Last updated on October 5th, 2025 at 12:27 pm
ಬಂಟ್ವಾಳ,ಅ. 05: ಬಂಟ್ವಾಳ ಗ್ರಾಮಾಂತರ ಪೊಲೀಸ್ ಸ್ಟೇಶನ್ ಸೀಮೆದ ಕೊಳತ್ತಮಜಲ್ ಅಬ್ದುಲ್ ರಹ್ಮಾನ್ ನ್ ಕೆರ್ತಿನ ಪ್ರಕರಣೊದ ಆರೋಪಿಲಾಯಿನ ಭರತ್ ಕುಮ್ಡೇಲ್ ಸೇರ್ದ್ ಬೇತೆ ಒಂತೆ ಜನತ ಮಿತ್ತ್ ಕೊಕಾ ಕಾಯ್ದೆದಡಿಟ್ ಪ್ರಕರಣ ದಾಕಲ್ತ್ದ್ಂಡ್ ಪನ್ದ್ ಜಿಲ್ಲಾ ಎಸ್ಪಿ ಡಾ. ಅರುಣ್ ಕೆ. ತೆರಿಪಾದೆರ್.
ಮೇ 27ತಾನಿ ನಡತಿನ ಕೊಲೆ ಪ್ರಕರಣೊಗು ಸಂಬಂಧಿತ್ದ್ ಪೊಲೀಸೆರ್ ದೀಪಕ್, ಚಿಂತನ್, ಪೃಥ್ವಿರಾಜ್ ಜೋಗಿ, ಸುಮಿತ್ ಬಿ. ಆಚಾರ್ಯ, ವಿ. ರವಿರಾಜ ಮೂಲ್ಯ, ಅಭಿನ್ ರೈ, ತೇಜಾಕ್ಷ, ರವಿಸಂಜಯ್ ಜಿ.ಎಸ್., ಶಿವಪ್ರಸಾದ್ ತುಂಬೆ, ಪ್ರದೀಪ್, ಶಾಹಿತ್, ಸಚಿನ್ ರೊಟ್ಟಿಗುಡ್ಡೆ, ರಂಜಿತ್ ಪನ್ಪಿನಕ್ಲೆನ್ ಕೈದ್ ಮಲ್ತಿತ್ತೆರ್. ಆರೋಪಿಲು ಇತ್ತೆ ನ್ಯಾಯಾಂಗ ಕೈದ್ಡ್ ಉಲ್ಲೆರ್. ಪ್ರಕರಣೊದ ಪ್ರಮುಖ ಆರೋಪಿ ಪುದು ಗ್ರಾಮೊದ ಭರತ್ ರಾಜ್ ಯಾನೆ ಭರತ್ ಕುಮ್ಡೇಲ್ (29) ದೆಂಗ್ತಪ್ಪಾದಿತ್ತ್ದ್, ಪತ್ತೆರ ಬಾಕಿ ಉಂಡು ಪನ್ದ್ ಪೊಲೀಸೆರ್ ಒಲವು ಕೊರ್ತೆರ್.
ಈ ಪ್ರಕರಣೊಡು ಪಾಲ್ಪಡೆತಿನ ಆರೋಪಿಲು ಪಾಕ ವರ್ಸೊರ್ದಿಂಚಿ ಕೆರ್ಪುನ, ಕೆರ್ಪುನ ಪುನೆಪು, ಪ್ರಚೋದನಕಾರಿ ಭಾಷಣೊಲು ಸೇರ್ದ್ ಕಾನೂನು ಬಾಹಿರ ಬೇಲೆಲೆಡ್ ಪಾಲ್ಪಡೆತೆರ್. ಸಮಾಜೊಡು ಅಶಾಂತಿ ಬೊಕ್ಕ ಕೋಮು ಸಂಘರ್ಷೊಗು ನೆವನ ಆತೆರ್. ಅಂಚಾದ್, ಅಕ್ಲೆನ ಮಿತ್ತ್ ಕರ್ನಾಟಕ ಸಂಘಟಿತ ಅಪರಾಧ ತಡೆ ಕಾಯ್ದೆ-2000ದ ಅಡಿಟ್ ಪ್ರಕರಣ ದಾಕಲ್ತೊಂದು ಜಡ್ತೆ ಮಲ್ತೊಂದುಲ್ಲ ಪನ್ದ್ ಪನ್ಡೆರ್.