Last updated on October 15th, 2025 at 06:48 am
ಬೆದ್ರ,ಅ. 14 : ನಿಡ್ಡೋಡಿದ ಕಲ್ಲಕುಮೇರ್ ಪನ್ಪಿನಲ್ಪ ಇಲ್ಲ್ ಒತ್ತರೆ ಮಲ್ಪುನ ನೆವನೊಡು ಇಲ್ಲಗ್ ಲೆತ್ತ್ದ್ ಗ್ಯಾಂಗ್ ರೇಪ್ ಮಲ್ಪುನ ಪ್ಲಾನ್ ಮಲ್ತಿತ್ತಿನ ನಾಲ್ವೆರ್ ಆರೋಪಿಲೆನ್ ಪೊಲೀಸೆರ್ ಕೈದ್ ಮಲ್ತ್ದೆರ್.
ನಿಡ್ಡೋಡಿ ಕಲ್ಲಕುಮೇರ್ ನಿವಾಸಿ ಮಹೇಶ್, ಬಜ್ಪೆ ಕೊಂಡೆಮೂಲೆ ನಿವಾಸಿ ಶ್ರೀಕಾಂತ್, ಕಟೀಲ್ ನಿವಾಸಿ ಯಜ್ಞೇಶ್, ಮೂಲ್ಕಿ ನಡುಗೋಡೆ ನಿವಾಸಿ ದಿಲೀಪ್ ಯಾನೆ ದೀಪು ಕೈದಾತಿನ ಆರೋಪಿಲು.
ಆರೋಪಿ ಮಹೇಶ್ ರಿಕ್ಷಾ ಡ್ರೈವರ್ ಆದಿತ್ತ್ದ್, ದೇಲಂತಡೆರ್ದ್ ರಿಕ್ಷಾಡ್ ಪಿರಬರೊಂದಿತ್ತಿನ ಅಪ್ರಾಪ್ತ ಪೊಣ್ಣನ ಮೊಬೈಲ್ ನಂಬರ್ನ್ ಬಾಡಾಯಿದ ನೆವನೊಡು ಗೆತೊಂದಿತ್ತೆ. ಅಪಗಪಗ ಮೆಸೇಜ್, ಕಾಲ್ ಮಲ್ತ್ದ್ ತಾನ್ ಪೊಣ್ಣನ್ ಮೋಕೆ ಮಲ್ತೊಂದುಲ್ಲೆ, ಮದಿಮೆ ಆಪೆ ಪನ್ದ್ ಪನೊಂದಿತ್ತೆ. ಪೊಣ್ಣನ್ ಕಿನ್ನಿಗೋಳಿಗ್ ಬರ್ಯೆರ ಪನ್ದಿತ್ತ್ದ್, ತನ್ನ ದೋಸ್ತಿನೊಟ್ಟುಗು ಬತ್ತಿನ ಪೊಣ್ಣನ್ ತನ್ನ ರಿಕ್ಷಾಡ್ ಇಲ್ಲಗ್ ಲೆತೊಂದು ಪೋದು, ದೋಸ್ತಿಪೊಣ್ಣನ್ ಹಾಲ್ಡ್ ಕುಲ್ಲಾದ್ ಈ ಅಪ್ರಾಪ್ತ ಪೊಣ್ಣನ್ ಉಲಯಿ ಲೆತೊಂದು ಪೋದು ಅಪ್ರಾಪ್ತ ಪೊಣ್ಣನ ಮಿತ್ತ್ ಬಲವಂತವಾದ್ ಅತ್ಯಾಚಾರ ಮಲ್ತ್ದೆ ಪನ್ದ್ ವರದಿ ಆತ್ಂಡ್.
ಇಲ್ಲ್ ಒತ್ತರೆ ಮಲ್ಪುನ ನೆವನೊಡು ಪೊಣ್ಣನ್ ಬೊಕ್ಕ ಆಲೆನ ದೋಸ್ತಿನ್ ಲೆತ್ತ್ದಿತ್ತ್ದ್ ಕಿನ್ನಿಗೋಳಿರ್ದ್ ಸ್ಕೂಟರ್ಡ್ ಇಲ್ಲಡೆ ಲೆತೊಂದು ಪೋತೆಗೆ. ಮಹೇಶೆ ಅಪ್ರಾಪ್ತ ಪೊಣ್ಣನ್ ಇಲ್ಲದುಲಯಿ ಬಲವಂತೊಡು ಅತ್ಯಾಚಾರ ಮಲ್ತಿತ್ತ್ದ್, ಬೇತೆ ಆರೋಪಿಲಾಯಿನ ಶ್ರೀಕಾಂತ್, ದಿಲೀಪ್, ಯಜ್ಞೇಶ್ ಮೊಕುಲು ಇಲ್ಲದ ವರಾಂಡಡ್ ಗ್ಯಾಂಗ್ ರೇಪ್ ಮಲ್ಪೆರ ಪ್ಲಾನ್ ಪಾಡ್ದ್ ಕಾತೊಂದಿತ್ತೆರ್ ಪನ್ದ್ ವರದಿ ಆತ್ಂಡ್.
ಒಲವು ತಿಕ್ಕಿನೆಟ್ಟಿಗೇ ಬೆದ್ರ ಪೊಲೀಸ್ ಇನ್ಸ್ಪೆಕ್ಟರ್ ಸಂದೇಶ್ ಪಿಜಿ ಮುತಾಲಿಕೆದ ಕೂಟ ದಾಳಿ ಮಲ್ತ್ದ್ ಆರೋಪಿಲೆನ್ ಸ್ಟೇಷನ್ಗ್ ಒಯ್ತೊಂದು ಪೋತೆರ್. ವಿಚಾರಣೆದ ಪೊರ್ತುಡು ಆರೋಪಿಲು ತನ್ಕುಲೆ ಪ್ಲಾನ್ದ ಬಗೆಟ್ ಬಾಯಿಬುಡ್ದಿತ್ತ್ದ್, ಬೆದ್ರ ಇನ್ಸ್ಪೆಕ್ಟರ್ ಸಂದೇಶ್ ಪಿಜಿ ತನ್ನ ಸಮಯಪ್ರಜ್ಞೆಡ್, ನಡಪರೆಗಿತ್ತಿನ ಗ್ಯಾಂಗ್ ರೇಪ್ ಒಂಜೆನ್ ಉಂತಾವುನೆಟ್ ಯಶಸ್ವಿ ಆತೆರ್. ದಾಳಿದ ಪೊರ್ತುಡು ಇಲ್ಲಡ್ ಕಾಂಡೋಮ್ ಬೊಕ್ಕ ಬೇತೆ ಸೊತ್ತುಲು ತಿಕ್ಕ್ದ. ಆರೋಪಿಲೆನ ಮಿತ್ತ್ ಪೋಕ್ಸೋ ಕಾಯಿದೆದಡಿಟ್ ಪ್ರಕರಣ ದಾಕಲ್ತೊಂದೆರ್.