Last updated on October 27th, 2025 at 10:46 am
ಒಡಿಪು, ಅ. 27: ಕೇಂದ್ರ ಸರಕಾರೊದ ಪಿಎಂಇಜಿಪಿ ಯೋಜನೆದ ಮುಕೇನ ಕೋಟಿಗಟ್ಲೆ ರೂಪಾಯಿ ಕಡ ದೆಪ್ಪಾದ್ ಕೊರ್ಪೆ ಪನ್ಡ್ದ್ ಜನೊಕ್ಲೆನ ಕೈರ್ದ್ ಕೋಟಿಗಟ್ಲೆ ಕಾಸ್ ಗೆತೊಂದು ಮಂಗೆ ಮಲ್ದಿನಾಲೆನ್ ಬೆರ್ಮಾವರ ಪೊಲೀಸೆರ್ ಅರೆಸ್ಟ್ ಮಲ್ತ್ದೆರ್. ಕೈದಾತಿನಾಲೆನ್ ಬೆರ್ಮಾವರದ ಕೌಸಲ್ಯ ಪನ್ದ್ ಗುರ್ತ ಪತ್ತ್ದೆರ್.
ಬೆರ್ಮಾವರ ತಾಲೂಕ್ದ ಯಡ್ತಾಡಿ ಗ್ರಾಮೊದ, ಬಾರಕೂರು, ಪೇರಾಡಿ ನಿವಾಸಿ ಸರಿತಾ ಲೂಯಿಸ್ (39) ಮೇರ್ ಬರೆಪಾದಿನ ಒಯಿಲ್ದ ಪ್ರಕಾರ, ಆರೋಪಿ ಕೌಸಲ್ಯಾ ನವೆಂಬರ್ 2023 ಟ್ ಅಂಜಲಿನ್ ಡಿಸಿಲ್ವಾ ಪನ್ಪಿನಾರೆನ ಮುಕೇನ ಆರೆಗ್ ಗುರ್ತ ಆದಿತ್ತಲ್. ಸರಿತಾ ಗ್ ತಾನ್ PMEGP ಸಬ್ಸಿಡಿ ಕಡ ದೆಪ್ಪಾದ್ ಕೊರ್ಪೆ ಪನ್ದ್ ಕೌಸಲ್ಯಾ ನಂಬಾದಿತ್ತಲ್.
ಕಡ ಪ್ರಕ್ರಿಯೆಗ್ ಸಂಬಂಧಿತ್ದ್ ಕೌಸಲ್ಯಾ ಮೆಲ್ಲ ಮೆಲ್ಲನೆ ಬೇತೆ ಬೇತೆ ನೆವನೊಲೆನ್ ಕೊರ್ದು ಕಾಸ್ ಕೇನೊನ್ದಿತ್ತಲ್ಗೆ. ಆಲೆನ ಪಾತೆರೊಲೆನ್ ನಂಬುದ್ ಸರಿತಾ, ಕೌಸಲ್ಯಾನ ಅಕೌಂಟ್ಗ್ ಬೊಕ್ಕ ಕ್ಯಾಶ್ ರೂಪೊಡು – ಸಂದೇಶ್ (ಆರೆನ ಕಂಡನೆ), ಪ್ರಕಾಶ್, ಆಶೀಶ್ ಶೆಟ್ಟಿ, ರಾಜೇಂದ್ರ ಬೈಂದೂರು, ಗೀತಾ, ಹರಿಣಿ, ನವ್ಯಾ, ಕುಮಾರ್, ಮಾಲತಿ, ಪ್ರವೀಣ್, ಹರಿಪ್ರಸಾದ್, ನಾಗರಾಜ್ ಬೊಕ್ಕ ಭಾರತಿ ಸಿಂಗ್ ಪನ್ಪಿನಕ್ಲೆಗ್ – ಕಂತ್ಡ್ ಕಾಸ್ ಕಡಪುಡ್ದೆರ್. ಒಯಿಲ್ ಬರೆಪಾದಿನಾರ್ ಒಟ್ಟು 80,72,000 ರೂ. ಕಾಸ್ ಕಡಪುಡ್ದೆರ್ ಪನ್ದ್ ವರದಿ ಆತ್ಂಡ್.
ಅಂಚೆನೇ ಕೌಸಲ್ಯ, ಅಂಜಲಿನ್ ಡಿಸಿಲ್ವಾ ಪನ್ಪಿನಾರೆಗ್ಲಾ ಪಿಎಂಇಜಿಪಿ ಅಡಿಟ್ ಸಬ್ಸಿಡಿ ಲೋನ್ ದೆತ್ತ್ ಕೊರ್ಪಾವೆ ಪನ್ಡ್ದ್ ಒಂತೆ ಒಂತೆನೇ ಸರಿತಾ ಲೂವಿಸ್ ಗ್ ತೆರಿಪಾದಿನ ಜನೊಕ್ಲೆನ ಅಕೌಂಟ್ಲೆಗ್ 65,00,000ರೂ. ಕಾಸ್ ಕಡಪುಡ್ದೆರ್. ಕೌಸಲ್ಯ ಮೊಕುಲಿರ್ವೆರೆಗ್ ಒಟ್ಟು 4 ಕೋಟಿ ಸಬ್ಸಿಡಿ ಲೋನ್ ಮಲ್ಪಾದ್ ಕೊರ್ಪೆ ಪನ್ದ್ ನಂಬಾದ್ ಅಂಚೆನೇ ಬ್ಯಾಂಕ್ ಬೇಲೆದಾಲ್ ಪನ್ದ್ ಪೋನ್ಡ್ ಪಾತೆರ್ದ್ ಮಂಗೆ ಮಲ್ತ್ದ್ ಒಟ್ಟು 1,45,72,000ರೂ. ಕಾಸ್ ಗೆತೊಂದು ದಗೆ ಮಲ್ದಲ್ ಪನ್ದ್ ಆರೋಪ ಮಲ್ದೆರ್.
ಪ್ರಕರಣೊದ ಜಡ್ತೆ ಮಲ್ತಿನ ಬೆರ್ಮಾವರ ಪೊಲೀಸೆರ್ ಆರೋಪಿ ಕೌಸಲ್ಯಾ ನ್ ಕೈದ್ ಮಲ್ತ್ದೆರ್.