Last updated on September 19th, 2025 at 09:12 am
ಕುಡ್ಲ, ಸೆ. 18: ಬಂಗ್ಲೆಗುಡ್ಡೆ ಕಾಡ್ಡ್ ಮುರಾನಿ ಪುನ ನಾಡುನ ಕಾರ್ಯಾಚರಣೆದ ಪೊರ್ತುಡು ತಿಕ್ಕಿನ ಎಲ್ಕೊಟೆಲು ಬೊಕ್ಕ ಅವಶೇಷೊಲು ಏರೆನವು ಪನ್ಪಿ ಕೇನ್ಪು ಇತ್ತೆ ಪುಟ್ಟೊಂದಿತ್ತ್ದ್, ಮುರಾನಿ ಪುನ ನಾಡ್ನಗ ಪುನೊಕ್ಲೆನ ಕೈತಲ್ ಒಂಜಿ ಐಡಿ ಕಾರ್ಡ್ ತಿಕ್ಕ್ದಿತ್ತ್ಂಡ್. ಆ ಕಾರ್ಡ್ ಏರೆನವು ಪನ್ಪಿ ಒಲವು ತೆರಿದ್ ಬೈದ್ಂಡ್.
ಬಂಗ್ಲೆಗುಡ್ಡೆಡ್ ತಿಕ್ಕಿನ ಮಂಡೆ ಬೊಕ್ಕ ಎಲ್ಕೊಟೆದ ಕೈತಲ್ ತಿಕ್ಕಿನ ಐಡಿ ಕಾರ್ಡ್ ಕೊಡಗು ಜಿಲ್ಲೆ ವಿರಾಜಪೇಟೆ ತಾಲೂಕ್ದ ಅಯ್ಯಪ್ಪೆ ಪನ್ಪಿನಾರೆನ ಪನ್ದ್ ತೆರಿದ್ ಬೈದ್ಂಡ್. 2017ಟ್ ಮೈಸೂರ್ದ ಆಸ್ಪತ್ರೆಗ್ ಪೋದು ಬರ್ಪೆ ಪನ್ದ್ ಪೋದಿತ್ತಿನ ಅಯ್ಯಪ್ಪೆ, ಆನಿರ್ದ್ ತೋಜಂದೆ ಆದಿತ್ತೆರ್. ಈ ಬಗೆಟ್ ಇಲ್ಲದಕುಲು, ಕುಟ್ಟ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದಿತ್ತೆರ್. ಅಂಚಾದ್ ತಿಕ್ಕಿನ ಎಲ್ಕೊಟೆಲಾ ಅಯ್ಯಪ್ಪೆರೆನವೇ ಆದುಪ್ಪು ಪನ್ಪಿ ಶಂಕೆ ತೋಜಿದ್ ಬೈದ್ಂಡ್.
ಅಯ್ಯಪ್ಪೆ ಕಾಣೆ ಆತಿನ ಬಗೆಟ್ ಆರೆನ ಮಗೆ ಜೀವನ್ ಪನ್ಪಿನಾರ್ ಬರೆಪಾದಿನ ಒಯಿಲ್ದ ಆಧಾರೊಡು 15-06-2017ತಾನಿ ಕುಟ್ಟ ಸ್ಟೇಶನ್ಡ್ ಎಫ್ಐಆರ್ ದಾಕಲಾದಿತ್ತ್ಂಡ್. ಆಸ್ಪತ್ರೆಗ್ ಪನ್ಡ್ದ್ ಕಾಂಡೆ 6 ಗಂಟೆಗ್ ಇಲ್ಲರ್ದ್ ಪಿದಡ್ದಿನ ಅಯ್ಯಪ್ಪೆ, ಕಾಂಡೆ 11.30ರ್ದ್ ಬೊಕ್ಕ ಆರೆನ ಮೊಬೈಲ್ ಸ್ವಿಚ್ ಅಫ್ ಆದಿತ್ತ್ಂಡ್. ಉಂದಾದ್ ಒಂಜಿ ವಾರ ಮುಟ್ಟ ಇಲ್ಲದಕುಲು ನಾಡೊಂದಿತ್ತೆರ್. ಕಡೆಕ್ ಅಯ್ಯಪ್ಪೆರೆನ ಬಗೆಟ್ ದಾಲ ಒಲವು ತಿಕ್ಕಂದೆ ಜೀವನ್ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದೆರ್. ಆಂಡ, ಒಯಿಲ್ ಬರೆಪಾಂಡಲಾ ಅಯ್ಯಪ್ಪೆರೆನ ಬಗೆಟ್ ದಾಲ ಒಲವು ತಿಕ್ಕ್ದಿಜ್ಜಂಡ್. ಇತ್ತೆ ಎಣ್ಮ ವರ್ಸ ಕರಿದ್ ಬಂಗ್ಲೆಗುಡ್ಡೆಡ್ ಅಯ್ಯಪ್ಪೆರೆನ ಐಡಿ ಕಾರ್ಡ್ ತಿಕ್ಕ್ದ್ಂಡ್. ಬಂಗ್ಲೆಗುಡ್ಡೆಡ್ ತಿಕ್ಕಿನ ಈ ಎಲ್ಕೊಟೆ ಮಿತ್ತ್ರ್ದ್ ತೂನಗ ಆತ್ಮಹತ್ಯೆ ಮಲ್ತೊಂದಿನ ಸ್ಥಿತಿಟ್ ಇತ್ತ್ಂಡ್ಗೆ.