Last updated on November 12th, 2025 at 04:20 pm
ಬಂಟ್ವಾಳ ಅ. 02: ಪೆತ್ತ ಕೈಕಂಜಿಲೆನ್ ಕನ್ಡ್ದ್ ಬೊಕ್ಕ ಅಕ್ರಮವಾದ್ ಇಲ್ಲಡೇ ಮಾಸ ಮಲ್ತ್ದ್ ಮಾರೊಂದಿತ್ತಿನ ಆರೋಪಿಗ್ ಪೊಲೀಸೆರ್ ಶಾಕ್ ಕೊರ್ದಿತ್ತ್ದ್, ಜಿಲ್ಲೆಡ್ ಉಂದೇ ಕಡೀರ ಸರ್ತಿಗ್ ಪೆತ್ತಕಲ್ವನ ಇಲ್ಲ್ನ್ ಸೀಜ್ ಮಲ್ತ್ದೆರ್. ಈ ಮುಕೇನ ಪೆತ್ತ ಕೈಕಂಜಿ ಕನ್ಡುನಕ್ಲೆಗ್ ಕಾನೂನ್ದ ರುಚಿ ತೂಪಾದೆರ್.
ಬಂಟ್ವಾಳ ಗ್ರಾಮಾಂತರ ಪೊಲೀಸ್ ಸ್ಟೇಶನ್ ಸೀಮೆದ ಪುದು ಗ್ರಾಮೊದ ಮಾರಿಪಳ್ಳ ನಿವಾಸಿ ಹಸನಬ್ಬ ಪನ್ಪಿನಾಯೆ ಪೆತ್ತ ಕನ್ಡುನ, ಪೆತ್ತ ಕೆರ್ತಿನ ಪ್ರಕರಣೊಲೆಡ್ ಪಾಲ್ಪಡೆದಿತ್ತ್ದ್, ಆಯನ ಮಿತ್ತ್ ಗೋಸಂರಕ್ಷಣಾ ಕಾಯಿದೆ ಬೊಕ್ಕ ಗೋಹತ್ಯೆ ನಿಷೇಧ ಕಾಯ್ದೆದಡಿಟ್ ಪ್ರಕರಣ ದಾಕಲಾದಿತ್ತ್ಂಡ್. ಆತೇ ಅತ್ತಂದೆ ಆಯನ್ ಅರೆಸ್ಟ್ ಮಲ್ತ್ದ್ ಕರ್ಪಿಲ್ಲ್ಗ್ ಪಾಡ್ದಿತ್ತೆರ್. ಆರೋಪಿನ ಮಿತ್ತ್ 2008 ಬೊಕ್ಕ 2017ಟ್ಲಾ ಗೋಹತ್ಯೆ ಬೊಕ್ಕ ಕನ್ಡಿನ ಪ್ರಕರಣೊಲು ದಾಕಲಾದಿತ್ತ, ಆರೋಪಿ ಪೆತ್ತ ಕನ್ಡ್ದ್ ಬೊಕ್ಕ ಆ ಪೆತ್ತೊಲೆನ್ ತನ್ನ ಇಲ್ಲಡ್ ಲೈಸೆನ್ಸ್ದಾಂತೆ ಮಾಸ ಮಲ್ತ್ದ್ ಮಾರೊಂದಿತ್ತೆ.
ಇತ್ತೆ ಪೊಲೀಸೆರ್ ಈ ಅಕ್ರಮ ಬೇಲೆಲೆನ್ ಉಂತಾಯೆರ ಆರೋಪಿನ ಇಲ್ಲಡ್ ಅಕ್ರಮವಾದ್ ಕಟ್ಟೊಂದಿನ ಕಸಾಯಿಖಾನೆನ್ ಮುಟ್ಟುಗೋಲು ಮಲ್ಪೆರ ಸಕಾಯಕ ಆಯುಕ್ತೆರ್ ಬೊಕ್ಕ ಕುಡ್ಲ ಉಪವಿಭಾಗೀಯ ದಂಡಾಧಿಕಾರಿ ವರದಿ ಬರೆದ್ ಸಂದಾದಿತ್ತೆರ್.
ಆ ಪ್ರಕಾರ ಸಕಾಯಕ ಆಯುಕ್ತೆರ್ ಬೊಕ್ಕ ಕುಡ್ಲ ಉಪವಿಭಾಗೀಯ ದಂಡಾಧಿಕಾರಿ ಜಾನುವಾರು ಹತ್ಯೆ ಪ್ರತಿಬಂಧಕ ಬೊಕ್ಕ ಸಂರಕ್ಷಣಾ ಅಧಿನಿಯಮೊದಡಿಟ್ ಆರೋಪಿ ಹಸನಬ್ಬಗ್ ಸೇರ್ದಿನ ಪುದು ಗ್ರಾಮ ಪಂಚಾಯತ್ ಸೀಮೆದ ಮಾರಿಪಳ್ಳ ಪಾಡಿ ಪನ್ಪಿನಲ್ಪ ಇಪ್ಪುನ ಇಲ್ಲ್ನ್ ಜಪ್ತಿ ಮಲ್ತೊಂದೆರ್. ಮಂಗಳೂರು ಜಿಲ್ಲೆಡ್ ಪೆತ್ತ ಕನ್ಡಿನ ಪ್ರಕರಣೊಡು ಆರೋಪಿನ ಇಲ್ಲ್ನೇ ಮುಟ್ಟುಗೋಲು ಮಲ್ತೊನುನ ಉಂದೇ ಸುರು.