Last updated on October 9th, 2025 at 03:55 pm
ಕಾಂತಾರಾ ಪಿಚ್ಚರ್ ಬುಡುಗಡೆ ಆಯಿ ಬೊಕ್ಕ ಎಚ್ಚಾದ್ ನಡತ್ಂದುಪ್ಪುನ ಕೋಂಗಿಲೆರ್ದಾವರ ಬೆಸರಾದ್ ದೈವಾರಾಧಕೆರ್ ಇನಿ ದೈವೊದ ಎದುರು ಪೋದೇ ತನ್ಕುಲೆ ಬೆಸರ್ನ್ ಪನ್ಡೊನ್ದೆರ್.
ಕಾಂತಾರ ಸಿನಿಮಾದ ಮುಕೇನ ದೈವಾರಾಧನೆಗ್ ಅಪಚಾರ ಆವೊಂದುಂಡು ಪನ್ದ್ ಪಿಲ್ಚಂಡಿ, ಬಲಾಂಡಿ ದೈವೊಲೆನ ಕಲೊಕು ಬತ್ತ್ದ್ ದೈವ ನರ್ತಕೆರ್, ದೈವಾರಾಧಕೆರ್ ತನ್ಕುಲೆ ಅಸಮಾಧಾನ ತೂಪಾದಿತ್ತ್ದ್, ಬಜ್ಪೆ ಗ್ ಮುಟ್ಟದ ಶ್ರೀ ಕ್ಷೇತ್ರ ಪೆರಾರ, ಬೆರ್ಮೆರ್,ಇಷ್ಟ ದೇವತಾ ಬಲಾಂಡಿ, ಪಿಲ್ಚಂಡಿ ದೈವಸ್ಥಾನೊಡು ಬಲಾಂಡಿ, ಪಿಲ್ಚಂಡಿ ದೈವೊಲೆನ ಎದುರು ದೈವಾರಾಧನೆಗ್ ಆವೊಂದುಪ್ಪುನ ಅಪಹಾಸ್ಯೊದ ವಿರುದ್ಧ ಸಾಮೂಹಿಕ ಮದಿಪು ಮಲ್ತೆರ್. ಸಿನಿಮಾಡ್ ದೈವಾರಾಧನೆ ಗಲಸ್ದಿನ ಬಗೆಟ್ ಒಯಿಲ್ ಕೊರ್ದು, ದೈವೊದ ಆವೇಶೊನು ಅನುಕರಣೆ ಮವ್ಪುನಕ್ಲೆನ ಬಗೆಟ್ ದೈವರಾಧಕೆರ್ ಬೆಸರ್ ತೂಪಾಯೆರ್.
“ಪಟ್ಟ ಪರಕೆ ಎಂಕ್- ನ್ಯಾಯದ ಪಟ್ಟ ನಿಕ್ಕ್” ಪನ್ಪಿ ಬಲಾಂಡಿನ ಪಾತೆರೊದ ಲೆಕ ನ್ಯಾಯ ತೀರ್ಮಾನೊದ ಪ್ರಧಾನ ಅಧಿಕಾರ ಇತ್ತಿನ ಪಿಲ್ಚಂಡಿ ದೈವ ನುಡಿ ಕೊರ್ದು, ‘ಎನ್ನ ಪುದರ್ಡ್ ಕಾಸ್ ಮಲ್ತೊಂದುಪ್ಪುನಕ್ಲೆನ್ ಯಾನ್ ತೂವೊನುವೆ. ಕಾಸ್ ಮಾತಾ ಆಸ್ಪತ್ರೆ ಸೇರುಲೆಕ ಮಲ್ಪೆ. ಅಪಚಾರ ಮಲ್ತಿನಕ್ಲೆಗ್ ಯಾನ್ ಬುದ್ದಿ ಕಲ್ಪಾವೆ. ನನ ದುಂಬಗ್ ಮಾತಾ ದೈವಸ್ಥಾನೊಲೆಡ್ ವೀಡಿಯೋ ಮಲ್ಪುನೆನ್ ಉಂತಾಲೆ. ನಿಕುಲು ಪೊರ್ಮ್ಬಾಟ ಮಲ್ತೊಂದುಪ್ಪುಲೆ. ಯಾನ್ ನಿಕ್ಲೆ ಬೆರಿಯೆ ಉಲ್ಲೆ’ ಪನ್ದ್ ಪನ್ತ್ಂಡ್.