ಮಗಲ್ ಬೇತೆ ಜಾತಿದ ಆಣನ್ ಮೋಕೆ ಮಲ್ತೊಂದುಲ್ಲಲ್ ಪನ್ಡ್‌ದ್ ಆ ಆಣನೇ ಕೆರ್ಯೆರ್ ಇಲ್ಲದಕುಲು; ಆಣನ ಪುನೊಕು ಪೂಜಿನ ಮಂಜಲ್ ತನ್ನ ಮೆಯಿಕ್ ಪೂಜೊಂದು, ಪುನೊತ ಕೈಟ್ ಕುಂಕುಮ ದೀಪಾದ್ ಆಯೆನೇ ಎನ್ನ ಕಂಡನೆ ಪನ್ದ್ ಒತ್ತೊಂಡಿನ ಮಗಲ್..!

Last updated on December 1st, 2025 at 11:59 am

ನಾಂದೇಡ್, ಮಹಾರಾಷ್ಟ್ರ, ಡಿ. 01: ಮೋಕೆ ಏಪೊಗೂಲಾ ಶಾಶ್ವತ ಪನ್ಪಿ ಪಾತೆರೊಗು ಈ ನಡಕೆನೇ ಪುರಾಪು. ಮಗಲ್ ಬೇತೆ ಜಾತಿದಾಯನ್ ಮೋಕೆ ಮಲ್ತೊಂದುಲ್ಲಲ್ ಪನ್ದ್ ತೆರಿನನೇ ದುಂಬು ಪಿರ ತೂವಂದೆ ಆ ಆಣನ್ ಪೊಣ್ಣನ ಇಲ್ಲದಕುಲು ಕಲ್ಲ್‌ಡ್ ಗುದ್ದ್‌ದ್, ಗುಂಡು ಪಾಡ್ದ್ ಕೆರ್ದ್ ಬುಡ್ತೆರ್. ಆಯನ ಅಂತ್ಯಕ್ರಿಯೆ ದ ಪೊರ್ತುಡು ಆಯನ ಪುನತ ಕೈಟೇ ಕುಂಕುಮ ದೀಪಾವೊಂದು ಆಯನ ಅಪ್ಪೆಅಮ್ಮನ ಇಲ್ಲಗ್ ಮರ್ಮಲ್ ಆದ್ ಪೋದು ಬದ್‌ಕುವೆ ಪನ್ದ್ ಪೊಣ್ಣು ಪ್ರತಿಜ್ಞೆ ಮಲ್ತ್‌ದಲ್. ಮಹಾರಾಷ್ಟ್ರದ ನಾಂದೇಡ್‌ಡ್ ಈ ನಡಕೆ ನಡತ್‌ದ್ಂಡ್.

ಆಂಚಲ್ ಪನ್ಪಿನಾಲೆಗ್ ತನ್ನ ಪಲಯನ ಮುಕೇನ ಸಕ್ಷಮ್ ಪನ್ಪಿನಾಯನ ಗುರ್ತ ಆದಿತ್ತ್ಂಡ್, ಮೆಲ್ಲ ಮೆಲ್ಲ ಆ ಗುರ್ತ ಮೋಕೆ ಆದ್ ತಿರ್ಗ್‌ದ್ಂಡ್. ಮೂಜಿ ವರ್ಸ ಅಕುಲು ಒರಿಯನೊರಿ ಮೋಕೆ ಮಲ್ತೊಂದಿತ್ತೆರ್. ಇಲ್ಲಡ್ ವಿಚಾರ ತೆರಿಪಾನಗ ಬೇತೆ ಜಾತಿ ಪನ್ದ್ ಏರ್ಲಾ ಮದಿಮೆಗ್ ಒತ್ತೊನರೆ ಕೇನ್ದಿಜೆರ್. ಪಾಕ ಸರ್ತಿ ಪೊಣ್ಣನ ಇಲ್ಲದಕುಲು ಸಕ್ಷಮ್‌ಗ್ ಪೋಡಿಕಟ್ಟಾದಿತ್ತ್ಂಡಲಾ ಮೊಕ್ಲೆನ ಮೋಕೆನ್ ಸೋಪಾಯೆರ ಆತಿಜಿ. ಅಂಚಾದ್ ಪಿಸ್‌ರ್‌ಡ್ ಆಂಚಲ್‌ನ ಇಲ್ಲದಕುಲು ಸಕ್ಷಮ್‌ನ್ ಆಕ್‌ದ್ ಕೆರ್ತೆರ್.

ಆಯನ ಅಂತ್ಯಸಂಸ್ಕಾರೊಗು ಬತ್ತಿತ್ತಿನ ಆಂಚಲ್ ಆಯನ ಪುನೊಕು ಪೂಜಿದಿನ ಮಂಜಲ್‌ನ್ ತಾನ್ ಪೂಜೊಂದು ಪುನೊತ ಕೈಟೇ ಕುಂಕುಮ ದೀಪಾವೊಂದು ಕಂಡನೆ ಬೊಡೆದಿ ಆತೆರ್. ಕಡೆ ಮುಟ್ಟಲಾ ಆಯನ ಬೊಡೆದಿ ಆದೇ ಇಪ್ಪೆರ ನಿರ್ಧಾರ ಮಲ್ತ್‌ದಲ್. ಸಕ್ಷಮ್ ತೀರ್ದಿತ್ತ್‌ನ್ಡಲಾ ಅಕಲೆನ ಮೋಕೆ ಗೆಂದ್‌ದ್ಂಡ್. ಮೋಕೆದ ಎದುರು ಮಾತೆರ್ಲಾ ಸೋತೆರ್. ಸಕ್ಷಮ್‌ನ್ ಕೆರ್ನಕ್ಲೆಗ್ ಮರಣದಂಡನೆ ಕೊರೊಡು ಪನ್ದ್ ಆಂಚಲ್ ಒತ್ತಾಯ ಮಲ್ತ್‌ದಲ್. ಆಜಿ ಆರೋಪಿಲೆನ ವಿರುದ್ಧ ಬೇತೆ ಬೇತೆ ಸೆಕ್ಷನ್‌ಲೆನ ಅಡಿಟ್ ಪ್ರಕರಣ ದಾಕಲ್ತೊಂದು ಪೋಲೀಸೆರ್ ಅಕ್ಲೆನ್ ಕೈದ್ ಮಲ್ತ್‌ದೆರ್.