Last updated on December 23rd, 2025 at 01:18 pm
ಬೆಂಗಳೂರು, ಡಿ. 23: ಬೊಡೆದಿ ಆ್ಯಕ್ಸಿಡೆಂಟ್ಡ್ ಸೈತಲ್ ಪನ್ದ್ ಪನ್ದಿತ್ತಿನ ಪ್ರಕರಣೊಗು ಟ್ವಿಸ್ಟ್ ತಿಕ್ಕ್ದ್ಂಡ್. ಈ ಬಗೆಟ್ ಪೊಲೀಸ್ ಅಧಿಕಾರಿಲು ಸ್ಫೋಟಕ ಒಲವು ಕೊರ್ತೆರ್. ಗಾಯತ್ರಿ ಪನ್ಪಿನಾರೆನ್ ಕೆರ್ತಿನ ಆರೋಪಡ್ ಕಂಡನೆ ಅನಂತ್ನ್ ಬಾಗಲೂರು ಪೊಲೀಸೆರ್ ಕೈದ್ ಮಲ್ತ್ದೆರ್. 55 ವರ್ಸ ಪ್ರಾಯೊದ, ದೈಹಿಕ ಶಿಕ್ಷಕಿಯಾದಿತ್ತಿನ ಗಾಯತ್ರಿ ಮೆರೆನ್ ಕಂಡನೆ ಅನಂತ್(64) ಡಿ. 21ತಾನಿ ಐತಾರ ಬಯ್ಯಡ್ ಕೆರ್ದಿತ್ತೆ.
ಕೆರ್ದ್ ಆ್ಯಕ್ಸಿಡೆಂಟ್ಡ್ ಸೈದಲ್ ಪನ್ದ್ ತೂಪಾಯೆರ ತೂತೆ. ಮಿಟ್ಟಗಾನಹಳ್ಳಿ ಗ್ರಾಮೊದ ಕೈತಲ್ ಸೈಟ್ ತೂಯೆರ ಬೊಡೆದಿನ್ ಬೈಕ್ಡ್ ಲೆತೊಂದು ಪೋದಿತ್ತಿನ ಅನಂತ್, ಅಲ್ಪ ಆಲೆನ ಕೆಕ್ಕಿಲ್ ಪೊಜೆಂಕ್ದ್, ತರೆಕ್ ಕಲ್ಲ್ ದೇರ್ತ್ ಪಾಡ್ದ್ ಕೆರ್ತೆ.
ಬೊಕ್ಕ ಚಿಕ್ಕಜಾಲ ಸಂಚಾರಿ ಪೊಲೀಸ್ ಸ್ಟೇಶನ್ಗ್ ಪೋದು ಬುಲೆಟ್ ಬೈಕ್ರ್ದಾವರ ಆ್ಯಕ್ಸಿಡೆಂಟ್ ಆತ್ಂಡ್ ಪನ್ದ್ ಕಲು ಪ್ರಕರಣ ದಾಕಲ್ತ್ದೆ. ಆಂಡ ಯಲಹಂಕ ಸರ್ಕಾರಿ ಆಸ್ಪತ್ರೆಡ್ ಪುನತ ಮಿತ್ತ್ ಇತ್ತಿನ ಅನುಮಾನಾಸ್ಪದ ಗಡಿಕುಲೆನ್ ತೂದು ಪೊಲೀಸೆರ್, ಬಾಗಲೂರು ಪೊಲೀಸೆರೆಗ್ ಒಲವು ಕೊರ್ತೆರ್.
ಜಡ್ತೆ ಮಲ್ತಿನ ಬಾಗಲೂರು ಪೊಲೀಸೆರ್ ಆರೋಪಿ ಅನಂತ್ನ್ ವಶೊಕು ಗೆತೊಂದು ದಸ್ತಗಿರಿ ಮಲ್ತ್ದೆರ್. ದಂಪತಿಲೆ ನಡುಟು ಮದಿಮೆ ಆಯಿನೆರ್ದಿಂಚಿ ಮನಸ್ತಾಪ ಇತ್ತ್ಂಡ್ ಪನ್ದ್ ಪ್ರಾಥಮಿಕ ಜಡ್ತೆರ್ದ್ ತೆರಿದ್ ಬೈದ್ಂಡ್. ದಂಪತಿಲಾಯಿನ ಅನಂತ್ ಬೊಕ್ಕ ಗಾಯತ್ರಿಗ್ ಸುಮಾರ್ 22 ವರ್ಸೊಗು ದುಂಬು ಮದಿಮೆ ಆದಿತ್ತ್ದ್, 17 ವರ್ಸ ಪ್ರಾಯೊದ ಮಗಲ್ ಉಲ್ಲಲ್.
ಮದಿಮೆ ಆಯಿನೆರ್ದಿಚಿಲಾ ಇರ್ವೆರೆ ನಡುಟು ಕಿಞ್ಞ ಕಿಞ್ಞ ವಿಚಾರೊಗು ಮನಸ್ತಾಪೊಲು ಇತ್ತ ಪನ್ದ್ ಜಡ್ತೆಡ್ ತೆರಿದ್ ಬೈದ್ಂಡ್. ಬೊಡೆದಿ ಎನನ್ ಸಮ ತೂಪೆದಿಜಲ್, ಪೊರ್ತು ಪೊರ್ತುಗು ತಿನ್ಯೆರ ಕೊರ್ಪೆದಿಜಲ್ ಪನ್ದ್ ಅನಂತ್ ಪೋಲೀಸೆರೆಡ ಪನ್ತೆಗೆ. ಮೊಕುಲು ದುಂಬು ಡಿವೋರ್ಸ್ಗ್ ಅರ್ಜಿಲಾ ಪಾಡ್ದಿತ್ತೆರ್. ಆಂಡ ಬೊಕ್ಕ ರಾಜಿಯಾದ್ ಅರ್ಜಿ ಗೆತೊಂದಿತ್ತೆರ್ಗೆ.