Last updated on October 23rd, 2025 at 12:06 pm
ಗುವಾಹಟಿ, ಅ. 23 : ಅಸ್ಸಾಂದ ಕೊಕ್ರಜಾರ್ ಜಿಲ್ಲೆದ ರೈಲ್ವೆ ಪಟ್ಟೆಡ್ ಇನಿ ಕಾಂಡೆ ಭೀಕರ ಐಇಡಿ ಸ್ಫೋಟ ಆದಿತ್ತ್ದ್, ಅಸ್ಸಾಂ ಬೊಕ್ಕ ಬಡಕಾಯಿ ಬಂಗಾಳೊದ ನಡುತ ರೈಲ್ ಸಂಚಾರೊನು ತಾತ್ಕಾಲಿಕವಾದ್ ಉಂತಾವೊಡಾದ್ ಬತ್ತಿತ್ತ್ಂಡ್. ಈ ಸ್ಫೋಟಡ್ ಸುಮಾರ್ ಮೂಜಿ ಫೀಟ್ ಉದ್ದೊದ ರೈಲ್ವೆ ಪಟ್ಟೆಗ್ ಹಾನಿ ಆದಿತ್ತ್ದ್, ಸ್ಫೋಟದ ಸಬ್ದೊಗು ಸುತ್ತಮುತ್ತದ ಊರುಡು ಪೋಡಿಗೆ ಉಂಡಾತ್ಂಡ್. ಈ ನಡಕೆ ಕೊಕ್ರಜಾರ್ ರೈಲ್ ಉಂತಡೆರ್ದ್ ಸಲಕಟಿ ದಂಚಿ ಐನ್ ಕಿಲೋಮೀಟರ್ ದೂರೊಡು ನಡತಿತ್ತ್ದ್, ದೇಬೆರೆ ದಯೆಟ್ ಒವ್ವೇ ಪ್ರಾಣಹಾನಿ, ರೈಲ್ ಪಟ್ಟೆ ತಪ್ಪುನ ನಡಕೆ ನಡತ್ದ್ಜಿ ಪನ್ದ್ ಪೋಲೀಸೆರ್ ತೆರಿಪಾದೆರ್.
ಕೊಟ್ರೆ ಜಾರ್ಜ್ ಜಿಲ್ಲೆದ ಪೆರಿಯ ಪೊಲೀಸ್ ವರಿಷ್ಠಾಧಿಕಾರಿ ಪುಷ್ಪರಾಜ್ ಸಿಂಗ್ ಪಾತೆರ್ದ್, “ಪಟ್ಟೆದ ಎಲ್ಯ ಭಾಗ ಮಾತ್ರ ಹಾನಿ ಆತ್ಂಡ್. ಅವೆನ್ ಅಪಗನೇ ರಿಪೇರ್ ಮಲ್ತ್ದ್ ಕಾಂಡೆ 5.30ಕ್ಕ್ ರೈಲ್ ಸಂಚಾರೊನು ಸುರು ಮಲ್ತ್ದ, ಭದ್ರತಾ ಸಿಬ್ಬಂದಿ ಬೊಕ್ಕ ರೈಲ್ವೆ ಅಧಿಕಾರಿಲು ಜಾಗೆಡ್ ಪರಿಶೀಲನೆ ಮಲ್ತ್ದೆರ್. ಉಂದೆತ ಪಿರವು ಏರೆನ ಕೈ ಉಂಡು ಪನ್ದ್ ಪಾಡ್ಪತ್ತೆರೆ ಜಡ್ತೆ ನಡತೊಂದುಂಡು.” ಪನ್ದ್ ಪನ್ಡೆರ್.
ಈ ಸ್ಫೋಟರ್ದಾವರ ಸುಮಾರ್ ಎಣ್ಮರ್ದ್ ಪತ್ತ್ ರೈಲ್ಲೆನ ಸಂಚಾರೊಗು ತಾತ್ಕಾಲಿಕ ತಲೆಪು ಆತ್ಂಡ್. ರೈಲ್ವೇ ಪಟ್ಟೆ ಕಾಂಡೆ 5.25ತ ಅಂದಾಜಿಗ್ ರಿಪೇರಿ ಆದಿತ್ತ್ದ್, ಅವೆತ ಒಂತೆ ಪೊರ್ತುಡೇ ಸಂಚಾರ ಕುಡ ಸುರು ಆತ್ಂಡ್. ಈ ಸ್ಫೋಟ ಪಿತೂರಿಯಾ ಪನ್ಪಿ ಬಗೆಟ್ ಪೊಲೀಸೆರ್ ನನಲಾ ಜಡ್ತೆ ಮಲ್ತೊಂದುಲ್ಲೆರ್. ಸ್ಫೋಟಡ್ ಪಾಲ್ಪಡೆತಿನಕ್ಲೆನ್ ನಾಡ್ಪತ್ತ್ದ್ ಕೈದ್ ಮಲ್ಪೆರೆ ಬೋಡಾಪಿನ ಕ್ರಮ ಗೆತೊಂದೆರ್.