Last updated on November 30th, 2025 at 03:23 pm
ಕುಡ್ಲ, ನ. 30 : ಪೇಂಟೆದ ಉರ್ವ ಮಾರ್ಕೆಟ್ ಕೈತಲ್ ಅಪಾರ್ಟ್ಮೆಂಟ್ ಒಂಜೆತ ಮಾಲಿಗೆದ ಇಲ್ಲಡ್ ಶುಕ್ರವಾರ ರಾತ್ರೆ ಗ್ಯಾಸ್ ಲೀಕ್ ಆದಿತ್ತ್ದ್, ಇಲ್ಲದಕ್ಲೆನ ಸಮಯ ಪ್ರಜ್ಞೆ ಬೊಕ್ಕ ಕದ್ರಿ ಅಗ್ನಿಶಾಮಕ ದಳೊತ ತುರ್ತ ಸ್ಪಂದನೆರ್ದಾವರ ನಡಪರೆ ಇತ್ತಿನ ಅನಾಹುತ ತತ್ತ್ದ್ಂಡ್.
ಇಲ್ಲದ ದನಿ ಪ್ರಶಾಂತ್ ನಾಯಕ್ ರೆಗ್ ಅಡ್ಪಿಲ್ರ್ದ್ ದಾದನೋ ಸೌಂಡ್ ಕೇನ್ಡಿಲೆಕ ಆದ್ ಎಚ್ಚರ್ಗೆ ಆತ್ಂಡ್. ಪರಿಶೀಲಿಪುನಗ, ಆರೆಗ್ ಗ್ಯಾಸ್ ಲೀಕ್ ಆವೊಂದುಪ್ಪುನ ತೋಜಿದ್ ಬೈದ್ಂಡ್. ಆರ್ ಅಪಗನೇ ತನ್ನ ಅಪ್ಪೆ, ಬೊಡೆದಿ ಬೊಕ್ಕ ಬಾಲೆನ್ ತಿರ್ತ್ ಓಪನ್ ಜಾಗೆಗ್ ಲೆತೊಂದು ಪೋದು ನೆರೆಕರೆತಕ್ಲೆಗ್ ವಿಷಯ ತೆರಿಪಾದೆರ್. ಬರಿತ ಇಲ್ಲಡ್ ಇಪ್ಪುನಾರ್ ಒರಿ ಅಗ್ನಿಶಾಮಕ ದಳೊಕು ಒಲವು ಕೊರ್ತೆರ್.
ಅಗ್ನಿಶಾಮಕ ಸಿಬ್ಬಂದಿ ಅಪಗನೇ ಅಡೆಗ್ ಬತ್ತಿತ್ತ್ದ್, ಪರಿಶೀಲಿಪುನಗ ಗ್ಯಾಸ್ ಸಿಲಿಂಡರ್ದ ರೆಗ್ಯುಲೇಟರ್ ತುಂಡಾತಿನ ತೋಜಿದ್ ಬೈದ್ಂಡ್. ಅಕುಲು ಬಂಙಬತ್ತ್ದ್ ಅವೆನ್ ದೆತ್ತ್ದ್, ಲೀಕೇಜ್ ಉಂತಾದ್ ಪರಿಸ್ಥಿತಿನ್ ಅಂಕೆಗ್ ಕನತ್ದೆರ್. ದುಂಬೆಚ್ಚರ್ಗೆ ಆದ್ ಅಪಾರ್ಟ್ಮೆಂಟ್ದ ಬಾಕಿಲ್ ಬೊಕ್ಕ ಕಂಡಿಲೆನ್ ದೆತ್ತ್ದ್ ದೀತಿನೆರ್ದಾವರ ಮಲ್ಲ ಪಡಾಯಿ ನಡತ್ದಿಜಿ ಪನ್ದ್ ಅಧಿಕಾರಿಲು ತೆರಿಪಾದೆರ್.
ಕಾಲಿ ರಡ್ಡ್ ದಿನೊಕು ದುಂಬು ಪೊಸ ಗ್ಯಾಸ್ ಸಿಲಿಂಡರ್ ತಿಕ್ಕಾದಿತ್ತೆರ್ ಅಂಚಾದ್ ಅವು ನಿಲಿಕ್ಕೆ ಇತ್ತ್ಂಡ್. ರೆಗ್ಯುಲೇಟರ್ ಸ್ವಿಚ್ ನ್ ಆಫ್ ಮಲ್ದಿಜ್ಜಂಡ್. ಒರರ್ದ್ ಒರಾನೆ, ರೆಗ್ಯುಲೇಟರ್ದ ಮೋಲ್ಡಿಂಗ್ ತುಂಡಾದ್ ಮಲ್ಲ ಸೌಂಡ್ದೊಟ್ಟುಗು ಗ್ಯಾಸ್ ಲೀಕ್ ಸುರು ಆತ್ಂಡ್. ಇಲ್ಲದಾರೆಗ್ ಎಚ್ಚರ್ಗೆ ಆಪುನತ್ತಂಡ ಮಲ್ಲ ದುರಂತ ನಡತುದು ಪನ್ದ್ ಅಗ್ನಿಶಾಮಕ ಅಧಿಕಾರಿಲು ಪನ್ತೆರ್. ರೆಗ್ಯುಲೇಟರ್ ತುಂಡಾಯೆರೆ ಪತ್ತ ನೆವನ ತೆರಿದ್ ಬೈದಿಜಿ.
ಕದ್ರಿ ಅಗ್ನಿಶಾಮಕ ಸ್ಟೇಶನ್ದ ಸಕಾಯಕ ಠಾಣಾಧಿಕಾರಿ ಕೆ. ವಿ. ಗೌಡ, ಪ್ರಮುಖ ಅಗ್ನಿಶಾಮಕ ಸಿಬ್ಬಂದಿ ಚಂದ್ರಹಾಸ ಸಾಲ್ಯಾನ್, ಡ್ರೈವರ್ ಪ್ರಭು ಮಹಾದೇವ್ ಬೊಕ್ಕ ಅಗ್ನಿಶಾಮಕ ಸಿಬ್ಬಂದಿ ಪುನೀತ್ ಬೊಕ್ಕ ಕಾರ್ತಿಕ್ ಮೊಕುಲು ಈ ಕಾರ್ಯಾಚರಣೆಡ್ ಪಾಲ್ಪಡೆದಿತ್ತೆರ್.