Last updated on December 28th, 2025 at 02:01 pm
ಕುಡ್ಲ, ಡಿ. 28 : ಪಾಂಡೇಶ್ವರ ಪೊಲೀಸ್ ಸ್ಟೇಶನ್ದ ಎಎಸ್ಐ ಒರಿ ತನ್ನ ಇಲ್ಲಡೇ ಮೆಯಿಕ್ ಪೆಟ್ರೋಲ್ ಮೈತೊಂದು ಸೂ ಕೊರೊಂದು ಆತ್ಮಹತ್ಯೆ ಮಲ್ತೊನ್ರ ತೂತಿನ ನಡಕೆ ಕದ್ರಿ ವ್ಯಾಸನಗರಡ್ ನಡತ್ದ್ಂಡ್.
ಪಾಂಡೇಶ್ವರ ಸ್ಟೇಶನ್ದ ಎಎಸ್ಐ ಹರಿಶ್ಚಂದ್ರ ಬೇರಿಕೆ ಆತ್ಮಹತ್ಯೆ ಮಲ್ತೊನರ ತೂತಿನಾರ್ ಪನ್ದ್ ತೆರಿದ್ ಬೈದ್ಂಡ್.
ಕಾಸ್ರೋಡ್ ಜಿಲ್ಲೆದ ಮುಳ್ಳೇರಿಯಾ ಮೂಲೊದ ಹರಿಶ್ಚಂದ್ರೆ ಮೇರ್ ಕುಡ್ಲ, ಒಡಿಪು ಜಿಲ್ಲೆಲೆಡ್ ಕರಿನ 27 ವರ್ಸೊರ್ದಿಂಚಿ ಬೇತೆ ಬೇತೆ ಪೊಲೀಸ್ ಸ್ಟೇಶನ್ಲೆಡ್ ಬೇಲೆ ಮಲ್ತ್ದೆರ್. ಮೂಜಿ ವರ್ಸೊಗು ದುಂಬು ಕದ್ರಿ ವ್ಯಾಸನಗರೊಡು ಪೊಸ ಇಲ್ಲ್ ಕಟ್ಟ್ದ್ ಒಕ್ಕೆಲ್ ಕುಲ್ದಿತ್ತೆರ್.
ಬೊಡೆದಿ ಬೊಕ್ಕ ಜೋಕುಲು ರಜೆ ಇತ್ತಿನೆರ್ದಾವರ ಕೋಡೆ ಊರ್ಗ್ ಪೋದಿತ್ತೆರ್. ಕಾಂಡೆ 10.30ತ ಅಂದಾಜಿಗ್ ಒರರ್ದ್ ಒರಾನೆ ಇಲ್ಲದ ಎದುರು ಪಿದಯಿಡ್ ಸೂ ಪತೊಂದಿನ ಆಂಜೊವುನ ಬೊಬ್ಬೆ ಕೇನ್ದಿತ್ತ್ದ್ ಬರಿತ ಇಲ್ಲದಕುಲು ನೀರ್ ಚೇತ್ದ್ ಸೂ ತೆಕ್ಕಾದೆರ್. ಆ ಪೊರ್ತುಗಾನಗ ಪಾಡ್ದಿತ್ತಿನ ಅಂಗಿದೊಟ್ಟುಗು ಮೆಯಿ ಅಲಕ್ಕ ಪೊತ್ತುದು ಪೋತುಂಡು. ಒಲವು ತಿಕ್ಕಿನೇ ಕದ್ರಿ ಪೊಲೀಸೆರ್ ಬೊಕ್ಕ ಆಂಬುಲೆನ್ಸ್ ಬತ್ತ್ದ್ ಆರೆನ್ ಎಜೆ ಆಸ್ಪತ್ರೆಗ್ ದಾಕಲ್ತ್ದೆರ್.
ಇಲ್ಲದ ಪಿದಯಿ ಬಿಸ್ಲೆರಿ ನೀರ್ದ ಬಾಟ್ಲಿಡ್ ಅರ್ಧ ಪೊತ್ತುದು ಪೋತಿನ ಸ್ಥಿತಿಟ್ ಪೆಟ್ರೋಲ್ ದಿಂಜಿದಿನ ಕ್ಯಾನ್ ತಿಕ್ಕ್ದ್ಂಡ್. ನೀರ್ ಪಾಡ್ದಿನೆರ್ದಾವರ ಕರೆಂಚಿದ್ ಪೋತಿನ ಬಾಟ್ಲಿಡ್ ಅರ್ಧದಾತ್ ಪೆಟ್ರೋಲ್ ಒರಿದ್ಂಡ್. ಮೆಯಿಕ್ ಪೆಟ್ರೋಲ್ ಮೈತೊನುನ ಪೊರ್ತುಡು ಎದುರುದ ಇಲ್ಲದ ತಗಡ್ ಶೀಟ್ಗ್ಲಾ ಬೂರ್ದ್ಂಡ್. ಅವೆಕ್ಲಾ ಸೂ ಪತೊಂದಿತ್ತ್ದ್ ಶೀಟ್ದ ಒಟ್ಟುಗು ಇಲ್ಲದ ಫೈಬರ್ ಪೈಪ್ ಪೊತ್ತುದು ಪೋತುಂಡು. ಕದ್ರಿ ಪೊಲೀಸೆರ್ ಜಾಗೆಡ್ ಪರಿಶೀಲನೆ ಮಲ್ತೊಂದುಲ್ಲೆರ್.