Last updated on December 18th, 2025 at 11:57 am
ಪುತ್ತೂರು, ಡಿ. 18: ಮಾಸ್ಕ್ಮ್ಯಾನ್ ಚಿನ್ನಯ್ಯೆ ಬುಡುಗಡೆ ಆತಿನ ಬೆರಿಟೇ ಧರ್ಮಸ್ಥಳ ಪ್ರಕರಣೊಗು ಸಂಬಂಧಿತ್ದ್ ಮಹೇಶ್ ಶೆಟ್ಟಿ ತಿಮರೋಡಿ ಮೆರೆಗ್ ಕುಡೊರ ಗಡಿಪಾರಿ ನೋಟಿಸ್ ಜಾರಿ ಮಲ್ತ್ದೆರ್. ಜಿಲ್ಲೆರ್ದ್ ಮಹೇಶ್ ಶೆಟ್ಟಿನ್ ಗಡಿಪಾರ್ ಮಲ್ಪೆರ ಆದೇಶ ಕೊರ್ತೆರ್. ಪುತ್ತೂರು ಸಕಾಯಕ ಆಯುಕ್ತೆದಿ ಸ್ಟೆಲ್ಲಾ ವರ್ಗೀಸ್ ಈ ಆದೇಶೊನು ಕೊರ್ತೆರ್. ಇಂಚಿಪ ಆತೇ ತಿಮರೋಡಿಗ್ ಗಡಿಪಾರು ನೋಟೀಸ್ ಕೊರ್ದಿತ್ತಿನ ಸ್ಟೆಲ್ಲಾ ವರ್ಗೀಸ್ ಇತ್ತೆ ಕುಡ ಆದೇಶ ಕೊರ್ತೆರ್.
ದಾಯೆ ಗಡಿಪಾರ್ ಮಲ್ಪೆರೆ ಬಲ್ಲಿ ಪನ್ದ್ ನೆವನ ಕೇನ್ದ್ ನೋಟೀಸ್ ಜಾರಿ ಮಲ್ತ್ದೆರ್. ಡಿ.7ತಾನಿ ಸಕಾಯಕ ಆಯುಕ್ತೆರೆ ಗಡಿಪಾರ್ ನೊಟೀಸ್ಗ್ ಮಹೇಶ್ ಶೆಟ್ಟಿ ತಿಮರೋಡಿ ಆಕ್ಷೇಪಣೆ ಸಂದಾದಿತ್ತೆರ್. ಇತ್ತೆ ಸಕಾಯಕ ಆಯುಕ್ತೆರ್ ಉಂದೆಕ್ ಸದು ಪನ್ಪಿಪಿಲೆಕ ಕುಡೊಂಜಿ ನೋಟಿಸ್ ಜಾರಿ ಮಲ್ತ್ದೆರ್. ಮಹೇಶ್ ಶೆಟ್ಟಿ ತಿಮರೋಡಿ ಪುತ್ತೂರು ಸಕಾಯಕ ಆಯುಕ್ತೆರೆ ಎದುರು ವಕೀಲೆರೆ ಮುಕೇನ ಆಕ್ಷೇಪಣೆ ಸಂದಾದಿತ್ತೆರ್. ಈ ಪೊರ್ತುಡು ಮಹೇಶ್ ಶೆಟ್ಟಿ ತಿಮರೋಡಿಯೆರೆನ ವಕೀಲೆರ್ ಬೊಕ್ಕ ಆಯುಕ್ತೆರೆ ನಡುಟು ವಾದ-ವಿವಾದ ನಡತ್ದ್ ಆಯುಕ್ತೆರ್ ತಿಮರೋಡಿಗ್ ಕುಡ ಗಡೀಪಾರ್ ಆದೇಶ ಕೊರ್ತೆರ್.
ತಿಮರೋಡಿನ ಮಿತ್ತ್ದ ದುಂಬುದ ಕೇಸ್ಲೆನ ಒಟ್ಟುಗು ಇತ್ತೆದ ಕೆಲ ಕೇಸ್ಲೆನ್ ಪತೊಂದು ಗಡಿಪಾರ್ ಆದೇಶ ಕೊರ್ತುಂಡು ಪನ್ದ್ ಪೊಲೀಸೆರ್ ಪನ್ತೆರ್. ಇನಿರ್ದ್ (ಡಿ.18) 2026 ಡಿ.17ಮುಟ್ಟ ಪನ್ಡ ಒಂಜಿ ವರ್ಸ ಗಡಿಪಾರ್ಗ್ ಆದೇಶ ಕೊರ್ತೆರ್. ತಿಮರೋಡಿನ್ ರಾಯಚೂರು ಜಿಲ್ಲೆದ ಮಾನ್ವಿ ಪೊಲೀಸ್ ಸ್ಟೇಶನ್ ಸೀಮೆಗ್ ಗಡಿಪಾರ್ ಮಲ್ದೆರ್. ಈ ದುಂಬು ತಿಮರೋಡಿ ಆಯುಕ್ತೆರೆ ಗಡಿಪಾರ್ ಆದೇಶೊನು ಪ್ರಶ್ನೆ ಮಲ್ತ್ದ್ ಅಂಚೆನೇ ಈ ಗಡೀಪಾರ್ ಆದೇಶೊನು ರದ್ದ್ ಮಲ್ಪೆರೆ ಕೇನ್ಡ್ದ್ ಕರ್ನಾಟಕ ಹೈಕೋರ್ಟ್ಗ್ ಅರ್ಜಿ ಪಾಡ್ದಿತ್ತೆರ್.
ಪೊಸ ಆದೇಶೊಗು ಹೈಕೋರ್ಟ್ ಸೂಚನೆ:
ಈ ಬಗೆಟ್ ವಿಚಾರಣೆ ಮಲ್ತಿನ ಹೈಕೋರ್ಟ್, ಗಡಿಪಾರ್ ಆದೇಶ ರದ್ದ್ ಮಲ್ತ್ದ್, ಸೆಕ್ಷನ್ ಸಮಮಲ್ತ್ದ್ ಪೊಸ ಆದೇಶ ಕೊರ್ಯೆರ ಪುತ್ತೂರು ಎಸಿಗ್ ಸೂಚನೆ ಕೊರ್ತುಂಡು. ಇತ್ತೆ ಆ ಪ್ರಕಾರ ಕೆಲ ಕಾನೂನಾತ್ಮಕ ಪ್ರಕ್ರಿಯೆದ ಅಡಿಟ್ ತಿಮರೋಡಿನ ಗಡಿಪಾರ್ ಪ್ರಕ್ರಿಯೆ ಸುರು ಮಲ್ತ್ದ ಪನ್ದ್ ಪುತ್ತೂರ್ದ ಸಕಾಯಕ ಆಯುಕ್ತೆದಿ ಪನ್ತೆರ್. ರಡ್ಡನೇ ಸರ್ತಿ ಕುಡ ಮಹೇಶ್ ಶೆಟ್ಟಿ ತಿಮರೋಡಿಗ್ ಜಿಲ್ಲೆರ್ದ್ ಗಡಿಪಾರ್ ಆದೇಶ ಕೊರ್ತೆರ್.