Last updated on February 11th, 2026 at 12:54 pm
ಉಬಾರ್, ಫೆ. 11: ಎಂಡಿಎಂಎ ಮಾದಕ ಸೊತ್ತು ಇತ್ತಿನ ಆಂಜೊವು ಒರಿಯನ್ ಉಬಾರ್ ಪೊಲೀಸೆರ್ ಕೈದ್ ಮಲ್ತ್ದೆರ್. ಫೆಬ್ರವರಿ 10ತಾನಿ ಅಂಗಾರೆ ಉಬಾರ್ ಗ್ರಾಮೊದ ಪಂಜಾಲ ಪನ್ಪಿನಲ್ಪ ರೌಂಡ್ಸ್ ತಿರ್ಗೊಂದುಪ್ಪುನಗ ಆರೋಪಿನ್ ಉಲಕೈ ಮಲ್ತೊಂದೆರ್. ಕೈದಾತಿನಾಯನ್ ಯಾಹ್ಯಾ ಕೊಕ್ಕಡ (48) ಪನ್ದ್ ಗುರ್ತ ಪತ್ತ್ದೆರ್.
ಪತ್ರಿಕಾ ಪ್ರಕಟಣೆದ ಪ್ರಕಾರ, ಬಯ್ಯ ಸುಮಾರ್ 6 ಗಂಟೆದ ಅಂದಾಜಿಗ್ ಆರೋಪಿ ಅನುಮಾನಾಸ್ಪದವಾದ್ ಉಂತುದಿತ್ತಿನೆನ್ ಪೊಲೀಸೆರ್ ತೂತೆರ್. ಅಪಗನೇ ಉಲಕೈ ಮಲ್ತೊಂದು ವಿಚಾರಣೆ ಮಲ್ಪುನಗ, ಮಾರುನ ಉದ್ದೇಶೊಡು ಎಂಡಿಎಂಎ ದೀವೊಂದೆ ಪನ್ದ್ ಆಯೆ ಒತ್ತೊನ್ದೆ ಪನ್ದ್ ತೆರಿಪಾದೆರ್.
ಮಹಜರ್ ಮಲ್ಪುನಗ ಪೊಲೀಸೆರ್ 2.16 ಗ್ರಾಂ ಎಂಡಿಎಂಎ (ಅಂದಾಜಿ ಮೌಲ್ಯ ರೂ.3,000) ನ್ ವಶೊಕು ಗೆತೊಂದೆರ್. ಒಟ್ಟುಗು ರೂ. 45,000 ಮೌಲ್ಯೊದ ಐಫೋನ್ ಬೊಕ್ಕ ರೂ.1,000 ಮೌಲ್ಯೊದ ಸ್ಯಾಮ್ಸಂಗ್ ಕೀಪ್ಯಾಡ್ ಮೊಬೈಲ್ ಫೋನ್ನ್ಲಾ ವಶೊಕು ಗೆತೊಂದೆರ್. ಉಲಕೈ ಮಲ್ತೊಂದಿನ ಸೊತ್ತುಲೆನ ಒಟ್ಟು ಮೌಲ್ಯ ರೂ. 49,000 ಪನ್ದ್ ಅಂದಾಜಿ ಮಲ್ತ್ದೆರ್.
ಈ ಬಗೆಟ್ ಉಬಾರ್ ಪೊಲೀಸ್ ಸ್ಟೇಶನ್ಡ್ ಎನ್ಡಿಪಿಎಸ್ ಕಾಯ್ದೆದ ಸೆಕ್ಷನ್ 8(c) ಬೊಕ್ಕ 22(b)ದ ಅಡಿಟ್ ಪ್ರಕರಣ ದಾಕಲಾದಿತ್ತ್ದ್, ಎಚ್ಚಿಗೆ ಜಡ್ತೆ ನಡತೊಂದುಂಡು.