Last updated on September 13th, 2025 at 01:27 pm
ಒಡಿಪು: ಬೆರ್ಮಾವರ ತಾಲೂಕ್ದ ಕೊಕ್ಕರ್ಣೆಡ್ ಕೋಡೆ (ಸೆ.12) ಮದಿಮೆಗ್ ನಿರಾಕರಿತಿನೆಕ್ ಜವನೆ ಒರಿ ಪೊಣ್ಣಗೊರ್ತಿಗ್ ಬೀಸತ್ತಿ ಪಾಡ್ದಿತ್ತ್ದ್, ಆಲ್ ಮರ್ದ್ ಪಲಿಪಂದೆ ತೀರ್ದಲ್. ಬೀಸತ್ತಿ ಪಾಡ್ದಿನ ಆರೋಪಿನ ಪುನ ಪೊಣ್ಣನ ಇಲ್ಲದ ಉಗ್ಗೆಲ್ಡ್ ತಿಕ್ಕ್ದ್ಂಡ್.
ತೀರ್ದಿನ ಪೊಣ್ಣು ಕೊಕ್ಕರ್ಣೆ ಚೆಗ್ರಿಬೆಟ್ಟು ನಿವಾಸಿ ರಕ್ಷಿತಾ (24) ಆದಿತ್ತ್ದ್, ಆಲೆನ ನೆರೆಕರೆತ ಜವನೆ ಕಾರ್ತಿಕ್ ಪೂಜಾರಿ ಪನ್ಪಿನಾಯೆ ಬೀಸತ್ತಿ ಪಾಡ್ದ್ ಪದ್ರಾಡಾದಿತ್ತೆ. ಬಯ್ಯದ ಪೊರ್ತುಡು ಉತಯಗ್ಗೆಲ್ಡ್ ಪುನ ಆದ್ ತಿಕ್ಕ್ದಿತ್ತ್ದ್, ಆತ್ಮಹತ್ಯೆ ಮಲ್ತೊಂದಿಪ್ಪುನ ಸಾಧ್ಯತೆ ಉಂಡು.
ಮೋಕೆದ ವಿಚಾರೊಡು ಈ ನಡಕೆ ನಡತ್ದ್ಂಡ್ ಪನ್ದ್ ಪನೊಂದುಲ್ಲೆರ್. ಆರೋಪಿ ರಕ್ಷಿತಾ ನ್ ಮದಿಮೆ ಆವೊಡು ಪನ್ದ್ ಇತ್ತೆ. ಆಂಡ ಪೊಣ್ಣನ ಇಲ್ಲದಕುಲು ಒತ್ತೊಂದಿಜ್ಜಂಡ್. ರಕ್ಷಿತಾಲಾ ಆಯನ್ ಬ್ಲಾಕ್ ಮಲ್ತಿತ್ತಲ್. ಅಂಚಾದ್ ಪಿಸ್ರ್ಡ್ ಕಾರ್ತಿಕ್, ರಕ್ಷಿತಾ ಕೋಡೆ ಕಾಂಡೆ ಬೇಲೆಗ್ ಪೋವೊಂದುಪ್ಪುನಗ ಬತ್ತ್ದ್ ಬೀಸತ್ತಿ ಪಾಡ್ದೆ. ಆಲೆನ ಪುಟ್ಟಿನ ದಿನೊತಾನಿಯೇ ಆಲೆನ ನಾಲಿ ಬೊಕ್ಕ ತಿಗಲೆಗ್ ಬೀಸತ್ತಿ ಪಾಡ್ದೆ. ಗಾತಿದ ಗಡಿಕುಲಾದ್ ರಕ್ಷಿತಾ ಅಲ್ಪನೇ ಕುಸ್ಕ್ದ್ ಬೂರ್ದಲ್, ಅಪಗನೇ ಮಣಿಪಾಲದ ಪ್ರೈವೇಟ್ ಆಸ್ಪತ್ರೆಗ್ ದಾಕಲ್ತ್ದೆರ್. ಮರ್ದ್ ಪಲಿಪಂದೆ ತೀರ್ದಲ್.
ಬೆರ್ಮಾವರ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್, ಪೊಲೀಸ್ ಅಧಿಕಾರಿಗಳು ಜಾಗೆಗ್ ಬತ್ತ್ದ್ ಪರಿಶೀಲನೆ ಮಲ್ತ್ದ್ ಜಡ್ತೆ ಮಲ್ತೊಂದುಲ್ಲೆರ್.