Last updated on January 14th, 2026 at 11:47 am
ಬೊಲ್ತೇರ್: ನಾಳ ದೇಲಂತಡೆಗ್ ಕಾಂಡೆದ ಧನುಪೂಜೆಗ್ ಪನ್ದ್ ಇಲ್ಲರ್ದ್ ಪಿದಡ್ದ್ ಪೋದಿತ್ತಿನ ಆಣ್ ಸುಮಂತ್ ನಿಗೂಢವಾದ್ ನಾಪತ್ತೆ ಆತಿನ ನಡಕೆ ಜ. 14ತಾನಿ ಕಾಂಡೆ ನಡತ್ದ್ಂಡ್.
ಆಣ್ ಇಲ್ಲಡೆ ಬರಂದೆ ಇತ್ತಿನೆನ್ ತೂದು ಇಲ್ಲದಕುಲು ನಾಡ್ನಗ ತೋಟದ ಕೆದುತ ಕೈತಲ್ ತೋಜಿದ್ ಬತ್ತಿನ ನೆತ್ತೆರ್ದ ಕಲೆಕುಲು ಇಲ್ಲದಕ್ಲೆಡ ಬೊಕ್ಕ ಊರುದಕ್ಲೆಡ ಪೋಡಿಗೆ ಪುಟ್ಟಾದ್ಂಡ್.
ಊರುದಕುಲು ಬೊಕ್ಕ ಅರಣ್ಯ ಇಲಾಖೆದಕುಲು ಆಣನ್ ನಾಡೊಂದುಲ್ಲೆರ್.
ಕುವೆಟ್ಟು ಗ್ರಾಮೊದ ಸಂಬೋಳ್ಯ ಬರಮೇಲ್ ಸುಬ್ರಹ್ಮಣ್ಯ ನಾಯಕ್ ಮೆರೆನ ಮಗೆ ಗೇರುಕಟ್ಟೆ ಪ್ರೌಢ ಶಾಲೆಡ್ 9ನೇ ಕ್ಲಾಸ್ ಕಲ್ತೊಂದುಪ್ಪುನ ವಿದ್ಯಾರ್ಥಿ ಸುಮಂತ್ (15ವ) ನಾಪತ್ತೆ ಆತಿನ ಆಣ್. ನಾಳ ದೇಲಂತಡೆಗ್ ಸುಮಂತ್ ಸೇರ್ದ್ ಮೂಜಿ ಜನ ಆಣುಲು ಒಟ್ಟುಗು ಪೋವೊಂದಿತ್ತ್ದ್, ಕಾಂಡೆ ಸುಮಂತ್ ಇಲ್ಲರ್ದ್ ಬನ್ನಗ ಕಡೆಸ್ಸಿನೆರ್ದಾವರ ಇರ್ವೆರ್ ದೋಸ್ತಿಲು ಆಯನ್ ಕಾತ್ ಕಾತ್ದ್ ಧನುಪೂಜೆಗ್ ಪೋತೆರ್.
ಆಂಡ ಸುಮಂತ್ ಇಲ್ಲರ್ದ್ ಪಿದಡ್ದಿತ್ತ್ಂಡಲಾ, ದೇಲಂತಡೆಗ್ ಬತ್ತ್ದಿಜ್ಜಂಡ್. ಅಂಚಾದ್ ಸಂಶಯೊಡು ದೋಸ್ತಿಲು ಆಯನ ಇಲ್ಲಗ್ ಫೋನ್ ಮಲ್ಪುನಗ ಸುಮಂತ್ನ ಇಲ್ಲದಕುಲು ಆಯೆ ಧನುಪೂಜೆಗ್ ಕಾಂಡೆನೇ ಪೋತೆ ಪನ್ದ್ ತೆರಿಪಾದೆರ್. ಆಂಡ ಆಯೆ ದೇಲಂತಡೆಗ್ ಬತ್ತ್ದಿಜೆ ಪನ್ದ್ ದೋಸ್ತಿಲು ಪನ್ನಗ ಇಲ್ಲದಕುಲು ಪೋಡಿದ್ ಮುಟ್ಟದಕ್ಲೆಡ ತೆರಿಪಾದೆರ್.
ಆಣ್ ಬರ್ಪಿ ಸಾದಿದ ನಡುಟು ಕೆದುತ ಕೈತಲ್ ನೆತ್ತೆರ್ದ ಕಲೆಕುಲು ತೂಯೆರ ತಿಕ್ಕ್ದಿತ್ತ್ದ್, ಜಾಗೆಡ್ ಅರಣ್ಯ ಇಲಾಖೆದಕುಲು, ಪೊಲೀಸ್ ಇಲಾಖೆ, ಅಗ್ನಿ ಶಾಮಕ ದಳ, ಊರುದಕುಲು ಸೇರ್ದ್ ನಾಡೊಂದುಲ್ಲೆರ್. ಮಚ್ಚಿನ ಪಸಂದ್ರೊಡು ಚಿಟ್ಟೆಪಿಲಿ ಇಪ್ಪುನೆರ್ದಾವರ ಆಣ್ ನಿಗೂಢವಾದ್ ನಾಪತ್ತೆ ಆತಿನ ಗ್ರಾಮಸ್ಥೆರೆಡ ಬೊಕ್ಕ ಇಲ್ಲದಕ್ಲೆಡ ಪೋಡಿಗೆ ಉಂಡು ಮಲ್ದ್ಂಡ್.