Last updated on November 14th, 2025 at 03:16 pm
ಕಾರ್ಲ: ತುಳುನಾಡ ಜಾನಪದ ಬೊಕ್ಕ ಸಾಂಪ್ರದಾಯಿಕ ಗೊಬ್ಬು ಕಂಬುಲದ ಸೀಸನ್ಎಲ್ಲೆ ನ. 15ರ್ದ್ ಪಣಪಿಲ ಕಂಬುಲ ರ್ದ್ ಸುರು ಆವರೆ ಇತ್ತ್ದ್, ಅವೆಕ್ ದುಂಬು ಗುರುವಾರ ಕಾರ್ಲ ತಾಲೂಕ್ದ ಮಿಯ್ಯಾರ್ದ ಲವಕುಶ ಜೋಡುಕರೆ ಕಂಬುಲಕರೆಟ್ ಜೋರುಡು ಕಂಬುಲ ನಡತ್ಂಡ್.
ಮಿಯ್ಯಾರ್ದ ಕಂಬುಲಕರೆಟ್ ಎರ್ಲೆನ ತರಬೇತಿಗ್ ಎಡ್ಡೇನ ಮೂಲ ಸೌಕರ್ಯೊಲು ಉಲ್ಲ. ಮುಲ್ಪ ಎರ್ಲೆಗ್ ಪತ್ತ ತರಬೇತಿ ಕೊಒರ್ಯೆರ ಅಡ್ವಾನ್ಸ್ ನೀರ್ದ ವ್ಯವಸ್ಥೆದ ಒಟ್ಟುಗು, ಬೀಸದ ಲೆಕ್ಕೊಗು ಅತ್ಯಾಧುನಿಕ ಸೆನ್ಸಾರ್ ಬೊಕ್ಕ ಟೈಮಿಂಗ್ ಸೌಕರ್ಯೊಲಾ ಉಂಡು.
ಮಾಣಿ, ಬಂಗಾಡಿ, ಬೋಳ, ವೇಣೂರು, ನಂದಳಿಕೆ, ಒಡಿಪು, ಕೊಡವೂರು, ಕಕ್ಕೆಪದವು, ಬೈಂದೂರು, ಹೊಸ್ಮಾರ್, ತೊರ್ತಲ್, ಕುಳೂರು ಸೇರ್ದ್ ತುಳುನಾಡ್ದ ಪ್ರಮುಖ ಕಂಬುಲ ಕೂಟೊಲು ತನ್ಕುಲೆ ಎರ್ಲೆಡೊಪ್ಪ ಮಿಯ್ಯಾರ್ದ ಈ ಕುದಿ ಕಂಬುಲಡ್ ಪಾಲ್ಪಡೆತ. ಪ್ರಮುಖ ಕೂಟೊಲೆನ ಅಭ್ಯಾಸೊನು ತೂಯೆರ ಮಲ್ಲ ಮಟ್ಟ್ಡ್ ಕಂಬುಲಾಭಿಮಾನಿಲು ಸೇರ್ದಿತ್ತೆರ್.
ಎರ್ಲೆನ ಬಲಿಪುನ ಸಾಮರ್ತಿಗೆ, ಬರಸ್ನ್ ತೂದು ಮಲ್ಲ ಕಂಬುಲಲೆಗ್ ಐಕ್ಲೆನ್ ಸ್ಪರ್ಧಾತ್ಮಕವಾದ್ ಟ್ರೈನ್ ಮಲ್ಪೆರ ಕುದಿ ಕಂಬುಲಲು ನಡಪುವ. ಗಿಡಪುನಕ್ಲೆಗ್ ಪ್ರಾಕ್ಟೀಸ್, ವಾ ಎರುತ ಒಟ್ಟುಗು ವಾ ಎರುನು ಜತೆ ಕಟ್ಟೊಲಿ ಪನ್ಪಿನೆನ್ ಈ ಕುದಿ ಕಂಬಲಡ್ ಗಿಡಪುನಕುಲು, ದನಿಕುಲು ಪರೀಕ್ಷೆ ಮಲ್ಪೆರ್.
ಕಂಬಳ ಸೀಸನ್ ನ.15 ತಾನಿ ಪಣಪಿಲಡ್ ಜೂನಿಯರ್ ಬೊಕ್ಕ ಸಬ್ ಜೂನಿಯರ್ ಎರ್ಲೆನ ಕಂಬುಲರ್ದ್ ಸುರು ಆಪುಂಡು. ಅಂಚಾದ್, ಅವೆರ್ದ್ ದುಂಬು ಎರ್ಲೆನ ಪ್ರಾಕ್ಟೀಸ್ ಮುಗಿಪೊಡು. ಜ್ಯೂನಿಯರ್, ಸೀನಿಯರ್ ವಿಭಾಗೊದ ಎರ್ಲೆನ ಮುಲ್ಪ ರೆಡಾ ಮಲ್ಪ. ಮಿಯ್ಯಾರ್ದ ಕರೆಟ್ ಎಡ್ಡೇನ ಮೂಲ ಸೌಕರ್ಯೊಲು ಉಲ್ಲ ಪನ್ದ್ ರಾಜ್ಯ ಕಂಬುಲ ಅಸೋಸಿಯೇಷನ್ದ ಕಾರ್ಯಂತೆರ್ ವಿಜಯ್ ಕುಮಾರ್ ಕಂಗಿನಮನೆ ಪನ್ಡೆರ್