Last updated on November 27th, 2025 at 09:11 am
ಕುಡುಮ : ಶ್ರೀ ಕ್ಷೇತ್ರ ಕುಡುಮಡ್ ಭಕ್ತೆರೆ ಪದ್ದೈ ಬಂಗಾರ್ನ್ ಲಕ್ಕಾದಿನ ಇರ್ವೆರ್ ಕಲ್ವೆದಿನಕ್ಲೆನ್ ಧರ್ಮಸ್ಥಳ ಪೊಲೀಸೆರ್ ನಾಡ್ಪತ್ತ್ದ್ ಲಾಕಪ್ಗ್ ಪಾಡ್ದೆರ್.
ಧಾರವಾಡ ಜಿಲ್ಲೆದ ಹುಬ್ಬಳಿ ನಗರೊದ ಸಟಲ್ಮೆಂಟ್ 2 ನೇ ಕ್ರಾಸ್ ಗಂಗಾಧರ ನಗರ ನಿವಾಸಿ ಅಪ್ಪೆ ಬಿ.ಬಿ.ಜಾನ್(59) ಬೊಕ್ಕ ಮಗಲ್ ಮಸಾಭಿ @ ಆರತಿ (34) ಕೈದಾತಿನ ಆರೋಪಿಲು. ದೇಲಂತಡೆದ ಉಲಯಿ ಆಂಧ್ರ ಪ್ರದೇಶೊರ್ದು ಬತ್ತಿತ್ತಿನ ಭಕ್ತಾದಿಲೆನ ಚೀರಾವುರ್ದ್ ಬಂಗಾರ್ ಲಕ್ಕಾದ್ ಪದ್ರಾಡಾದಿತ್ತೆರ್. ಈ ಖತರ್ನಾಕ್ ಅಪ್ಪೆ ಮಗಲೆನ್ ಐನ್ ತಿಂಗೊಲು ಯಶಸ್ವಿ ಕಾರ್ಯಾಚರಣೆ ಮಲ್ತ್ದ್ ಧರ್ಮಸ್ಥಳ ಸಬ್ ಇನ್ಸ್ಪೆಕ್ಟರ್ ಸಮರ್ಥ್ ಗಾಣಿಗೇರೆರೆನ ಕೂಟ ಕೈದ್ ಮಲ್ಪುನೆಟ್ ಯಶಸ್ವಿ ಆತೆರ್.
ಆಂಧ್ರ ಪ್ರದೇಶ ರಾಜ್ಯೊದ ನೆಲ್ಲೂರು ನಿವಾಸಿ ಜೆ.ಲತಾ ಬೊಕ್ಕ ಇಲ್ಲದಕುಲು ಮೇ.2 ತಾನಿ ಇಲ್ಲರ್ದ್ ಪಿದಡ್ದ್ ಮೇ.3 ತಾನಿ ಬಯ್ಯ 5 ಗಂಟೆಗ್ ಕುಡುಮಗ್ ಬತ್ತಿತ್ತೆರ್. ದರ್ಶನಗ್ 5:15 ರ್ದ್ 6 ಗಂಟೆ ದ ಪೊರ್ತುಡು ಪೋನಗ ಬ್ಯಾಗ್ ಡ್ 6,79,000 ರೂಪಾಯಿ ಮೌಲ್ಯೊದ 97 ಗ್ರಾಂ ಬಂಗಾರ್ ದೀವೊಂದು ಪೋದಿತ್ತೆರ್. ಬೊಕ್ಕ ಒಡಿಪುದಂಚಿ ಬೇಲೆದ ವಿಚಾರೊಡು ಪೋನಗ ಬ್ಯಾಗ್ ದ ಉಲಯಿ ದೀದಿತ್ತಿನ ಬಂಗಾರ್ ತೂನಗ ಏರೋ ಕಲ್ವೆರ್ ಬಂಗಾರ್ ಕನ್ಡ್ದಿನ ತೆರಿದ್ ಬೈದ್ಂಡ್. ಈ ಬಗೆಟ್ ಒಡಿಪುರ್ದ್ ವಾಪಸ್ ಧರ್ಮಸ್ಥಳ ಪೊಲೀಸ್ ಸ್ಟೇಶನ್ಗ್ ಬತ್ತ್ದ್ ಮೇ.4 ತಾನಿ ಜೆ.ಲತಾ ಒಯಿಲ್ ಬರೆಪಾದೆರ್.
