Last updated on February 17th, 2026 at 09:36 am
ಎಲ್ಯಮಗಲ್ನೂರು, ಫೆ. 17: ಚಿಕ್ಕಮಗಳೂರು ಪೇಂಟೆದ ತಿಲಕ್ ಪಾರ್ಕ್ ಮುಟ್ಟದ ಹಿಂದೂ ಇಲ್ಲದ ಮಿತ್ತ್ ಕಲ್ಲ್ ದಕ್ಕ್ದಿನ ಪ್ರಕರಣೊಗು ಸಂಬಂಧಿತ್ದ್ ಪೊಲೀಸೆರ್ ರಡ್ಡ್ ಬೇತೆ ಬೇತೆ ಎಫ್ಐಆರ್ಲೆನ್ ದಾಕಲ್ತೊಂದೆರ್. ಕಲ್ಲ್ ದಕ್ಕಿನಕ್ಲೆನ ಮಿತ್ತ್ ಬೊಕ್ಕ ಅಕ್ಲೆನ್ ಪತ್ತ್ದ್ ಪೊಲೀಸೆರೆಗ್ ಒಪ್ಯಾಯಿನಕ್ಲೆನ ಮಿತ್ತ್ಲಾ ಬಸವನಹಳ್ಳಿ ಪೊಲೀಸ್ ಸ್ಟೇಶನ್ಡ್ ಎಫ್ಐಆರ್ ಪಾಡ್ದೆರ್.
ಸುಧಾ ಪನ್ಪಿನಾರೆನ ಇಲ್ಲದ ಮಿತ್ತ್ ಕಲ್ಲ್ ದಕ್ಕಿನ ಆರೋಪಡ್ ಹುಸೇನ್ ಬೊಕ್ಕ ರಿಯಾನ್ನ ಮಿತ್ತ್ ಕೇಸ್ ಪಾಡ್ದೆರ್. ಕಲ್ಲ್ ದಕ್ಕಿನ ಕೆಂಗುಡೆರೆನ್ ಪತ್ತಿನ ಶಾಮ್ ಬೊಕ್ಕ ಸಂತೋಷ್ರೆನ ಮಿತ್ತ್ಲಾ ಹಲ್ಲೆ ಆರೋಪಡ್ ಎಫ್ಐಆರ್ ಪಾಡೊಂದೆರ್. ಶಾಮ್ ಮೇರ್ ಬಜರಂಗದಳ ಹಾಸನ ವಿಭಾಗೊದ ಸಹ ಸಂಚಾಲಕೆ ಆದಿತ್ತ್ದ್, ಸಂತೋಷ್ ಬಿಜೆಪಿ ಯುವ ಮೋರ್ಚಾ ಚಿಕ್ಕಮಗಳೂರು ಜಿಲ್ಲಾಧ್ಯಕ್ಷೆ ಆದುಲ್ಲೆರ್.
ಎಂಕ್ಲೆಗ್ ಬ್ಯಾಟ್ಡ್ ಆಕ್ದೆರ್ ಪನ್ದ್ ಹುಸೇನ್ ಬರೆಪಾದಿನ ಒಯಿಲ್ದ ಪ್ರಕಾರ ಪ್ರಕರಣ ಪಾಡ್ದಿತ್ತ್ದ್, ಗಡಿಕುಲಾತಿನ ಆಕ್ಷದ್ ಬೊಕ್ಕ ಹಸೇನ್ ಆಸ್ಪತ್ರೆಗ್ ದಾಕಲಾತೆರ್. ಅಕ್ಷದ್ ಬೊಕ್ಕ ಹುಸೇನ್ನ ಮಿತ್ತ್ BNS ಕಾಯ್ದೆದ ಬೇತೆ ಬೇತೆ ಕಲಂಲೆನ ಅಡಿಟ್ ಬೊಕ್ಕ ಎಸ್ಸಿ ಎಸ್ಟಿ ದೌರ್ಜನ್ಯ ತಡೆ ಕಾಯ್ದೆದ ಸೆಕ್ಷನ್ಲೆನ ಅಡಿಟ್ ಪ್ರಕರಣ ದಾಕಲ್ತೊಂದೆರ್. ಶಾಮ್ ಬೊಕ್ಕ ಸಂತೋಷ್ನ ಮಿತ್ತ್ಲಾ BNS ದ ಅಡಿಟ್ ಕೇಸ್ ಪಾಡ್ದೆರ್.
