Last updated on January 25th, 2026 at 07:01 pm
ಬಾಂಗ್ಲಾದೇಶೊಡು ಅಲ್ಪಸಂಖ್ಯಾತ ಹಿಂದೂ ಸಮುದಾಯೊದ ಮಿತ್ತ್ ನಡತೊಂದುಪ್ಪುನ ಹಿಂಸಾಚಾರೊದ ನಡಕೆಲು ಉಂತೊಂದಿಜ್ಜ. ಜನವರಿ 23ತ ಶುಕ್ರವಾರ ರಾತ್ರೆ, ನರಸಿಂಗ್ಡಿ ಜಿಲ್ಲೆಡ್ 23 ವರ್ಸ ಪ್ರಾಯೊದ ಹಿಂದೂ ಜವನೆ ಚಂಚಲ್ ಭೌಮಿಕ್ ಪನ್ಪಿನಾಯನ್ ಗ್ಯಾರೇಜ್ದೂಲಯಿ ಜೂವೊಪ್ಪ ಪೊತ್ತದ್ ಪಾಡ್ದಿನ ನಡಕೆ ವರದಿ ಆತ್ಂಡ್.
ಸ್ಥಳೀಯೆರ್ ಪನ್ಪಿಲೆಕ, ನರಸಿಂಗ್ಡಿ ಪೊಲೀಸ್ ಲೈನ್ಸ್ ಕೈತಲ್ದ ಪಲ್ಲಿದ ಬರಿತ ಗ್ಯಾರೇಜ್ಡ್ ಬೇಲೆ ಮಲ್ತೊಂದಿತ್ತಿನ ಚಂಚಲ್ ಭೌಮಿಕ್, ಏಪೊಲ್ದ ಲೆಕ ಬೇಲೆ ಮುಗಿತ್ದ್ ಗ್ಯಾರೇಜ್ದ ಉಲಯಿ ಜೆತ್ತಿತ್ತೆ. ರಾತ್ರೆ ಏರೋ ಗ್ಯಾರೇಜ್ದ ಶಟರ್ನ್ ಪಿದಯಿರ್ದ್ ಮುಚ್ಚಿದ್, ಪೆಟ್ರೋಲ್ ಮೈತ್ದ್ ಸೂ ಪಾಡ್ದೆರ್. ಈ ನಡಕೆ ದುಂಬೇ ಪ್ಲಾನ್ ಮಲ್ತ್ದ್ ಆತ್ಂಡ್ ಪನ್ದ್ ತೀರ್ದಿನಾಯನ ಇಲ್ಲದಕುಲು ಆರೋಪ ಮಲ್ತ್ದೆರ್.
ಗ್ಯಾರೇಜ್ದ ಉಲಯಿ ತಿಕ್ಕ್ದ್ ಬೂರ್ದಿತ್ತಿನ ಭೌಮಿಕ್ ಸೂಟ್ ಪೊತ್ತುದ್ ಸೂಡು ಸೂಕರಿ ಆತೆ. ಸೂ ಪಾಡ್ದಿನ ಆರೋಪಿಲು ಜಾಗೆರ್ದ್ ಬಲ್ತ್ದೆರ್ ಪನ್ದ್ ಪ್ರತ್ಯಕ್ಷ ತೂಯಿನಕುಲು ಪನ್ತೆರ್. ಅಪಗನೇ ಮಟ್ಟದಕುಲು ಅಗ್ನಿಶಾಮಕ ದಳೊಕು ತೆರಿಪಾದಿತ್ತದ್, ಅಗ್ನಿಶಾಮಕ ಸಿಬ್ಬಂದಿ ಜಾಗೆಗ್ ಬತ್ತ್ದ್ ಸುಮಾರ್ ಒಂಜಿ ಗಂಟೆದ ಪುನೆಪುರ್ದ್ ಬೊಕ್ಕ ಸೂನ್ ತೆಕ್ಕಾದೆರ್. ಬೊಕ್ಕ ಭೌಮಿಕ್ನ ಪೊತ್ತುದು ಪೋತಿನ ಸರ್ರೊನು ಗ್ಯಾರೇಜ್ದ ಉಲಯಿರ್ದ್ ಪಿದಯಿ ದೆತ್ತ್ದೆರ್.
ಇಂಚಿಪದ ದಿನೊಟು ಬಾಂಗ್ಲಾದೇಶೊದ ಬೇತೆ ಬೇತೆ ಭಾಗೊಲೆಡ್ ಹಿಂದೂ ಸಮುದಾಯೊನೇ ಈಡ್ ಮಲ್ತ್ದ್ ನಡತೊಂದು ಇಪ್ಪುನ ಹಿಂಸಾಚಾರೊದ ನಡಕೆಲೆರ್ದಾವರ, ಧಾರ್ಮಿಕ ಪಗೆನೇ ಈ ಏರೆಡಲಾ ಪಗೆ ಇಜ್ಜಂದಿನ ಈ ಜವನನ್ ಕೆರ್ತಿನ ಕೃತ್ಯೊದ ಪಿರವು ಇಪ್ಪು ಪನ್ಪಿ ಅನುಮಾನ ಕೆಲ ಜನ ತೂಪಾದೆರ್. ಆಂಡ, ಈ ಪ್ರಕರಣೊದ ಪತ್ತ ಉದ್ದೇಶ ಬೊಕ್ಕ ಆರೋಪಿಲೆನ ಬಗೆಟ್ ನನಲ ಅಧಿಕೃತ ಒಲವು ತಿಕ್ಕ್ದಿಜಿ.