Last updated on September 18th, 2025 at 08:52 am
ಕುಡ್ಲ, ಸೆ. 17: ಕಲ್ವ ದಾಕಲೆಲೆನ್ ಉಂಡು ಮಲ್ತ್ದ್ ಅವೆತ ಪುದರ್ಡ್ ಕಂಪೆನಿಲೆನ್ ಉಂಡು ಮಲ್ತೊಂದು ಸ್ಟೇಟ್ ಬ್ಯಾಂಕ್ ರ್ದ್ ಕೋಟಿಗಟ್ಲೆ ಲೋನ್ ಗೆತೊಂದು ಅವೆನ್ ಸ್ವಂತೊಗು ಗಲಸ್ದ್ ದಗೆ ಮಲ್ದಿನ ಆರೋಪಡ್ ಮೂವೆರ್ ಆರೋಪಿಲೆನ್ ಮೂಡಾಯಿ ಕುಡ್ಲ ಸ್ಟೇಶನ್ದ ಪೊಲೀಸೆರ್ ಕೈದ್ ಮಲ್ತ್ದೆರ್. ಕೈದಾತಿನಕಲೆನ್ ಮುನೀರ್ ಕದಮನ್ ಅಬೂಬಕರ್ (53) , ಹುಸೇನ್. ಪಿ (52) , ಮೊಹಮ್ಮದ್ ಮುಸ್ತಾಫ (27) ಪನ್ದ್ ಗುರ್ತ ಪತ್ತ್ದೆರ್.
ಆರೋಪಿಲು ಕಂಪೆನಿ ಓಪನ್ ಮಲ್ತ್ದ್ ಕಲ್ವ ದಾಕಲೆಲೆನ್ ಉಂಡು ಮಲ್ತ್ದ್ ಲೋನ್ ಪುದರ್ಡ್ ಸ್ಟೇಟ್ ಬ್ಯಾಂಕ್ ಇಂಡಿಯಾರ್ದ್ ಕೋಟಿಗಟ್ಲೆ ಲೋನ್ ಗೆತೊಂದೆರ್. ಬೊಕ್ಕ ಬ್ಯಾಂಕ್ ಅಧಿಕಾರಿಲೆನ ಸಕಾಯೊಡು ಆರೋಪಿಲು, ಗೆತೊಂದಿನ ಲೋನ್ದ ಕಾಸ್ನ್ ಬೇತೆ ಬೇತೆ ಅಕೌಂಟ್ಲೆಗ್ ಕಡಪುಡೊಂದು ಸ್ವಂತೊಗು ಗಲಸ್ದೆರ್.
ಸ್ಟೇಟ್ ಬ್ಯಾಂಕ್ ಇಂಡಿಯಾ ಮಲ್ಲಿಕಟ್ಟೆ ಶಾಖೆದ ಬ್ಯಾಂಕ್ರ್ದ್ MSME ಯೋಜನೆದಡಿಟ್ M/s Electro World Enterprises ಸಂಸ್ಥೆ ಕಲ್ವ ದಾಕಲೆಲೆನ್ ಸಂದಾದ್ ಸುಮಾರ್ 1 ಕೋಟಿ 20 ಲಕ್ಷ ರೂ ಕಡ ಮಂಜೂರು ಮಲ್ಪಾವೊಂದು, ಅಂಚೆನೇ M/s M H Enterprises ಸಂಸ್ಥೆ ಕಲ್ವ ದಾಕಲೆಲೆನ್ ಸಂದಾದ್ ಸುಮಾರ್ 1 ಕೋಟಿ 30 ಲಕ್ಷ ರೂ ಕಡ ಮಂಜೂರ್ ಮಲ್ಪಾವೊಂದುಂಡು. ಈ ರಡ್ಡ್ ಕಂಪೆನಿಲು ತನ್ಕುಲು ಗೆತೊಂದಿನ ಲೋನ್ನ್ ಬ್ಯಾಂಕ್ ಅಧಿಕಾರಿಲೆನ ಸಕಾಯೊಡು ಗೆತೊಂದಿನ ಉದ್ದೇಶೊದ ವೈವಾಟ್ಗ್ ಗಲಸಂದೇ ಬೇತೆ ಬ್ಯಾಂಕ್ ಅಕೌಂಟ್ಲೆಗ್ ಕಡಪುಡೊಂದು ಸ್ವಂತೊಗು ಗಲಸೊಂದೆರ್.
ಈ ಬಗೆಟ್ 16-09-2025 ತಾನಿ ಚೀಫ್ ಮಾನ್ಯೇಜರ್, ಎಸ್.ಬಿ.ಐ ಮೇರ್ ಬರೆಪಾದಿನ ಒಯಿಲ್ದ ಪ್ರಕಾರ ಮೂಡಾಯಿ ಕುಡ್ಲ ಸ್ಟೇಶನ್ಡ್ ಅ.ಕ್ರ 130/2025 ಬೊಕ್ಕ 131/2025 ಕಲಂ. 316(2), 316(5), 318(2), 318(3) ಒಟ್ಟುಗು 3(5) ಭಾರತೀಯ ನ್ಯಾಯ ಸಂಹಿತೆ ದ ಪ್ರಕಾರ ರಡ್ಡ್ ಬೇತೆ ಬೇತೆ ಪ್ರಕರಣೊಲು ದಾಕಲಾತ.
ಪ್ರಕರಣೊದ ಜಡ್ತೆ ಮಲ್ತಿನ ಪೊಲೀಸೆರ್ M/s Electro World Enterprises ಸಂಸ್ಥೆದ ದಗೆತ ಪ್ರಮುಖ ಆರೋಪಿ ಮುನೀರ್ ಕದಮನ್ ಅಬೂಬಕರ್ ಬೊಕ್ಕ ಆಯಗ್ ಸಕಾಯ ಮಲ್ದಿನ ಹುಸೇನ್. ಪಿ ಪನ್ಪಿನಾಯನ್ ಪತ್ತ್ದ್, ಕುಡೊಂಜಿ ಪ್ರಕರಣೊಡು M/s M H Enterprises ಸಂಸ್ಥೆದ ದನಿ, ಪ್ರಕರಣೊಡು ಪಾಲ್ಪಡೆದಿತ್ತಿನ ಪ್ರಮುಖ ಆರೋಪಿ ಮೊಹಮ್ಮದ್ ಮುಸ್ತಾಫ ಪನ್ಪಿನಾಯನ್ಲಾ ಪತ್ತ್ದ್ ದಸ್ತಗಿರಿ ಕ್ರಮ ಗೆತೊಂದೆರ್. ಮುನೀರ್ ಕದಮನ್ ಅಬೂಬಕರ್ ಪನ್ಪಿನಾಯೆ ರಡ್ಡ್ ಪ್ರಕರಣೊಲೆಡ್ಲಾ ಪಾಲ್ಪಡೆತೆ ಪನ್ದ್ ಜಡ್ತೆದ ಪೊರ್ತುಡು ತೆರಿದ್ ಬೈದ್ಂಡ್. ರಡ್ಡ್ ಪ್ರಕರಣೊಲೆನ್ಲಾ ನನದ ಜಡ್ತೆಗ್ ಸಿಸಿಬಿ ಕುಡ್ಲ ಘಟಕೊಗು ಕೊರ್ತೆರ್.