Last updated on January 20th, 2026 at 08:57 am
ಕುಡ್ಲ,ಜ. 20: ಮುಲ್ಕಿ ತಾಲೂಕ್ದ ಏಳಿಂಜೆ ಗ್ರಾಮೊದ ಮುತ್ತಯ್ಯಕೆರೆ ಆಗಿಂದಕಾಡ್ ಪನ್ಪಿನಲ್ಪ ರಡ್ಡ್ ಜನೊನು ಕೆರ್ತಿನ ಪ್ರಕರಣೊದ ಆರೋಪಿ ಅಲ್ಫೋನ್ಸ್ ಸಲ್ದಾನ ಪನ್ಪಿನಾಯಗ್ 2ನೇ ಎಚ್ಚಿಗೆದ ಜಿಲ್ಲಾ ಸೆಷನ್ಸ್ ನ್ಯಾಯಂತಡೆದ ನ್ಯಾಯಾಧೀಶೆ ಜಗದೀಶ್ ಜೀವಾವಧಿ ಶಿಕ್ಷೆ ಕೊರ್ದು ಸೋಮಾರ ತೀರ್ಪು ಕೊರ್ತೆರ್.
2020ತ ಎಪ್ರಿಲ್ 29ತನಿ ಆರೋಪಿ ಇಲ್ಲ ಮುಟ್ಟದ ವಿನ್ಸಿ ಯಾನೆ ವಿನ್ಸೆಂಟ್ ಡಿಸೋಜ ಬೊಕ್ಕ ಆರೆನ ಬೊಡೆದಿ ಹೆಲೆನ್ ಡಿಸೋಜ ಯಾನೆ ಹೆಲೆನ್ ರೋಸಿ ರೋಡ್ರಿಗಸ್ ಮೊಕ್ಲೆನ್ ಮರೊತ ಗೆಲ್ಲ್ ಕಡ್ಪುನ ವಿಚಾರೊಗು ಲಡಯಿ ಆದ್ ಕೆರ್ತಿನ ಆರೋಪ ಇತ್ತ್ಂಡ್. ಅಪಗದ ಮುಲ್ಕಿ ಸ್ಟೇಷನ್ದ ನಿರೀಕ್ಷಕೆ ಜಯರಾಮ ಡಿ.ಗೌಡೆರ್ ಜಡ್ತೆ ಮಲ್ತ್ದ್ ನ್ಯಾಯಂತಡೆಗ್ ದೋಷಾರೋಪಣಾ ಪಟ್ಟಿ ಸಂದಾದಿತ್ತೆರ್.
ಸುರುಟ್ 1ನೇ ಎಚ್ಚಿಗೆದ ಜಿಲ್ಲಾ ಸೆಷನ್ಸ್ ನ್ಯಾಯಂತಡೆದ ನ್ಯಾಯಾಧೀಶೆರ್ ಮಲ್ಲಿಕಾರ್ಜುನೆ ವಿಚಾರಣೆ ಮಲ್ತಿತ್ತೆರ್. ಆರೋಪಿಗ್ ಜೀವಾವಧಿ ಶಿಕ್ಷೆದೊಟ್ಟುಗು 2 ಲಕ್ಷ ರೂ. ದಂಡ ಕಟ್ಟೆರೆ ನ್ಯಾಯಂತಡೆ ಆದೇಶ ಮಲ್ದ್ಂಡ್. ಸರಕಾರಿ ಅಭಿಯೋಜಕೆರಾಯಿನ ಜುಡಿತ್ ಓಲ್ಗಾ ಮಾರ್ಗರೇಟ್ ವಾದ ಮಂಡನೆ ಮಲ್ತಿತ್ತೆರ್.