Last updated on December 7th, 2025 at 08:59 am
ಪಣಜಿ, ಡಿ. 07: ಬಡಕಾಯಿ ಗೋವಾದ ಅರ್ಪೋರಾದ ರೋಮಿಯೋ ಲೇನ್ಡ್ ಇಪ್ಪುನ ಫೇಮಸ್ ನೈಟ್ ಕ್ಲಬ್ಡ್ ರಾತ್ರೆ ಸೂ ಬೂರ್ದು, 23 ಜನ ಪ್ರವಾಸಿಗೆರ್ ಜೂವೊಪ್ಪ ಪೊತ್ತ್ದ್ ಪೋತೆರ್.
ಫೇಮಸ್ ನೈಟ್ಕ್ಲಬ್ ಬಿರ್ಚ್ಡ್ ನಡಕೆ ನಡತಿತ್ತ್ದ್, ಸುಮಾರ್ 50 ಜನಕ್ ಗಡಿಕುಲಾತ. ಗಡಿಕುಲಾತಿನಕ್ಲೆನ್ ಗೋವಾ ಮೆಡಿಕಲ್ ಕಾಲೇಜ್ ಆಸ್ಪತ್ರೆಗ್ ದಾಕಲ್ತ್ದ್, ಮರ್ದ್ ಮಲ್ತೊಂದುಲ್ಲೆರ್ ಪನ್ದ್ ಅಧಿಕಾರಿಲು ತೆರಿಪಾದೆರ್.
ಪ್ರಾಥಮಿಕ ವರದಿಲೆನ ಪ್ರಕಾರ, ತೀರ್ದಿನೆಟ್ 3-4 ಜನ ಮಾತ್ರ ಪ್ರವಾಸಿಗೆರ್ ಆದಿತ್ತ್ದ್, ಒರಿನ 19 ಜನ ಕ್ಲಬ್ದ ಸಿಬ್ಬಂದಿಯೇ ಆದುಲ್ಲೆರ್ಗೆ.
ನಡಕೆದ ಬಗೆಟ್ ಒಲವು ಕೊರ್ತಿನ ಪೊಲೀಸೆರ್, ರಾತ್ರೆ 1 ಗಂಟೆದ ಅಂದಾಜಿಗ್ ಕ್ಲಬ್ ಮುಚ್ಚೆರೆ ಮಾತಾ ಅಟ್ಟನೆ ಮಲ್ತೊಂದಿತ್ತೆರ್ ಆತೆಟ್ ಸೂ ಬೂರ್ದ್ಂಡ್. ಅಡ್ಪಿಲ್ದ ಕೈತಲ್ ಗ್ಯಾಸ್ ಸಿಲಿಂಡರ್ ಪುಡತಿನೆರ್ದಾವರ ಸೂ ಪತೊಂದುಪ್ಪೊಡು. ಸ್ಫೋಟದ ಬರಸ್ಗ್ ಒಂತೆ ಸೆಕೆಂಡ್ಡೇ ಇಡೀ ಕಟ್ವಾನೊಗು ಸೂ ಪಸೆರ್ದ್ಂಡ್. ಕ್ಲಬ್ದ ಉಲಯಿತ್ತಿನಕ್ಲೆಗ್ ತಪ್ಪಾಯೆರ ಪೊರ್ತು ಇತ್ತ್ಂಡ್. ಆಂಡಲಾ ದುರಂತ ನಡತ್ದ್ಂಡ್. ಮಿತ್ತ್ರ್ದ್ ತೂನಗ ಸಿಲಿಂಡರ್ ಪುಡದ್ ಸೂ ಪತೊಂದಿಲೆಕ ಉಂಡು. ಆಂಡ ಪತ್ತ ನೆವನ ನನ ತೆರಿದ್ ಬರೊಡಾತೆ ಪನ್ದ್ ಪನ್ಡೆರ್.
ಇತ್ತೆ ಪುನೊಕ್ಲೆನ್ ಮರಣೋತ್ತರ ಪರೀಕ್ಷೆಗ್ ಕಡಪುಡ್ದೆರ್. ಗಡಿಕುಲಾತಿನಕ್ಲೆನ ಒಲವು ಪೋಲೀಸೆರ್ ಒಟ್ಟು ಮತ್ತೊಂದುಲ್ಲೆರ್.