ಧರ್ಮಸ್ಥಳ ಪೊಲೀಸೆರ್ ಪ್ರಕರಣೊದ ಬಗೆಟ್ ಕರಿನ ಐನ್ ತಿಂಗೊಲುರ್ದಿಂಚಿ ಬೇತೆ ಬೇತೆ ಅಯಾಮೊಲೆಡ್ ಜಡ್ತೆ ಮಲ್ತೊಂದುಪ್ಪುನಗ ಬಂಗಾರ್ ಕನ್ಡಿನ ಆರೋಪಿಲು ಬೇತೆ ಬೇತೆ ಕಡೆಕ್ ಪೋದು ಪೊಲೀಸೆರೆ ಕೈರ್ದ್ ತಪ್ಪಾವೊಂದಿತ್ತೆರ್. ಕಡೇಕ್ಲಾ ಆರೋಪಿಲು ನ.23 ತಾನಿ ಧರ್ಮಸ್ಥಳ ದ್ವಾರದ ಕೈತಲ್ ಕುಡ ಕನ್ಡ್ಯೆರ ಬನ್ನಗ ಪತ್ತ ಒಲವು ಇತ್ತ್ದ್ ದಾಳಿ ಮಲ್ತ್ದ್ ಕೈದ್ ಮಲ್ತ್ದೆರ್. ನ.23 ತಾನಿ ಐತಾರ ಬೊಲ್ತೇರ್ ನ್ಯಾಯಾಧೀಶೆರೆ ಇಲ್ಲಗ್ ಲೆತೊಂದು ಪೋದು ನ್ಯಾಯಾಂಗ ಕೈದ್ಗ್ ಒಪ್ಯಾದೆರ್. ನ.24 ತಾನಿ ಸೋಮಾರ ಬೊಲ್ತೇರ್ ನ್ಯಾಯಂತಡೆದ ಎದುರು ಲೆತೊಂದು ಪೋದು ಎಚ್ಚಿನ ಜಡ್ತೆಗ್ ಐನ್ ದಿನ ಪೊಲೀಸ್ ಕಸ್ಟಡಿಗ್ ದೆತೊಂದು ವಿಚಾರಣೆ ಮಲ್ತ್ದೆರ್. ಕನ್ಡ್ದಿನ ಸುಮಾರ್ 5,32,000 ಸಾವಿರ ಮೌಲ್ಯೊದ 76 ಗ್ರಾಂ ಬಂಗಾರ್ ಆರೋಪಿಲೆನ ಹುಬ್ಬಳಿದ ಇಲ್ಲರ್ದ್ ನ.25 ತಾನಿ ಅಂಗಾರೆ ಧರ್ಮಸ್ಥಳ ಪೊಲೀಸೆರ್ ಮಹಜರ್ ಮಲ್ತ್ದ್ ವಶೊಕು ಗೆತೊಂದೆರ್.
ಆರೋಪಿಲಿರ್ವೆರೆನ ಮಿತ್ತ್ಲಾ ದುಂಬುರ್ದೇ ಪಾಕ ಕಲ್ವೆ ಪ್ರಕರಣೊಲು ಬೇತೆ ಬೇತೆ ಪೊಲೀಸ್ ಸ್ಟೇಶನ್ಲೆಡ್ ದಾಕಲಾತಿನ ಜಡ್ತೆದ ಪೊರ್ತುಡು ತೆರಿದ್ ಬೈದ್ಂಡ್. ಇರ್ವೆರೆಗ್ಲಾ ದೇಲಂತಡೆಲೆನ್ ಟಾರ್ಗೆಟ್ ಮಲ್ತ್ದ್ ಭಕ್ತೆರೆನ ಏಸೊಡು ಪೊದು ಬಂಗಾರ್ ಬೊಕ್ಕ ಕಾಸ್ ಕನ್ಡುನವೇ ಬೇಲೆ. ಇರ್ವೆರ್ ಆರೋಪಿಲೆನ ವಿಚಾರಣೆ ಬೊಕ್ಕ ಮಹಜರ್ ಮುಗಿನೆರ್ದಾವರ ಧರ್ಮಸ್ಥಳ ಪೊಲೀಸೆರ್ ನ.26 ತಾನಿ ಬುಧವಾರ ಬಯ್ಯ 4:30 ಕ್ಕ್ ಬೊಲ್ತೇರ್ ನ್ಯಾಯಂತಡೆದ ಎದುರು ಲೆತೊಂದು ಪೋದಿತ್ತ್ದ್, ನ್ಯಾಯಂತಡೆ ಅಕಲೆಗ್ 14 ದಿನೊತ ನ್ಯಾಯಾಂಗ ಕೈದ್ ಕೊರ್ತುಂಡು.
ಬೊಲ್ತೇರ್ ಉಪವಿಭಾಗ ಡಿವೈಎಸ್ಪಿ ರೋಹಿನಿ.ಸಿ.ಕೆ ಮಾರ್ಗದರ್ಶನೊಡು ಬೊಲ್ತೇರ್ ಇನ್ಸ್ಪೆಕ್ಟರ್ ಸುಬ್ಬಪುರ್ ಮಠ್ ಮುತಾಲಿಕೆಡ್ ಧರ್ಮಸ್ಥಳ ಸಬ್ ಇನ್ಸ್ಪೆಕ್ಟರ್ ಸಮರ್ಥ್ ಆರ್ ಗಾಣಿಗೇರ, ಸಿಬ್ಬಂದಿ ರಾಜೇಶ್, ಪ್ರಶಾಂತ್, ಚರಣ್ ರಾಜ್, ಸಂದೀಪ್, ಮಲ್ಲಿಕಾರ್ಜುನ್, ಶಶಿಕುಮಾರ್, ಮಂಜುನಾಥ್ ಪಾಟೀಲ್, ಪ್ರಮೋದಿನಿ, ಸುನಿತಾ, ಸೌಭಾಗ್ಯ, ದೀಪಾ, ಉಷಾ ಕಾರ್ಯಾಚರಣೆಡ್ ಪಾಲ್ಪಡೆದಿತ್ತೆರ್.