Last updated on November 21st, 2025 at 01:45 pm
ಒಡಿಪು, ನ. 21: ಪಾಕಿಸ್ತಾನ ಪರ ಬೇಹುಗಾರಿಕೆ ಮಲ್ತೊಂದಿತ್ತಿನ ಇರ್ವೆರೆನ್ ಮಲ್ಪೆಡ್ ಕೈದ್ ಮಲ್ತ್ದೆರ್. ಮಲ್ಪೆದ ಕೊಚ್ಚಿನ್ ಶಿಪ್ ಯಾರ್ಡ್ ಘಟಕೊಡು ಬೇಲೆ ಮಲ್ತೊಂದಿತ್ತಿನ ಇರ್ವೆರೆನ್ ಒಡಿಪು ಪೊಲೀಸೆರ್ ಕೈದ್ ಮಲ್ತಿತ್ತ್ದ್, ಆರೋಪಿಲೆನ್ ಉತ್ತರ ಪ್ರದೇಶ ಮೂಲೊದ ರೋಹಿತ್ ಬೊಕ್ಕ ಸಂತ್ರಿ ಪನ್ದ್ ಗುರ್ತ ಪತ್ತ್ದೆರ್. ಇರ್ವೆರ್ಲಾ ಪಾಕಿಸ್ತಾನಗ್ ರಹಸ್ಯ ಒಲವು ಪಟ್ಟೊಂದಿತ್ತೆರ್ಗೆ. ಕೈದಾತಿನ ಇರ್ವೆರ್ಲಾ ಸುಷ್ಮಾ ಮೆರೈನ್ ಪ್ರೈವೇಟ್ ಲಿಮಿಟೆಡ್ ಮುಕೇನ ಕಂತ್ರಾಟ್ ಆಧಾರೊಡು ಕೊಚ್ಚಿನ್ ಶಿಪ್ ಯಾರ್ಡ್ಡ್ ಬೇಲೆಗ್ ಸೇರ್ದಿತ್ತೆರ್.
ಕೊಚ್ಚಿನ್ ಶಿಪ್ ಯಾರ್ಡ್ ಭಾರತೀಯ ನೌಕಾಪಡೆಗ್ ಟಗ್ಲೆನ್ ಮಲ್ತ್ ಕೊರ್ಪುನ ಸಂಸ್ಥೆ ಆದಿತ್ತ್ದ್, ಖಾಸಗಿ ಸಂಸ್ಥೆಲೆಗ್ಲಾ ಪಡವು ಮಲ್ತ್ ಕೊರ್ಪುಂಡು. ಈ ಸಂಸ್ಥೆದ ಪ್ರಧಾನ ಕಚೇರಿ ಕೇರಳ ಡ್ ಉಂಡು.
ಒಂಜರೆ ವರ್ಸೊರ್ದಿಂಚಿ ಪಾಕಿಸ್ತಾನೊಗು ರಹಸ್ಯ ಮಾಹಿತಿ ಕಡಪುಡೊಂದಿತ್ತಿನ ಆರೋಪಿಲು
ಕರಿನ ಒಂಜರೆ ವರ್ಸೊರ್ದಿಂಚಿ ಆರೋಪಿಲು ಪಡವುಲೆಗ್ ಸಂಬಂಧಿತಿನ ಗೋಪ್ಯ ಒಲವು, ರಹಸ್ಯ ಟೆಕ್ನಿಕಲ್ ಒಲವುಲೆನ್ ವಾಟ್ಸ್ಆ್ಯಪ್ ಮುಕೇನ ಪಾಕಿಸ್ತಾನಡ್ ಇತ್ತಿನಕ್ಲೆಗ್ ಕಡಪುಡೊಂದಿತ್ತೆರ್ ಪನ್ಪಿನ ಗಾತಿದ ವಿಚಾರ ಇತ್ತೆ ತೆರಿದ್ ಬೈದ್ಂಡ್. ಕೇರಳ ಡ್ ಬೇಲೆ ಮಲ್ಪುನ ಪೊರ್ತುಡು ರೋಹಿತ್ ಪಾಕ ಸರ್ತಿ ಒಲವು ಪಟ್ಟೊಂದಿತ್ತ್ದ್, ಮಲ್ಪೆಗ್ ಬರ್ಪಿನೇಟಲಾ ಈ ಬೇಲೆ ದುಂಬರಿದಿತ್ತ್ಂಡ್ ಪನ್ದ್ ಜಡ್ತೆಡ್ ತೆರಿದ್ ಬೈದ್ಂಡ್.
ಈ ಬಗೆಟ್ ಕೊಚ್ಚಿನ್ ಶಿಪ್ ಯಾರ್ಡ್ ಸಿಇಒ ಬರೆಪಾದಿನ ಒಯಿಲ್ದ ಆಧಾರೊಡು ಒಡಿಪು ಪೊಲೀಸೆರ್ ಇರ್ವೆರೆನ್ಲಾ ಕೈದ್ ಮಲ್ತ್ದ್ ನ್ಯಾಯಂತಡೆದ ಎದುರು ಲೆತೊಂದು ಪೋತೆರ್. ಅಕ್ಲೆನ ಮಿತ್ತ್ ದೇಶೊದ ಸಾರ್ವಭೌಮತೆಗ್ ತೆಟ್ಟ್ ಮಲ್ಪುನ, ಗೌಪ್ಯ ಒಲವು ಮಾರ್ದಿನ ಆರೋಪೊಲೆನ ಅಡಿಟ್ ಪ್ರಕರಣ ದಾಕಲ್ತೊಂದೆರ್. ಒಲವು ಪಟ್ಟ್ಂಡ ಕಾಸ್ ಗೆತೊನೊಂದಿತ್ತೆರ್ ಪನ್ಪಿ ಅಂಶೊಲಾ ಜಡ್ತೆಡ್ ತೆರಿದ್ ಬೈದ್ಂಡ್.
ಈ ಪ್ರಕರಣ ದೇಶೊದ ಭದ್ರತೆ ದೃಷ್ಟಿಡ್ ಗಾತಿದ ಆತಂಕ ಉಂಡು ಮಲ್ದ್ಂಡ್. ಒಡಿಪು ಪೊಲೀಸೆರ್ ಆರೋಪಿಲೆನ ಮೂಲ ಪತ್ತೆರೆ ಜಡ್ತೆ ಮಲ್ತೊಂದುಲ್ಲೆರ್.
