Last updated on October 31st, 2025 at 09:29 am
ಮುಂಬೈ, ಅ. 31: 17 ಜೋಕುಲೆನ್ ಒತ್ತೆಯಾಳ್(ಹಾಸ್ಟೇಜ್) ಆದ್ ದೀದಿತ್ತಿನ ಆಂಜೊವುನು ಮುಂಬೈ ಪೊಲೀಸೆರ್ ಎನ್ಕೌಂಟರ್ ಮಲ್ತ್ ಕೆರ್ದ್ ಜೋಕುಲೆನ ರಕ್ಷಣೆ ಮಲ್ದೆರ್. ಮುಂಬೈ ಪೊವಾಯಿ ಪ್ರದೇಶೊದ ಸ್ಟುಡಿಯೋ ಒಂಜೆಟ್ ಈ ನಡಕೆ ನಡತ್ದ್ಂಡ್.
ಸೈದಿನಾಯನ್ ರೋಹಿತ್ ಆರ್ಯ ಪನ್ದ್ ಗುರ್ತ ಪತ್ತ್ದಿತ್ತ್ದ್, ಆಯೆ ಪೊಲೀಸೆರೆ ಮಿತ್ತ್ ಫೈರಿಂಗ್ ಮಲ್ತ್ದೆ, ಅವೆಕ್ ಪೊಲೀಸೆರ್ ಪ್ರತಿದಾಳಿ ಮಲ್ತ್ದೆರ್. ಈ ಪೊರ್ತುಡು ಆರ್ಯನ ತಿಗಲೆಗ್ ಗುಂಡು ಬೂರ್ದು ತೀರ್ದೆ. ಮುಂಬೈದ ಪೊವಾಯಿಡ್ ಇಪ್ಪುನ ಮಹಾವೀರ್ ಕ್ಲಾಸಿಕ್ ಕಟ್ವಾನೊದ ರಾ ಸ್ಟುಡಿಯೋಡು ಆರ್ಯೆ ಒತ್ತೆಯಾಳಾದ್ ದೀದಿತ್ತಿನ 17 ಜೋಕುಲು ಬೊಕ್ಕ ಇರ್ವೆರ್ ಮಲ್ಲಕಲ್ಲೆನ್ ಪೊಲೀಸೆರ್ ಯಶಸ್ವಿಯಾದ್ ರಕ್ಷಣೆ ಮಲ್ದೆರ್.
ಆರೋಪಿ ರೋಹಿತ್ ಆರ್ಯೆ, ಆ್ಯಕ್ಟಿಂಗ್ ಕ್ಲಾಸ್ ಬೊಕ್ಕ ಆಡಿಷನ್ಲೆನ್ ನಡಪಾವುನ ನೆವನೊಡು ಜೋಕುಲೆನ್ ಸ್ಟುಡಿಯೋಗ್ ಲೆತಪೋದಿತ್ತೆಗೆ. ಬೊಕ್ಕ ಆರ್ಯೆ ಸಾಮಾಜಿಕ ಬಲೆತ್ತಾನೊಡು ವಿಡಿಯೋ ಒಂಜೆನ್ ಬುಡುಗಡೆ ಮಲ್ತ್ದ್, ಕೆಲ ಜನೊಟ ಏನ್ ಪಾತೆರೊಡು ಅಂಚೆನೇ ಪ್ರಶ್ನೆ ಕೇನ್ಯೆರೆ ಉಂಡು. ಎಂಕ್ ಕಾಸ್ ಬೊರ್ಚಿ ಪನ್ದ್ ಪನ್ತೆ. ಪಾತೆರ್ಯೆರ ಅವಕಾಶ ಕೊರ್ಜಿಂಡ, ಸ್ಟುಡಿಯೋಗ್ ಸೂ ಪಾಡುವೆ ಪನ್ದ್ ಪೋಡಿಕಟ್ಟಾದಿತ್ತೆ.
ಪೊಲೀಸೆರ್, ಆರೋಪಿರ್ದ್ ಏರ್ ಗನ್, ರಾಸಾಯನಿಕೊಲು ಅಂಚೆನೇ ಬೇತೆ ಸೊತ್ತುಲೆನ್ ವಶೊಕು ಗೆತೊಂದೆರ್. ಮಾತಾ ಜೋಕುಲು ಸುರಕ್ಷಿತವಾದುಲ್ಲೆರ್ ಪನ್ದ್ ಮುಂಬೈ ಜಂಟಿ ಪೊಲೀಸ್ ಆಯುಕ್ತೆ(ಕಾನೂನು ಬೊಕ್ಕ ಸುವ್ಯವಸ್ಥೆ) ಸತ್ಯನಾರಾಯಣ ಚೌಧರಿ ತೆರಿಪಾದೆರ್. ಪ್ರಾಥಮಿಕ ಜಡ್ತೆದ ಪ್ರಕಾರ, ಆರ್ಯೆ ಬೊಕ್ಕ ಆಯನ ಒಟ್ಟುಗಿತ್ತಿನಕುಲು ಸರ್ಕಾರಿ ಯೋಜನೆಲೆನ್ ಗೆತೊಂದಿತ್ತೆರ್. ಆಂಡ ಅಕಲೆಗ್ ಸಂಬಲ ಕೊರಂದಿನೆರ್ದಾವರ, ಪ್ರಚಾರ ಗೆತೊನರ ಈ ಡ್ರಾಮಾ ಮಲ್ತ್ದೆರ್ ಪನ್ದ್ ಪೊಲೀಸ್ ಮೂಲೊಲು ತೆರಿಪಾದ.