Last updated on January 14th, 2026 at 09:04 am
ಒಡಿಪು,ಜ. 14: ಒಡಿಪು ಜಿಲ್ಲೆದ ಮೂಡನಿಡಂಬೂರು ಗ್ರಾಮೊಡು ವರದಿಯಾತಿನ ಕಲ್ವೆದ ಪ್ರಕರಣೊಗು ಸಂಬಂಧಿತ್ದ್ ಒಡಿಪು ನಗರ ಪೊಲೀಸೆರ್ ಇರ್ವೆರ್ ಅಂತರರಾಜ್ಯ ಬೈಕ್ ಕಲ್ವೆರೆನ್ ಪತ್ತ್ದ್, ಕನ್ಡಿನ ಬೈಕ್ನ್ ವಶೊಕು ಗೆತೊಂದೆರ್.
ಕೈದಾತಿನ ಆರೋಪಿಲೆನ್ ಕೇರಳದ ಎರ್ನಾಕುಲಂ ಜಿಲ್ಲೆದ ಆಶಿಕ್ ಅನ್ಸಾರ್ ಬೊಕ್ಕ ಮೊಹಮ್ಮದ್ ಅಲ್ತಾಫ್ ಪನ್ದ್ ಗುರ್ತ ಪತ್ತ್ದೆರ್.
ಮೂಡನಿಡಂಬೂರು ಗ್ರಾಮೊದ ನಾಗಚಂದ್ರೆ ಪನ್ಪಿನಾರ್ ಬರೆಪಾದಿನ ಒಯಿಲ್ದ ಪ್ರಕಾರ, ಡಿಸೆಂಬರ್ 28 ದಾನಿ ರಾತ್ರೆ 9 ಗಂಟೆದ ಅಂದಾಜಿಗ್, ನಾಗಚಂದ್ರೆರ್ ಮೂಡನಿಡಂಬೂರುದ ಕರಾವಳಿ ಬೈಪಾಸ್ ಸಾದಿಡ್ ಇಪ್ಪುನ ಲ್ಯಾಂಡ್ಮಾರ್ಕ್ ಕಟ್ವಾನೊದ ಕೈತಲ್ ತನ್ನ ಬೈಕ್ ಉಂತಾದ್ ಇಲ್ಲಗ್ ಪೋದಿತ್ತೆರ್. ಮನದಾನಿ ಕಾಂಡೆ 7 ಗಂಟೆದ ಅಂದಾಜಿಗ್ ಪಿರ ಅಡೆ ಬನ್ನಗ, ಬೈಕ್ ಕನ್ಡ್ದ್ ಪೋತಿನ ತೆರಿದ್ ಬೈದ್ಂಡ್. ಕನ್ಡ್ದಿನ ಗಾಡಿದ ಮೌಲ್ಯ ಸುಮಾರ್ 70,000 ರೂ. ಪನ್ದ್ ಅಂದಾಜಿ ಮಲ್ತ್ದೆರ್.
ಒಯಿಲ್ದ ಆಧಾರೊಡು ಒಡಿಪು ನಗರ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್. ಒಡಿಪು ಉಪವಿಭಾಗೊದ ಉಪ ಪೊಲೀಸ್ ವರಿಷ್ಠಾಧಿಕಾರಿ ಡಿ.ಟಿ. ಪ್ರಭು ಮೆರೆನ ಮಾರ್ಗದರ್ಶನೊಡು ಬೊಕ್ಕ ಒಡಿಪು ನಗರ ಪೊಲೀಸ್ ಸ್ಟೇಶನ್ದ ಪ್ರಭಾರಿ ಪೊಲೀಸ್ ನಿರೀಕ್ಷಕೆ ಮಹೇಶ್ ಪ್ರಸಾದ್ ಪಿ ಮೆರೆನ ಮುತಾಲಿಕೆಡ್ ಅಪರಾಧಿಲೆನ್ ಪತ್ತೆರೆ ವಿಶೇಷ ಕೂಟ ಉಂಡು ಮಲ್ತೆರ್. ಪೊಲೀಸ್ ಸಬ್ ಇನ್ಸ್ಪೆಕ್ಟರ್ ಭರತೇಶ್ ಕಂಕಣವಾಡಿ ಬೊಕ್ಕ ಗೋಪಾಲಕೃಷ್ಣ ಜೋಗಿ, ಸಿಬ್ಬಂದಿ ಪ್ರಸನ್ನ ಸಿ, ಸಂತೋಷ್ ರಾಥೋಡ್, ಮಲ್ಲಯ್ಯ ಹಿರೇಮಠ ಬೊಕ್ಕ ಶಿವಕುಮಾರ್ ಈ ಕೂಟೊಡು ಇತ್ತೆರ್.
ಜನವರಿ 4 ತಾನಿ, ಪೊಲೀಸ್ ಕೂಟ ಕೇರಳದ ಕೋಯಿಕ್ಕೋಡ್ ಜಿಲ್ಲೆದ ಮುಕ್ಕಂಡ್ ಆರೋಪಿಲೆನ್ ನಾಡ್ ಪತ್ತ್ದ್ ಕೈದ್ ಮಲ್ತ್ದೆರ್. ಆರೋಪಿಲೆರ್ದ್ ಕನ್ಡ್ದಿನ ಕಪ್ಪು ರಂಗ್ದ ಯಮಾಹಾ ಆರ್15 ಬೈಕ್ ನ್ ಪೊಲೀಸೆರ್ ವಶೊಕು ಗೆತೊಂದೆರ್.
ಎಚ್ಚಿನ ಜಡ್ತೆಡ್ ಆಶಿಕ್ ಅನ್ಸಾರ್ನ ಮಿತ್ತ ಕೇರಳಡ್ ಇಲ್ಲ್ ಕನ್ಡ್ದಿನ ಪ್ರಕರಣ ಬೊಕ್ಕ ಗಾಂಜಾ ಸೇವನೆ ಪ್ರಕರಣ ಸೇರ್ದ್ ರಡ್ಡ್ ಕ್ರಿಮಿನಲ್ ಪ್ರಕರಣೊಲು ದಾಕಲಾದುಲ್ಲ ಪನ್ದ್ ತೆರಿದ್ ಬೈದ್ಂಡ್. ಮೊಹಮ್ಮದ್ ಅಲ್ತಾಫ್ನ ಮಿತ್ತ್ ಕೇರಳಡ್ ಮೂಜಿ ಕಲ್ವೆ ಪ್ರಕರಣೊಲು ಬೊಕ್ಕ ರಡ್ಡ್ ಗಾಂಜಾ ಸೇವನೆ ಪ್ರಕರಣೊಲು ಸೇರ್ದ್ ಐನ್ ಪ್ರಕರಣೊಲು ದಾಕಲಾದುಲ್ಲ.