ಈ ಪ್ರಕರಣೊಡು, ಹಿಂದೂಲೆನ ಮಿತ್ತ್ಲಾ ಕ್ರಮ ಗೆತೊನೊಡು ಪನ್ದ್ ಮುಸ್ಲಿಂ ಸಮುದಾಯೊದಕುಲು ಬೊಕ್ಕ ಹಾಗೂ ಎಸ್ಡಿಪಿಐ ಮುಖಂಡೆರ್ ಆಗ್ರಹ ಮಲ್ತಿತ್ತೆರ್. ಈ ಪೊರ್ತುಡು ವಿಹೆಚ್ಪಿ ಬೊಕ್ಕ ಬಜರಂಗದಳ ಮುಖಂಡೆರ್ಲಾ ಪೊಲೀಸ್ ಸ್ಟೇಶನ್ದ ಎದುರು ಸೇರ್ದ್ ಆಕ್ರೋಶ ತೂಪಾಯೆರ್. ರಾತ್ರೆ ಬಸವನಹಳ್ಳಿ ಪೊಲೀಸ್ ಸ್ಟೇಶನ್ದ ಎದುರು ಪಾಕ ಜನ ಸೇರಿನೆರ್ದಾವರ ಒಂತೆ ಪೊರ್ತು ಉದ್ವಿಗ್ನ ವಾತಾವರಣ ಉಂಡಾದಿತ್ತ್ಂಡ್.
ಹಿಂದೂ ಇಲ್ಲ್ ಟಾರ್ಗೆಟ್
ತಿಲಕ್ ಪಾರ್ಕ್ ಕೈತಲ್ದ ಹಿಂದೂಲೆನ ಒಂಜಿ ಇಲ್ಲದ ಮಿತ್ತ್ ಕರಿನ ಒಂಜಿ ವಾರೊರ್ದಿಂಚಿ ಕೆಂಗುಡೆರ್ ಅಪಗಪಗ ಕಲ್ಲ್ ದಕ್ಕೊಂದಿತ್ತೆರ್ ಪನ್ಪಿ ಆರೋಪ ಉಂಡು. ಸೋಮವಾರ ರಾತ್ರೆ ಕಲ್ಲ್ ದಕ್ಕಿನ ಪೊರ್ತುಡು ಬಜರಂಗದಳತಕುಲು ಕಲ್ಲ್ ದಕ್ಕಿನಕ್ಲೆನ್ ಪತ್ತ್ದ್ ಬಸವನಹಳ್ಳಿ ಪೊಲೀಸೆರೆಗ್ ಒಪ್ಯಾದಿತ್ತೆರ್. ಇಂದೆಕ್ ಎಸ್ಡಿಪಿಐ ಬಾರೀ ಆಕ್ಷೇಪ ತೂಪಾದಿತ್ತ್ಂಡ್. ಹಿಂದೂ ಸಂಘಟನೆಲೆನ ಮುಖಂಡೆರೆ ಮಿತ್ತ್ ಕ್ರಮ ಗೆತೊನರೆ ಆಗ್ರಹ ಮಲ್ತಿತ್ತ್ಂಡ್.
ಬೊಕ್ಕ ಪೊಲೀಸ್ ಸ್ಟೇಶನ್ದ ಎದುರು ಹಿಂದೂ ಸಂಘಟನೆಲು ಬೊಕ್ಕ ಎಸ್ಡಿಪಿಐ ಮುಖಂಡೆರ್ ಸೇರ್ದ್ ಒಂತೆ ಪೊರ್ತು ಉದ್ವಿಗ್ನ ಪರಿಸ್ಥಿತಿ ಉಂಡಾದಿತ್ತ್ಂಡ್. ಇತ್ತೆ ಪೊಲೀಸ್ ಬಂದೋಬಸ್ತ್ ಟೈಟ್ ಮಲ್ತ್ದೆರ್.