆರೋಪಿನ ವಿಚಾರಣೆ ಮಲ್ತಿನ ನ್ಯಾಯಾಧೀಶೆ ಕೆ.ಎಸ್ ಮಾನು ಮೇರ್ ಅಪರಾಧ ಸಾಬೀತಾಯಿನೆರ್ದಾವರ ಶಿಕ್ಷೆ ಪ್ರಕಟ ಮಲ್ದೆರ್. ಭಾರತೀಯ ನ್ಯಾಯಸಂಹಿತೆದ (ಬಿಎನ್ಎಸ್) ಕಲಂ 103(1)ತ ಪ್ರಕಾರ ಕೆರ್ತಿನ ಪ್ರಕರಣೊಡು ಆಯಗ್ ಮರಣದಂಡನೆ ಆದಿತ್ತ್ದ್, ಪೋಕ್ಸೊ ಕಾಯ್ದೆದ ಕಲಂ 4(2)ಟ್ ಜೀವಾವಧಿ ಶಿಕ್ಷೆ ಬೊಕ್ಕ ₹ 50 ಸಾವಿರ ದಂಡ ಪಾಡ್ದೆರ್. ಅಕ್ರಮವಾದ್ ಇಲ್ಲದುಲಯಿ ಪೊಗ್ಗಿನೆಕ್ ಬಿಎನ್ಎಸ್ದ ಕಲಂ 332 (ಎ) ಪ್ರಕಾರ ಜೀವಾವಧಿ ಶಿಕ್ಷೆ ಬೊಕ್ಕ ₹ 5 ಸಾವಿರ ದಂಡ ಪಾಡ್ದೆರ್. ಸೈದಿನ ಪೊಣ್ಣನ ಇಲ್ಲದಕ್ಲೆಗ್ ₹1 ಲಕ್ಷ ರೂಪಾಯಿ ಕೊರ್ಯೆರ ಆದೇಶ ಮಲ್ತಿತ್ತ್ದ್, ಜಿಲ್ಲಾ ಕಾನೂನು ಸೇವೆಲೆನ ಪ್ರಾಧಿಕಾರ ₹ 4 ಲಕ್ಷ ಪರಿಹಾರ ಕೊರೊಡು ಪನ್ದ್ಲಾ ಸೂಚನೆ ಕೊರ್ತೆರ್. ಪಣಂಬೂರು ಸ್ಟೇಶನ್ದ ಇನ್ಸ್ಪೆಕ್ಟರ್ ಮೊಹಮ್ಮದ್ ಸಲೀಂ ಅಬ್ಬಾಸ್ ದೋಷಾರೋಪ ಪಟ್ಟಿ ಸಂದಾದಿತ್ತ್ದ್ ವಿಶೇಷ ಪಬ್ಲಿಕ್ ಪ್ರಾಸಿಕ್ಯೂಟರ್ ಸಹನಾ ದೇವಿ ಬೋಳೂರು ವಾದ ಮಂಡನೆ ಮಲ್ತೆರ್.
ಅಪ್ರಾಪ್ತ ಪೊಣ್ಣನ್ ಕೆರ್ತಿನೆತ ದುಂಬುನಾನಿ, ಆಲ್ ಬರಿತಿಲ್ಲದ ಪೊಂಜೊವು ಒರ್ತಿನ ಫೋನ್ರ್ದ್ ತನ್ನ ಅಪ್ಪೆಗ್ ಕಾಲ್ ಮಲ್ತ್ದ್ ಜ್ವರ ಇತ್ತಿನ ಬಗೆಟ್ ಪನ್ದಿತ್ತಲ್. ಮನದಾನಿ ಅಪ್ಪೆ ಕಾಲ್ ಮಲ್ತ್ದ್, ಮಗಲೆಗ್ ಫೋನ್ ಕೊರ್ಯೆರ ಪನ್ದಿತ್ತೆರ್. ಪೊಂಜೊವು ಕುಡೊರ್ತಿ ಪೊಂಜೊವುನೊಟ್ಟುಗು ಪೊಣ್ಣು ಇತ್ತಿನ ಇಲ್ಲಡೆ ಬನ್ನಗ ಆರೋಪಿ ಫಕೀರಪ್ಪೆ ಲೈಂಗಿಕ ದೌರ್ಜನ್ಯ ಮಲ್ತ್ದ್ ಕೆರ್ತಿನೆವು ತೋಜಿದ್ ಬೈದಿತ್ತ್ಂಡ್. ಉಂದೆನ್ ತೂದು ಪೊಂಜೊವುಲು ಪೋಡಿದ್ ಪೋತೆರ್, ಆರೋಪಿ ಈ ವಿಷಯ ಏರೆಗ್ಲಾ ಪನಂದಿಲೆಕ ಅಕಲೆನ್ ಪೋಡಿಕಟ್ಟಾದ್ ಅಲ್ಪರ್ದ್ ಪೋದಿತ್ತೆ. ಕೋರ್ಟ್ ವಿಚಾರಣೆದ ಪೊರ್ತುಡು ಇರ್ವೆರ್ ಪೊಂಜೊವುಲು ನಡಕೆದ ಪ್ರತ್ಯಕ್ಷ ಸಾಕ್ಷಿ ಪನ್ತಿನವು ಪ್ರಮುಖ ಆದಿತ್ತ್ಂಡ್. ಆರೋಪಿನ ಕುಂಟುಡಿತ್ತಿನ ನೆತ್ತೆರ್ ಬೊಕ್ಕ ಪೊಣ್ಣನ ನೆತ್ತೆರ್ ದ ಸ್ಯಾಂಪಲ್ ಒಂಜೇ ಲೆಕ ಇತ್ತ್ಂಡ್. ಪೊಣ್ಣನ ಮೋನೆಡಿತ್ತಿನ ತುಚ್ಚಿನ ಗಡಿತ ಗುರ್ತ ಬೊಕ್ಕ ಆರೋಪಿನ ಪರುತ ಚಹರೆ ಒಂಬೊಂದಿತ್ತ್ಂಡ್.