Last updated on October 22nd, 2025 at 06:38 am
ಕುಡ್ಲ: ಮೂಲ್ಕಿ ಸಬ್ ರಿಜಿಸ್ಟ್ರಾರ್ನ ಬೇಲೆಗ್ ತಲೆಪು ಕನತಿನ ಆರೋಪಡ್ ಮೂಲ್ಕಿ ಪೊಲೀಸೆರ್ 11 ಜನನ್ ಕೈದ್ ಮಲ್ತ್ದ್ ಬೆದ್ರ ನ್ಯಾಯಾಂತಡೆಡ್ ನ್ಯಾಯಾಧೀಶೆರೆ ಎದುರು ಲೆತೊಂದು ಪೋತಿನ ನಡಕೆ ಅ.21ತ ಅಂಗಾರೆ ನಡತ್ದ್ಂಡ್. ಪ್ರಕರಣೊಡು ಮಾತೆರೆಗ್ಲಾ ಜಾಮೀನ್ಲಾ ತಿಕ್ಕ್ದ್ಂಡ್.
ವಕೀಲೆರಾಯಿನ ಡೇನಿಯಲ್ ದೇವರಾಜ್ ಬೊಕ್ಕ ಬೇತೆಕುಲು ಅ.18 ದಾನಿ ತನ್ನ ಬೇಲೆಗ್ ಅಡ್ಡ ಬತ್ತ್ದೆರ್ ಪನ್ದ್ ಸಬ್ ರಿಜಿಸ್ಟ್ರಾರ್ ರಾಜೇಶ್ವರಿ ಹೆಗಡೆ ಮೇರ್ ಮೂಲ್ಕಿ ಸ್ಟೇಶನ್ಡ್ ಒಯಿಲ್ ಬರೆಪಾದಿತ್ತೆರ್. ಅ. 21 ತಾನಿ ಡೇನಿಯಲ್ ದೇವರಾಜ್ ಮೇರ್ ರಾಹುಲ್ ಹಳೆಯಂಗಡಿ, ಚೈತ್ರ, ಸತೀಶ ಹಳೆಯಂಗಡಿ, ಅಮೇಲ್ ಬಟ್ಟಕೋಡಿ, ಅಬ್ದುಲ್ ರಜಾಕ್ ಮುಲ್ಕಿ, ಸುವೀನ್ ಪಕ್ಷಿಕರೆ, ಶೇಕ್ ಅಕಿಲ್ ಬೊಲ್ತೇರ್, ತೇಜ್ಪಾಲ ಹಳೆಯಂಗಡಿ, ಗಣೇಶ್ ಚೇಳ್ಯಾರ್, ವಿಕೇಶ್ ಹಳೆಯಂಗಡಿ ಪನ್ಪಿನಕ್ಲೆ ಒಟ್ಟು ಸೇರ್ಜದ್ ರಿಜಿಸ್ಟರ್ ಕಚೇರಿದ ಎದುರು ಪೊರ್ಮ್ಬಾಟ ದ ನೆವನೊಡು ಕಚೇರಿ ಸಿಬಂದಿಗ್ ಅಂಚೆನೇ ಎಂಕ್ ಬೇಲೆ ಮಲ್ಪೆರ ಬುಡ್ತಿಜೆರ್ ಪನ್ದ್ ಆರೋಪ ಮಲ್ದೆರ್. ಈ ಬಗೆಟ್ ಪ್ರಕರಣೊಲಾ ದಾಕಲಾತ್ಂಡ್.
ವೈಯಕ್ತಿಕ ಪಗೆಟ್ ರಾಜೇಶ್ವರಿ ಹೆಗಡೆ ಕಲು ಒಯಿಲ್ ಬರೆಪಾದೆರ್ ಪನ್ದ್ ಡೇನಿಯಲ್ ದೇವರಾಜ್ ಪ್ರತಿಒಯಿಲ್ ಬರೆಪಾದೆರ್.
ಈ ನಡುಟು ಸರಕಾರಿ ನೌಕರೆರೆಗ್ ರಕ್ಷಣೆ ಕೊರೊಡು ಅಂಚೆನೇ ಆರೋಪಿಲೆನ ಮಿತ್ತ್ ಕಠಿಣ ಕ್ರಮ ಗೆತೊನೊಡು ಪನ್ದ್ ಮೂಲ್ಕಿ ಸರಕಾರಿ ನೌಕರೆರೆ ಸಂಘ ಬಿನ್ನಪು ಮಲ್ದ್ಂಡ್.