Last updated on November 24th, 2025 at 03:54 pm
ಪುತ್ತೂರು, ನ. 24: ಪುತ್ತಿಲ ಪರಿವಾರ ಬೊಕ್ಕ ಬಿಜೆಪಿದ ನಡುಟು ಕುಡ ಅಸಮಧಾನ ಸ್ಪೋಟ ಆದಿತ್ತ್ದ್, ಇತ್ತೆ ಸ್ವತಃ ಅರುಣ್ ಕುಮಾರ್ ಪುತ್ತಿಲ ಒತ್ತೊಂದು, ಜವಬ್ದಾರಿ ಕೊರೊಡು ಪನ್ದ್ ಸೂಚನೆ ಕೊರ್ದಿತ್ತ್ಂಡಲಾ, ಜಬಾಬ್ದಾರಿ ನನಲಾ ದಾಯೆ ಕೊರ್ತುಜೆರ್ ಪನ್ಪಿನೆನ್ ಬಿಜೆಪಿ ಜಿಲ್ಲಾಧ್ಯಕ್ಷೆರ್ ಸ್ಪಷ್ಟ ಮಲ್ಪೊಡು ಪನ್ದ್ ಪನ್ಡೆರ್. ಪುತ್ತೂರುಡ್ ಪಾತೆರ್ನ ಆರ್ ಪುತ್ತಿಲ ಪರಿವಾರ ಬೊಕ್ಕ ಬಿಜೆಪಿದ ನಡುಟು ಅಸಮಾಧಾನ ಇಪ್ಪುನು ಅಂದ್, ಎಂಕ್ ಪಕ್ಷೊದ ಜವಬ್ದಾರಿ ಕೊರೊಡು ಪನ್ದ್ ಬೆಂಗಳೂರುಡು ನಡತಿನ ಇನಯೊಡು ಸೂಚನೆ ಕೊರ್ದಿತ್ತೆರ್. ದ.ಕ. ಬಿಜೆಪಿ ಜಿಲ್ಲಾಧ್ಯಕ್ಷೆ ಸತೀಶ್ ಕುಂಪಲೆರೆಗ್ ಪಕ್ಷದ ಪೆರಿಯಾಕ್ಲು ಸೂಚನೆ ಕೊರ್ದಿತ್ತೆರ್, ಒವ್ವೇ ಜಬಾಬ್ದಾರಿ ದಾನೆ ಕೊರ್ತುಜೆರ್ ಪನ್ದೊ ಬಿಜೆಪಿ ಜಿಲ್ಲಾಧ್ಯಕ್ಷೆರ್ ಸ್ಪಷ್ಟ ಮಲ್ಪೊಡು ಪನ್ದ್ ಪನ್ಡೆರ್.
ದುಂಬು ಪುತ್ತೂರು ನಗರ ಸಭೆಗ್ ನಡತಿನ ಉಪಚುನಾವಣೆದ ಪೊರ್ತುಡು ಅರುಣ್ ಕುಮಾರ್ ಪುತ್ತಿಲೆರೆ ಒಟ್ಟುಗು ಬಿಜೆಪಿ ಮುಖಂಡೆರ್ ಮಲ್ತಿನ ಇನಯೊಡು ಪುತ್ತಿಲ ಅರ್ಧೊಡೇ ಲಕ್ಕ್ದ್ ಪೋತೆರ್ ಪನ್ಪಿ ವಿಚಾರೊದ ಬಗೆಟ್ ಕೇನ್ಡಿನ ಪ್ರಶ್ನೆಗ್ ಸದು ಕೊರ್ನ ಆರ್ ಅಂಚಿನ ಒವ್ವೇ ಇನಯ ನಡತ್ದಿಜಿ ಪನ್ದ್ ಪನ್ಡೆರ್.
ಇತ್ತೆಲಾ ರಡ್ಡ್ ಮಂಡಲೊಲೆನ್ ಗೋಡ್ಯಾದ್ ಕೊರ್ನ್ಡ ಯಾನ್ ಎಲ್ಲೆನೇ ಜವಾಬ್ದಾರಿ ಗೆತೊನುವೆ ಪನ್ದ್ ಪನ್ಡೆರ್.
ಆತೇ ಅತ್ತಂದೆ ದುಂಬುದ ವಿಧಾನಸಭಾ ಚುನಾವಣೆಡ್ ಎಂಕ್ ಅಮಿತ್ ಶಾ ಫೋನ್ ಮಲ್ತಿತ್ತೆರ್ ಪನ್ದ್ ಪನೊಂದುಲ್ಲೆರ್, ಆಂಡ ಎಂಕ್ ಅಮಿತ್ ಶಾ ಫೋನ್ ಮಲ್ದಿಜೆರ್. ಪುತ್ತಿಲ ಪರಿವಾರಡ್ ಇತ್ತಿನಕ್ಲೆಗ್ ಪಕ್ಷ ಜವಾಬ್ದಾರಿ ಕೊರ್ತುಂಡು. ಆ ಪೊರ್ತುಡು ಎಂಕ್ ಜವಾಬ್ದಾರಿ ಬೊರ್ಚಿ, ಕಾರ್ಯಕರ್ತೆರೆಗ್ ಕೊರ್ಲೆ ಪನ್ದಿತ್ತೆ. ಆಂಡ ಕಾರ್ಯಕರ್ತೆರೆಗ್ ಎಂಕ್ ಜವಾಬ್ದಾರಿ ಕೊರಂದಿನ ಬೇಜಾರ್ ಆತ್ಂಡ್. ಪುತ್ತೂರು ನಗರ ಬೊಕ್ಕ ಗ್ರಾಮಾಂತರ ಮಂಡಲ ಒಟ್ಟು ಮಲ್ತ್ದ್ ಜವಾಬ್ದಾರಿ ಕೊರ್ನ್ಡ ಸಂಘಟನೆ ಮಲ್ಪೆರೆ ರೆಡಿ ಉಲ್ಲೆ, ಜವಾಬ್ದಾರಿ ಕೊರ್ನ್ಡ ಪುತ್ತೂರ್ಡ್ ಕುಡ ಬಿಜೆಪಿನ್ ಗೆಂದಾವ, ಚುನಾವಣೆಗ್ ಏರ್ ಉಂತುಂಡಲಾ ಅಕ್ಲೆನ್ ಗೆಂದಾವುನ ಪುನೆಪು ಬರ್ಪ. ಕಾರ್ಯಕರ್ತೆರೆಗ್ ಏರೆನ ಮಿತ್ತ್ ಮನಸ್ ಉಂಡಾ ಅಂಚಿನ ಅಭ್ಯರ್ಥಿ ಪುತ್ತೂರ್ಡ್ ಬೋಡು ಪನ್ದ್ ಪನ್ಡೆರ್.