Last updated on October 28th, 2025 at 11:54 am
ಕುಡ್ಲ, ಅ. 28: ತೊರ್ತಲ್ಡ್ ಬೀಸತ್ತಿ ಪಾಡ್ದಿನ ಪ್ರಕರಣೊದ ಪ್ರಮುಖ ಆರೋಪಿ ಆದುಪ್ಪುನ ಗುರುರಾಜ್ನ್ ಕೈದ್ ಮಲ್ಪುನ ಪೊರ್ತುಡು ಪೊಲೀಸೆರೆ ಮಿತ್ತ್ ಹಲ್ಲೆ ಮಲ್ದಿನ ಬಗೆಟ್ ಪ್ರಕರಣ ದಾಕಲಾತ್ಂಡ್.
ತೊರ್ತಲ್ದ ದೀಪಕ್ ಬಾರ್ ಕೈತಲ್ ಅಕ್ಟೋಬರ್ 23 ತಾನಿ ರಾತ್ರೆ ಹಸನ್ ಮುಕ್ಷಿತ್ ಬೊಕ್ಕ ನಿಝಾಮ್ ಪನ್ಪಿನಕ್ಲೆಗ್, ದುಂಬು ಬೇತೆ ಬೇತೆ ಪ್ರಕರಣೊಲೆಡ್ ಕೈ ಇತ್ತಿನ ಗುರುರಾಜ್ ಆಚಾರಿ, ಅಲೆಕ್ಸ್ ಸಂತೋಷ್, ನಿತಿನ್ ಬೊಕ್ಕ ಸುಶಾಂತ್ ಸೇರ್ದ್ ಬೀಸತ್ತಿ ಪಾಡ್ದ್ ಕೆರ್ಯೆರ ತೂತೆರ್. ಈ ಬಗೆಟ್ ತೊರ್ತಲ್ ಪೊಲೀಸ್ ಸ್ಟೇಶನ್ಡ್ ಕೆರ್ಪುನ ಪುನೆಪುದ ಪ್ರಕರಣ ದಾಕಲಾತ್ಂಡ್.
ಈ ಪ್ರಕರಣೊಡು ಪ್ರಮುಖ ಆರೋಪಿ ದೆಂಗ್ತಪ್ಪಾದಿತ್ತಿನ ಗುರುರಾಜ್ ಆಚಾರಿನ್ ಅರೆಸ್ಟ್ ಮಲ್ಪೆರ ಪೊಲೀಸೆರ್ ನಾಡೊಂದಿತ್ತೆರ್. ಈ ಪೊರ್ತುಡು ಆರೋಪಿ ಕುಳಾಯಿ ಗ್ರಾಮೊದ ಕುಳಾಯಿ ಗುಡ್ಡೆ ಪ್ರಗತಿ ನಗರದ ಕೈತಲ್ ಇಪ್ಪುನ ಬಗೆಟ್ ಒಲವು ತಿಕ್ಕ್ದಿತ್ತ್ಂಡ್. ಅಂಚಾದ್ ಪೊಲೀಸ್ ಸಿಬ್ಬಂದಿಲೆ ಒಟ್ಟುಗು ಅಕ್ಟೋಬರ್ 25 ತಾನಿ ಕುಳಾಯಿ ಗುಡ್ಡೆ ಕೈತಲ್ ಹೊನ್ನಕಟ್ಟೆ ರ್ದ್ ಕಾನ ದಂಚಿ ಪೋಪಿನ ಸಾದಿಡೆ ಪ್ರಗತಿ ನಗರದಂಚಿ ಪೋತೆರ್.
ಅಲ್ಪ ಮರತಡಿಟ್ ಕುಲ್ದಿತ್ತಿನ ಆರೋಪಿ ಗುರುರಾಜ್ ನ್ ಪತ್ತೆರ ಪೊಲೀಸೆರ್ ಪೋತೆರ್. ಈ ಪೊರ್ತುಡು ಆರೋಪಿ ನೆಲಕ್ ಬೂರ್ದಿತ್ತಿನ ಮರತ ಸೋಂಟೆ ಪತೊಂದು ಪಿಸಿ ವಿನಾಯಕ ಪನ್ಪಿನಾರೆನ ದತ್ತಪುಗೆಲ್ಗ್ ಆಕ್ದೆ, ಆತೇ ಅತ್ತಂದೆ ತೊರ್ತ್ದ್ ನೂಕುದು ಪಾಡ್ದ್, ಪದ್ರಾಡಾತೆ. ಬೊಕ್ಕ ಒರಿನ ಪೊಲೀಸ್ ಸಿಬ್ಬಂದಿಲು ಆರೋಪಿನ್ ಬೆರಿಪತ್ತ್ದ್ ಅರೆಸ್ಟ್ ಮಲ್ತ್ದೆರ್.
ಪೊಲೀಸೆರ್ ಆರೋಪಿನ್ ವಶೊಕು ಗೆತೊನರೆ ಪೋನಗ ಪೊಲೀಸ್ ಸಿಬ್ಬಂದಿಗ್ ಆಕ್ದ್ ಬೆಲೆಗ್ ಅಡ್ಡ ಬೈದಿನ ಆರೋಪಿ ಗುರುರಾಜ್ ನ ಮಿತ್ತ್ ಪ್ರಕರಣ ದಾಕಲಾತ್ಂಡ್.