Last updated on December 26th, 2025 at 02:46 pm
ಢಾಕಾ, ಡಿ. 25: ಬಾಂಗ್ಲಾದೇಶೊಡು ಹಿಂಸಾಚಾರೊದ ನಡಕೆಲು ಉಂತೊಂದೇ ಇಜ್ಜ. ನೆತ್ತೆರ್ ಪರ್ಪುನ ಪೀಡೆಲೆ ಲೆಕ ಕೆಲ ಜನೊಕುಲು ಅಲ್ಪಸಂಖ್ಯಾತೆರೆನೇ ಈಡ್ ಮಲ್ತಿ ಲೆಕ ತೋಜುಂಡು. ಕೆಲ ದಿನೊಕು ದುಂಬು ದೀಪು ಚಂದ್ರದಾಸ್ ಪನ್ಪಿನ ಹಿಂದೂನ ಬಲಿಗೆತೊಂದಿನ ಕೆಂಗುಡೆರ್ ಇತ್ತೆ ಕುಡೊರಿ ಹಿಂದೂ ಧರ್ಮೀಯನ್ ಕೆರ್ತೆರ್. ರಾಜ್ಬಾರಿ ಜಿಲ್ಲೆಡ್ 29 ವರ್ಸ ಪ್ರಾಯೊದ ಅಮೃತ್ ಮಂಡಲ್ ಪನ್ಪಿನಾಯನ ಮಿತ್ತ್ ಹಲ್ಲೆ ಮಲ್ತ್ದ್ ಕೆರ್ತೆರ್.
ಈ ನಡಕೆ ಮುರಾನಿ ಬುದಾರ ರಾತ್ರೆ 11 ಗಂಟೆಗ್ ನಡತ್ದ್ಂಡ್. ರಾಜ್ಬರಿ ಜಿಲ್ಲೆದ ವಸಾಯಿದಂಗ ಓಲ್ಡ್ ಮಾರ್ಕೆಟ್ ಕೈತಲ್ ಜನೊಕ್ಲೆನ ಕೂಟ ಒಂಜಿ ಅಮೃತ್ ಮಂಡಲ್ ಅಲಿಯಾಸ್ ಸಾಮ್ರಾಟ್ನ ಮಿತ್ತ್ ಹಲ್ಲೆ ಮಲ್ತ್ದ್ಂಡ್. ಪಂಗಶಾ ಸ್ಟೇಶನ್ ಪೊಲೀಸೆರೆ ಪ್ರಕಾರ ಅಮೃತ್ ಮಂಡಲ್ ವಸಾಯಿದಂಗ ಗ್ರಾಮೊದಾಯೆಗೆ . ಆಯೆ ಒರಿ ಕಲ್ವೆ ಆದಿತ್ತೆ ಪನ್ದ್ ಊರುದಕುಲು ಆರೋಪ ಮಲ್ತೊಂದುಲ್ಲೆರ್ ಪನ್ದೊ ಪೊಲೀಸೆರ್ ಕೊರ್ತಿನ ನೆವನ.
ದುಂಬು ಇಂಚೆನೇ ಆಕ್ದ್ ಕೆರ್ದ್, ಪೊತ್ತದ್ ಪಾಡ್ದಿನ ದೀಪು ಚಂದ್ರದಾಸ್ನ ಮಿತ್ತ್ಲಾ ಇಂಚಿನ ಆರೋಪ ಮಲ್ತಿತ್ತೆರ್. ಆಯೆ ಇಸ್ಲಾಮ್ ಧರ್ಮ ನಿಂದನೆ ಮಲ್ತ್ದೆ ಪನ್ದ್ ಕೆರ್ಯ ಪನ್ದ್ ಪನ್ದಿತ್ತೆರ್. ಆಂಡ ಆ ಆರೋಪ ಕಲು ಪನ್ದ್ ಸಾಬೀತಾತ್ಂಡ್. ಇತ್ತೆ ಸಾಮ್ರಾಟ್ನ ಮಿತ್ತ್ಲಾ ಕಲ್ವೆದ ಆರೋಪ ಪಾಡ್ದ್, ಕೆರ್ತಿನೆನ್ ಸಮರ್ಥನೆ ಮಲ್ತೊನರೆ ತೂವೊಂದಿಪ್ಪುನ ಸಾಧ್ಯತೆ ಉಂಡು.
2024ತ ಬಾಂಗ್ಲಾ ದಂಗೆದ ರೂವಾರಿ ಆದಿತ್ತಿನ ಅಂಚೆನೇ ಭಾರತ ವಿರೋಧಿ ಧೋರಣೆ ಇತ್ತಿನ ಉಸ್ಮಾನ್ ಹದಿ ಪನ್ಪಿನಾಯನ ಮಿತ್ತ್ ಡಿಸೆಂಬರ್ 12ತಾನಿ ಗುಂಡುದ ದಾಳಿ ಆದಿತ್ತ್ಂಡ್. ಒಂತೆ ದಿನ ಕರಿದ್ ಆಯೆ ಸೈತಿತ್ತೆ. ಅವಾಯಿ ಬೊಕ್ಕ ಬಾಂಗ್ಲಾದೇಶೊಡು ಹಿಂಸಾಚಾರೊಲು ಎಚ್ಚ ಆತ, ಭಾರತ ವಿರೋಧಿ ಮನೋಭಾವ ಎಚ್ಚ ಆವೊಂದುಂಡು. ಭಾರತೊದ ರಾಜತಾಂತ್ರಿಕ ಕಚೇರಿಲೆನ್ ಈಡ್ ಮಲ್ತೊಂದುಲ್ಲೆರ್. ಹಿಂದೂ ಧರ್ಮೀಯೆರೆನ್ ಟಾರ್ಗೆಟ್ ಮಲ್ತ್ದ್ ದಾಳಿ ಮತ್ತೊಂದುಲ್ಲೆರ್.