ಅಶೋಕ್ ರೈಕ್ಲೆನ ಬಿನ್ನಪುಗು ಜೈ ಪನ್ಡೆರ್ ಕಂದಾಯ ಸಚಿವೆರ್ – ಸರಕಾರಿ ಜಾಗೆಡ್ ಇಪ್ಪುನ ದೇವಸ್ಥಾನ, ದೈವಸ್ಥಾನ, ಧಾರ್ಮಿಕ ಕೇಂದ್ರೊಲೆನ ಸಕ್ರಮಗ್ ಕಂದಾಯ ಇಲಾಖೆ  ಅನುಮೋದನೆ

Last updated on November 5th, 2025 at 05:16 pm

ಪುತ್ತೂರು: ಪುತ್ತೂರು ವಿಧಾನಸಭಾ ಕ್ಷೇತ್ರೊದ ಸೀಮೆಡ್ ಇಪ್ಪುನ ಸರ್ಕಾರಿ ಜಾಗೆಡ್ ಕಟ್ಟ್‌ದಿನ ದೇವಸ್ಥಾನ, ದೈವಸ್ಥಾನೊಲು ಬೊಕ್ಕ ಸಂಘ ಸಂಸ್ಥೆಲೆಗ್ ಸಂಬಂಧಿತ್‌ದ್, ಅಂಚಿನ ಜಾಗೆಲೆನ್ ಸಕ್ರಮ ಮಲ್ತ್‌ದ್ ಸಂಸ್ಥೆಲೆನ ಪುದರ್‌ಗ್ ಜಾಗೆ ಮಂಜೂರು ಮಲ್ಪೆರೆ ಶಾಸಕೆ ಅಶೋಕ್ ಕುಮಾರ್ ರೈಕುಲು ಸಂದಾದಿತ್ತಿನ ಬಿನ್ನಪುಗು ಕಂದಾಯ ಸಚಿವೆರ್ ಸಕಾರಾತ್ಮಕವಾದ್ ಸದು ಕೊರ್ತೆರ್.

ಶಾಸಕೆ ಅಶೋಕ್ ರೈಕ್ಲೆನ ಬಿನ್ನಪುದೋಲೆಡ್, ಪುತ್ತೂರು ವಿಧಾನಸಭಾ ಕ್ಷೇತ್ರೊದ ಬೇತೆ ಬೇತೆ ಗ್ರಾಮೊಲೆಡ್ ದೇವಸ್ಥಾನ, ದೈವಸ್ಥಾನೊಲು ಅಂಚೆನೇ ಸಂಘ ಸಂಸ್ಥೆಲೆಗ್ ತನ್ಕುಲೆ ಪುದರ್‌ಡ್ ಜಾಗೆ ಇಜ್ಜಂದಿನೆರ್ದಾವರ ಸರ್ಕಾರೊರ್ದು ತಿಕ್ಕೊಡಾಯಿನ ಮೂಲ ಸೌಕರ್ಯೊಲು ತಿಕ್ಕೊಂದಿಜ್ಜ ಪನ್ದ್ ವಿವರವಾದ್ ತೆರಿಪಾದಿತ್ತೆರ್. ಅಂಚಾದ್ ಸಾರ್ವಜನಿಕೆರೆಗ್ ಅನಾನುಕೂಲ ಆವೊಂದಿತ್ತ್‌ದ್, ಈ ದೇವಸ್ಥಾನೊಲು ಇಪ್ಪುನ ಜಾಗೆಲೆನ್ ಐಕ್ಲೆನ ಪುದರ್‌ಡ್ ಮಂಜೂರು ಮಲ್ಪೆರೆ ಬಿನ್ನಯ ಮಲ್ತಿತ್ತೆರ್.

ಶಾಸಕೆರೆ ಈ ಬಿನ್ನಪುನು ಪರಿಶೀಲನೆ ಮಲ್ತಿನ ಕಂದಾಯ ಇಲಾಖೆದ ಸಚಿವೆ ಕೃಷ್ಣ ಬೈರೇಗೌಡೆರ್, “ಶಾಸಕೆರೆ ಓಲೆಡ್ ಪನ್ತಿಲೆಕ ಪರಿಶೀಲನೆ ಮಲ್ತ್‌ದ್, ಆರ್‌ಟಿಸಿ (ಹಕ್ಕುಪತ್ರ) ಕಲಂ 11ಟ್ ರಿಜಿಸ್ಟರ್ ಮಲ್ಪೆರ ನಿಯಮದ ಪ್ರಕಾರ ಕ್ರಮ ಗೆತೊನ್ಲೆ” ಪನ್ದ್ ಸಂಬಂಧಿತಿನ ಅಧಿಕಾರಿಲೆಗ್ ಸೂಚನೆ ಕೊರ್ತೆರ್.

ಪ್ರಾಯೋಗಿಕವಾದ್ ಕೆಲ ಧಾರ್ಮಿಕ ಕೇಂದ್ರೊಲೆನ ಸಕ್ರಮಗ್ ಕಂದಾಯ ಇಲಾಖೆ ಅನುಮೋದನೆ ಕೊರ್ತುಂಡು.

ಪ್ರಾಯೋಗಿಕವಾದ್ ಈ ದೇವಸ್ಥಾನ, ದೈವಸ್ಥಾನ ಬೊಕ್ಕ ಸಂಘ ಸಂಸ್ಥೆಲೆನ ಜಾಗೆ ಬೇಗೊಡೇ ಸಕ್ರಮ ಆವರೆ ಉಂಡು.

1)ದುರ್ಗಾಪರಮೇಶ್ವರಿ ಸೇವಾ ಟ್ರಸ್ಟ್ (ರಿ.) ದುರ್ಗಾಪರಮೇಶ್ವರಿ ಭಜನಾ ಮಂದಿರ, ಪೆರಿಯಡ್ಕ, ಉಬಾರ್.
2) ಶ್ರೀ ಆದಿ ನಾಗಬ್ರಹ್ಮ ಮೊಗೇರ್ಕಳ ಸೇವಾ ಸಮಿತಿ, ಶಾಂತಿಗೋಡು.
3) ಶ್ರೀ ಮಾರಿಯಮ್ಮ ಬೊಕ್ಕ ಸಪರಿವಾರ ದೈವೊಲೆನ ದೇವಸ್ಥಾನ, ನೆಟ್ಟಣಿಗೆ ಮಡ್ನೂರು.
4) ಶ್ರೀ ಮಾರಿಯಮ್ಮ ದೇವಸ್ಥಾನ, ವಜ್ರಮೂಲೆ ಮೇನಾಲ.
5) ಮಾತೃಭೂಮಿ ಯುವವೇದಿಕೆ, ಮಾಣಿಲ.
6) ಸಾರ್ಯ ಹಾಲು ಉತ್ಪಾದಕರ ಮಹಿಳಾ ಸಂಘ.
7) ನಲಿಕೆದಕಲೆನ ಸಮಾಜ ಸೇವಾ ಸಂಘ, ಕಬಕ.
8) ಶ್ರೀ ಶಾರದಾಂಬ ಭಜನಾ ಮಂಡಳಿ, ಇಡ್ಕಿದು.
9)ಆದಿ ನಾಗಬ್ರಹ್ಮ ಮೊಗೇರ್ಕಳ ಸೇವಾ ಸಮಿತಿ, ತೆಂಕಿಲ.