Last updated on October 9th, 2025 at 08:33 am
ಚೆನ್ನೈ , ಅ. 09: ಮಧ್ಯಪ್ರದೇಶ ಪೊಲೀಸೆರ್ ಕೋಲ್ಡ್ರಿಫ್ ಚೆಮ್ಮದ ಸಿರಪ್ ಮಲ್ತೊಂದಿತ್ತಿನ ಸ್ರೆಸನ್ ಫಾರ್ಮಾಸ್ಯುಟಿಕಲ್ಸ್ ಕಂಪನಿದ ದನಿ ಎಸ್. ರಂಗನಾಥನ್ ನ್ ಕೈದ್ ಮಲ್ತ್ದೆರ್. ಮಧ್ಯಪ್ರದೇಶೊಡು ಪಾಕ ಜೋಕುಲು ತೀರ್ಯೆರ ಕೋಲ್ಡ್ರಿಫ್ ನೆವನ ಪನ್ದ್ ತೆರಿದ್ ಬೈದ್ಂಡ್. ಮಧ್ಯಪ್ರದೇಶ ಬೊಕ್ಕ ತಮಿಳುನಾಡ್ ಪೊಲೀಸೆರ್ ಮಲ್ತಿನ ಜಂಟಿ ಕಾರ್ಯಾಚರಣೆಡ್ ರಂಗನಾಥನ್ನ್ ಚೆನ್ನೈಡ್ ಕೈದ್ ಮಲ್ದೆರ್.
ಮಧ್ಯಪ್ರದೇಶೊದ ಛಿಂದ್ವಾರಾ ಪೊಲೀಸೆರ್ ರಂಗನಾಥನ್ ನ್ ಪತ್ತ್ದ್ ಕೊರ್ನಕ್ಲೆಗ್ 20 ಸಾರ ಕೊರ್ಪ ಪನ್ದ್ ಘೋಷಣೆ ಮಲ್ತಿತ್ತೆರ್, ಉಂದಾಯಿ ಒಂತೆ ಪೊರ್ತುಡೇ ಆಯನ ಕೈದಾತ್ಂಡ್. ಮಧ್ಯಪ್ರದೇಶೊಡು ಚೆಮ್ಮದ ಸಿರಪ್ರ್ದಾವರ ಜೋಕುಲೆನ ಸಾವುದ ಸಂಖ್ಯೆ ಎಚ್ಚ ಆವೊಂದುಂಡು. ಕರಿನ 24 ಗಂಟೆಡ್ ಕುಡ ಮೂಜಿ ಜೋಕುಲು ತೀರ್ದಿತ್ತ್ದ್, ತೀರಿನಕ್ಲೆನ ಸಂಖ್ಯೆ 20 ಗ್ ಏರ್ದ್ಂಡ್. ಐನ್ ಜೋಕುಲು ನಾಗ್ಪುರಡ್ ಗಾತಿದ ಸ್ಥಿತಿಟ್ ಆಸ್ಪತ್ರೆಡ್ ಉಲ್ಲೆರ್.
ಮಧ್ಯಪ್ರದೇಶೊದ ಉಪಮುಖ್ಯಮಂತ್ರಿ ಬೊಕ್ಕ ಆರೋಗ್ಯ ಸಚಿವೆ ರಾಜೇಂದ್ರ ಶುಕ್ಲಾ ಮೇರ್ ಈ ದುರದೃಷ್ಟಕರ ನಡಕೆಡ್ ಛಿಂದ್ವಾರ, ಪಂಧುರ್ನಾ ಬೊಕ್ಕ ಬೇತುಲ್ಡ್ 20 ಜೋಕುಲು ತೀರ್ದೆರ್ ಪನ್ದ್ ಪನ್ತೆರ್. ಸರ್ಕಾರ ಕಠಿಣ ಕ್ರಮ ಗೆತೊನುಂಡು ಪನ್ದ್ ಪಾತೆರ ಕೊರ್ತೆರ್. ತಾಮಿಯಾದ ಧನಿ ಡೆಹರಿಯಾ (1.5 ವರ್ಷ), ಜುನ್ನಾರ್ದೇವ್ದ ಜ್ಯಾನ್ಶು ಯದುವಂಶಿ (2 ವರ್ಷ) ಬೊಕ್ಕ ರಿಧೋರಾದ ವೇದಾಂಶ್ ಪವಾರ್ (2.5 ವರ್ಷ) ನಾಗ್ಪುರದ ಬೇತೆ ಬೇತೆ ಆಸ್ಪತ್ರೆಲೆಡ್ ಮರ್ದ್ ನಡತೊಂದುಪ್ಪುನಗ ತೀರ್ದೆರ್. ಈ ಸಾವುಲೆನೊಟ್ಟುಗು ಕಾಲಿ ಚಿಂದ್ವಾರ ಜಿಲ್ಲೆಡೇ ಒಟ್ಟು ತೀರ್ದಿನ ಸಂಖ್ಯೆ 17 ಕ್ ಏರ್ದ್ಂಡ್.
ಡಾ. ಪ್ರವೀಣ್ ಸೋನಿ ಸೇರ್ದ್ ಪಾಕ ಪ್ರೈವೇಟ್ ಡಾಕ್ಟರ್ನಕುಲು ಜೋಕುಲೆಗ್ ಕೋಲ್ಡ್ರಿಫ್ ಸಿರಪ್ ಕೊರ್ತಿನ ಜಡ್ತೆರ್ದ್ ತೆರಿದ್ ಬೈದ್ಂಡ್. ಸಿರಪ್ ಗೆತೊಂದು ಒಂತೆ ಗಂಟೆಡೇ, ಜೋಕುಲೆನ ಮೂತ್ರಪಿಂಡ ಬೇನೆ ಲಕ್ಕೆರೆ ಸುರು ಆದ್, ಜೋರು ಜೋರು ಆವೊಂದು ಪೋಪೆದ್ಂಡ್.
ವೈದ್ಯಕೀಯ ಪರೀಕ್ಷೆಲು ಸಿರಪ್ಡ್ ವಿಷಕಾರಿ ರಾಸಾಯನಿಕೊಲು ಇಪ್ಪುನೆನ್ ದೃಢ ಮಲ್ತ್ದ. ಅವು ಸರ್ರೊಗು ಸೇರಿನೇ ಮೂತ್ರಪಿಂಡೊಲೆಗ್ ಹಾನಿ ಆಪೆದ್ಂಡ್. ಅಂಚಾದೇ ಪಾಕ ಜೋಕುಲು ಮೂತ್ರಪಿಂಡ ವೈಫಲ್ಯೊರ್ದಾವರ ತೀರ್ದೆರ್.