Last updated on October 31st, 2025 at 03:48 pm
ಬೊಲ್ತೇರ್, ಅ. 31: ರಾಜ್ಯೊಡೊರ್ಮೆ ಭಾರಿ ಸುದ್ದಿ ಮಲ್ತಿತ್ತಿನ ಅನನ್ಯಾ ಭಟ್ ನಾಪತ್ತೆ ಕೇಸ್ದ ಜಡ್ತೆನ್ ಎಸ್ಐಟಿ ಉಂತಾತ್ಂಡ್. ಮಗಲ್ ಧರ್ಮಸ್ಥಳಡ್ ಕಾಣೆ ಆತಲ್ ಪನ್ದ್ ಸುಜಾತಾ ಭಟ್ ಒಯಿಲ್ ಬರೆಪಾದಿತ್ತೆರ್. ಆಂಡ ಜಡ್ತೆದ ಪೊರ್ತುಡು ಏನ್ ಕಲು ಒಯಿಲ್ ಬರೆಪಾದೆ ಪನ್ದ್ ತಪ್ಪು ಒತ್ತೊಂದಿನೆರ್ದಾವರ ಜಡ್ತೆನ್ ಉಂತಾದೆರ್. ಪ್ರಕರಣೊಡು ಸುಜಾತಾ ಭಟ್ ರೆನ ಒಯಿಲ್ ಅರ್ಜಿ ಬೇತೆ ಮಲ್ತ್ದ ಪನ್ದ್ ಎಸ್ಐಟಿ ಅಧಿಕಾರಿಲು ತೆರಿಪಾದೆರ್.
ಪ್ರಕರಣ ದಾದ ಆದಿತ್ತ್ಂಡ್?
ಧರ್ಮಸ್ಥಳಡ್ ಪುನೊಕ್ಲೆನ್ ಕೌಂತುದೆ ಪನ್ದ್ ಒರಿ ಬತ್ತ್ ಪನ್ಡಿನ ಪೊರ್ತುಡು, ಸುಜಾತಾ ಭಟ್ ಪನ್ಪಿನಾರ್ ತನ್ನ ಮಗಲ್ ಧರ್ಮಸ್ಥಳಡ್ ಕಾಣೆ ಆತಲ್ ಪನ್ದ್ ಒಯಿಲ್ ಬರೆಪಾದಿತ್ತೆರ್. 2003ಟ್ ಮಣಿಪಾಲಡ್ ಎಂಬಿಬಿಎಸ್ ಕಲ್ತೊಂದುಪ್ಪುನಗ ತನ್ನ ಮಗಲ್ ನಾಪತ್ತೆ ಆದಿತ್ತ್ದೊ, ಆಲೆನ್ ಧರ್ಮಸ್ಥಳಡ್ ಕೆರ್ತೆರ್ ಪನ್ದ್ ಆರೋಪ ಮಲ್ತಿತ್ತೆರ್. ಪ್ರಕರಣೊನು ಸರ್ಕಾರ ಎಸ್ಐಟಿಗ್ ಕೊರ್ದಿತ್ತ್ಂಡ್.
ಜಡ್ತೆದ ಪೊರ್ತುಡು ಸುಜಾತಾ ಭಟ್ ದಿನಕ್ಕೊಂಜಿ ಕತೆ ಪನೊಂದು, ಏರೆರೆನ ಫೋಟೋ ತೋಜಾದ್ ಮೋಲೇ ಎನ್ನ ಮಗಲ್ ಅನನ್ಯಾ ಭಟ್ ಪನ್ದ್ ಸುರುಟು ಪನ್ದಿತ್ತೆರ್. ಆಂಡ ಅವು ಆರೆನ ಮಗಲೆನ ಫೋಟೋ ಅತ್ತ್, ವಾಸಂತಿ ಪನ್ಪಿನಾರೆನ ಫೋಟೋ ಪನ್ದ್ ರಿವೀಲ್ ಆದಿತ್ತ್ಂಡ್.
ಅಕೇರಿಗ್ ತಾನ್ ಪನ್ಡಿನ ಮಾತಾ ಕಲು ಪನ್ದ್ ಒತ್ತೊಂದಿನ ಸುಜಾತಾ ಭಟ್, ಧರ್ಮಸ್ಥಳ ಪ್ರಕರಣೊಡು ಬುರುಡೆ ಗ್ಯಾಂಗ್ದ ಒಟ್ಟುಗು ಗೋಡಿನೆಕ್ ಪಶ್ಚಾತ್ತಾಪ ಉಂಡು. ಏರ್ನನಾ ಪಾತೆರ ಕೇನ್ದ್ ಎನ್ನ ಜೂವನ ತೆಟ್ಟ್ ಮಲ್ತೊನುಜಿ. ಈ ಬಗೆಟ್ ಧರ್ಮಸ್ಥಳದ ವೀರೇಂದ್ರ ಹೆಗ್ಗಡೆರೆಡ ಮಾಪು ನಟ್ಟುವೆ ಪನ್ದ್ ಮಾತಾ ಪನ್ದಿತ್ತೆರ್.