Last updated on September 8th, 2025 at 04:14 pm
ಬೆಂಗಳೂರು, ಸೆ. 8: ಮಂಡ್ಯದ ಮದ್ದೂರುದ ರಾಮ್ ರಹೀಮ್ ನಗರೊಡು ಕೋಡೆ, ಐತಾರ ರಾತ್ರೆ ನಡತಿನ ಕಲ್ಲ್ ದಕ್ಕಿನ ಪ್ರಕರಣೊಡು 21 ಮಂದಿ ಮುಸ್ಲಿಮೆರೆನ್ ಕೈದ್ ಮಲ್ತ್ದ. ಪಲ್ಲಿದ ಕಡೆರ್ದ್ 2 ಕಲ್ಲ್ಲೆನ್ ದಕ್ಕಿನ ಬಗೆಟ್ ಒಲವು ಉಂಡು. ಅಪಗನೇ ಕ್ರಮ ಗೆತೊಂದ. ಆಂಡಲಾ ಬಿಜೆಪಿ ಬೊಕ್ಕ ಜೆಡಿಎಸ್ದಕುಲು ಪೊರ್ಮ್ಬಾಟದ ನೆವನೊಡು ರಾಜಕೀಯ ಮಲ್ತೊಂದುಲ್ಲೆರ್ ಪನ್ದ್ ಮಂಡ್ಯ ಜಿಲ್ಲಾ ಉಸ್ತುವಾರಿ ಸಚಿವೆ ಚಲುವರಾಯಸ್ವಾಮಿ
ಆರೋಪ ಮಲ್ತೆರ್. ಮದ್ದೂರು ನಡಕೆದ ಬಗೆಟ್ ಬೆಂಗಳೂರುಡು ಪಾತೆರ್ನ ಆರ್, ಅಪಗನೇ ಎಫ್ಐಆರ್ ದಾಕಲ್ತೊಂದು 21 ಜನ ಮುಸ್ಲಿಮೆರೆನ್ ಕೈದ್ ಮಲ್ದ್ಂಡ್. ಅವೆಟ್ ಪಿದಯಿದಕುಲು ಒಂಜಿ ರಡ್ಡ್ ಮೂಜಿ ಜನ ಇಪ್ಪೆರ್. ಹಿಂದೂಲೆನ ಮಿತ್ತ್ ಒವ್ವೇ ಕೇಸ್ ಪಾಡ್ದಿಜ, ಏರೆನ್ಲಾ ಕೈದ್ ಮಲ್ದಿಜ ಪನ್ದ್ ಪನ್ಡೆರ್.
ಎಚ್ಚಿನಂಶ ಈತ್ ಬೇಗ ಒವ್ವೇ ಪ್ರಕರಣೊಡು ಕ್ರಮ ಗೆತೊಂದಿಜೆರ್. ಕಲ್ಲ್ ದಕ್ಕಿನಕ್ಲೆನ ಮಿತ್ತ್ ಕ್ರಮ ಗೆತೊಂಡಿ ಬೊಕ್ಕ ಅಕುಲು (ಬಿಜೆಪಿ, ಜೆಡಿಎಸ್) ಕೇನುನಾಂಡ ಎಚ್ಚಿನ ಜಡ್ತೆ ಮಲ್ಪೆರ ಕೇಂದೊಲಿ. ನನಲಾ ಎಚ್ಚಿನ ಕ್ರಮ ಗೆತೊನ್ರ ಪನ್ತೊಲಿ. ಅವು ಬುಡ್ದು ಪ್ರತಿಭಟನೆದ ನೆವನೊಡು ಕೋಮುಕೊಲಲ ಉಂಡು ಮಲ್ಪುನ ಪುನೆಪು ಬರೊಂದುಲ್ಲೆರ್. ಉಂದು ಅಕಲೆಗ್ ಎಡ್ಡೆ ಅತ್ತ್ ಪನ್ದ್ ಸಚಿವೆರ್ ಪನ್ಡೆರ್.
ಎಂಕ್ಲೆನ ಸರ್ಕಾರೊದ ಯೋಜನೆಲು, ಬುಲೆಚ್ಚಿಲ್ ಕಜ್ಜೊಲು ಪ್ರತಿಪಕ್ಷೊಲೆನ್ ಕಟ್ಟ್ದ್ ಪಾಡ್ದ. ಇತ್ತೆ ವಿಧಾನಸಭೆಟ್ ಅಕುಲು ವಿಫಲೆರಾತೆರ್. ಅಕ್ಲೆಗ್ ವಾ ವಿಚಾರೊಲಾ ತಿಕ್ಕಂದಿನಪಗ ಕೋಮುಕೊಲಲ ಒಂಜೇ ಮಲ್ಲೆಟ್ ತೋಜುಂಡು. ಅಕ್ಲೆಗ್ ಪಕ್ಷ ಸಂಘಟನೆ ಮಲ್ಪೆರೆ ಒರಿದಿನ ಅಸ್ತ್ರ ಉಂದೊಂಜೇ ಆದುಂಡು. ಪ್ರತಿಪಕ್ಷ ನಾಯಕೆ ಆರ್ ಅಶೋಕ್ ಆವಡ್, ಜನತಾ ದಳೊದ ನಾಯಕೆರಾವಡ್ ಅತ್ತ್ಂಡ ಒವ್ವೇ ಸಂಘಟನೆದಕುಲಾವಡ್ ಅಕ್ಲೆಗ್ ರಾಜಕೀಯ ಇಚ್ಛಾಶಕ್ತಿ ಇತ್ತ್ಂಡ ಜನಪರ ವಿಚಾರ ಪತೊಂದು ಪಾತೆರಡ್ ಪನ್ದ್ ಪನ್ಡೆರ್.
ಮದ್ದೂರುಡು ಐತಾರ ರಾತ್ರೆ ಕಲ್ಲ್ ದಕ್ಕಿನೆಟ್ 8 ಜನೊಕು ಗಡಿಕುಲಾತ. ಸೋಮವಾರ ಕಾಂಡೆ ನಡತಿನ ಪ್ರತಿಭಟನೆ ದ ಪೊರ್ತುಡ್ಲಾ ಕಲ್ಲ್ ದಕ್ಕ್ದೆರ್. ಇತ್ತೆ ಪರಿಸ್ಥಿತಿ ತೆಟ್ಟ್ದಿತ್ತ್ದ್, ಅಂಗಾರೆ ಕಾಂಡೆ ಮುಟ್ಟ ನಿಷೇಧಾಜ್ಞೆ ಇಪ್ಪುಂಡು.